ବହୁଳ ଭାବେ ବ୍ୟବହୃତ ପେନ୍ କିଲର୍ ଔଷଧ ନିମେସୁଲାଇଡ୍ ବ୍ୟାନ । ସ୍ୱାସ୍ଥ୍ୟ ମନ୍ତ୍ରଣାଳୟ ଲଗାଇଛନ୍ତି ପ୍ରତିବନ୍ଧକ । ୧୦୦ ମିଲିଗ୍ରାମରୁ ଅଧିକ ନିମେସୁଲାଇଡ୍ ଟାବଲେଟର ଉତ୍ପାଦନ, ବିକ୍ରି ଓ ବଣ୍ଟନ ଉପରେ ପ୍ରତିବନ୍ଧକ ଲାଗିଛି । ସରକାର ସ୍ୱାସ୍ଥ୍ୟ ବିପଦକୁ ନଜରରେ ଏହି କଟକଣା ଲଗାଇଛନ୍ତି । ସ୍ୱାସ୍ଥ୍ୟ ମନ୍ତ୍ରଣାଳୟର ଡ୍ରଗ୍ସ ଟେକ୍ନିକାଲ୍ ଆଡଭାଇଜରୀ ବୋର୍ଡର ପରାମର୍ଶ ପରେ ଏହି ନିଷ୍ପତ୍ତି ନିଆଯାଇଛି ।

ଡ୍ରଗ୍ସ ଆଣ୍ଡ କସ୍ମେଟିକ୍ ଆକ୍ଟ ୧୯୪୦ର ଧାରା 26A ଅଧିନରେ ଏହି ପ୍ରତିବନ୍ଧକ ଲାଗିଛି । ୧୦୦ ମିଲିଗ୍ରାମରୁ ଅଧିକ ନିମେସୁାଇଲଡ୍ ଔଷଧ ନେବା ମଣିଷ ପାଇଁ ବିପଦଜ୍ଜନକ ହୋଇପାରେ । ଯନ୍ତ୍ରଣାରୁ ମୁକ୍ତି ପାଇବା ପାଇଁ ବଜାରରେ ସୁରକ୍ଷିତ ବିକଳ୍ପ ଉପଲବ୍ଧ ରହିଥିବା ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି । ନିମେସୁାଇଲଡ୍ ଏକ ନନ୍ ଷ୍ଟେରୟଡନାଲ୍ ଔଷଧ, ଯାହାକୁ ପେନ୍ କିଲର ଭାବେ ବ୍ୟବହାର କରାଯାଏ । ୨୦୧୧ରେ ସ୍ୱାସ୍ଥ୍ୟ ମନ୍ତ୍ରଣାଳୟ ୧୨ରୁ କମ୍ ବୟସର ପିଲାଙ୍କ ପାଇଁ ନିମେସୁଲାଇଡ୍ ବ୍ୟବହାର ଉପରେ ବ୍ୟାନ ଲଗାଇଥିଲେ ।

ତେବେ, ସରକାର ଏହାକୁ ନେଇ ଚିନ୍ତା ବ୍ୟକ୍ତ କରିଛନ୍ତି । ୟୁରୋପର ଅନେକ ଦେଶରେ ନେମିସୁଲାଇଡ୍ ଟାବଲେଟ୍ ସମ୍ପୂର୍ଣ୍ଣ ରୂପେ ବ୍ୟାନ ରହିଛି । ଫିନଲାଣ୍ଡ, ସ୍ପେନ୍, ଆୟରଲାଣ୍ଡ ଓ ବେଲଜିୟମ ପରି ୟୁରୋପୀୟ ଦେଶ ଏହା ଉପରେ ୨୦୦୭ରୁ ହିଁ କଟାକଣା ଲଗାଇଛନ୍ତି । ଏହା ବ୍ୟତୀତ କାନାଡା, ଜାପାନ, ଆମେରିକା, ଅଷ୍ଟ୍ରେଲିଆ ଓ ୟୁକେ ମଧ୍ୟ ନେମିସୁଲାଇଡ୍ ବ୍ୟବହାର ଉପରେ ବ୍ୟାନ ଲଗାଇଛନ୍ତି ।