Inspiring Story / ମାନବିକତାର ନିଆରା ଉଦାହରଣ, ୧୦ ବର୍ଷର ଶିଶୁ ଦାନ କଲା ନିଜ ଗୁଲକ

ନେପାଳରେ ଆସିଥିବା ଭୟଙ୍କର ବନ୍ୟା ଏବଂ ଏହା ପରେ ସାମ୍ନାକୁ ଆସିଥିବା ଧ୍ୱଂସର ଚିତ୍ର ସାରା ବିଶ୍ୱକୁ ଦୋହଲାଇ ଦେଇଛି । ଏଭଳି ସମୟରେ ଉତ୍ତରପ୍ରଦେଶର କୁଶୀନଗରର ଜଣେ ୧୦ ବର୍ଷୀୟ ଶିଶୁ ମାନବିକତାର ଏକ ଅନନ୍ୟ ଉଦାହରଣ ପାଲଟିଛନ୍ତି । ତୃତୀୟ ଶ୍ରେଣୀର ଛାତ୍ର ଅଲ୍‌ଫାଜ୍ ଶେଖ ନେପାଳ ବନ୍ୟା ପୀଡ଼ିତଙ୍କ ସହାୟତା ପାଇଁ ନିଜ ଗୁଲକରେ ଜମା କରିଥିବା ସମସ୍ତ ଟଙ୍କା ଦାନ କରିଛନ୍ତି ।

ଅଲ୍‌ଫାଜ୍ ତାଙ୍କ ଗୁଲକକୁ ଜିଲ୍ଲା ମାଜିଷ୍ଟ୍ରେଟ୍ ମହେନ୍ଦ୍ର ସିଂହ ତଁୱରଙ୍କୁ ହସ୍ତାନ୍ତର କରିଛନ୍ତି । ସୂଚନା ଅନୁସାରେ, ସେ ପ୍ରାୟ ଏକ ବର୍ଷ ଧରି ଗୁଲକରେ ଟଙ୍କା ସଞ୍ଚୟ କରୁଥିଲେ । ଏହି ଟଙ୍କା ତାଙ୍କ ଛୋଟଛୋଟ ଆବଶ୍ୟକତା ଓ ଇଚ୍ଛା ପୂରଣ ପାଇଁ ଜମା କରାଯାଇଥିଲା । କିନ୍ତୁ ନେପାଳରେ ବନ୍ୟା ପରେ ଲୋକଙ୍କ ଦୁର୍ଦ୍ଦଶାର ଚିତ୍ର ଦେଖିବା ପରେ ସେ ନିଜ ସଞ୍ଚୟକୁ ପୀଡ଼ିତଙ୍କ ପାଇଁ ଦେବାକୁ ନିଷ୍ପତ୍ତି ନେଇଥିଲେ ।

ଅଲ୍‌ଫାଜ୍ କହିଛନ୍ତି ଯେ, ସେ ୟୁଟ୍ୟୁବ୍‌ରେ ନେପାଳ ବନ୍ୟାର ଭିଡିଓ ଦେଖିଥିଲେ । ଭିଡିଓରେ ଲୋକଙ୍କ ଘର ଭାସିଯିବା ଏବଂ ଅନେକ ଲୋକଙ୍କ ମୃତ୍ୟୁ ଖବର ଦେଖି ସେ ଗଭୀର ଭାବେ ଦୁଃଖିତ ହୋଇଥିଲେ । ଏହା ପରେ ସେ ନିଜ ସାମର୍ଥ୍ୟ ଅନୁସାରେ ବନ୍ୟା ପୀଡ଼ିତଙ୍କୁ ସହାୟତା କରିବାକୁ ମନସ୍ଥ କରିଥିଲେ । ପ୍ରଥମେ ସେ ନିଜ ଦାଦାଙ୍କୁ ଏ ବିଷୟରେ କହିଥିଲେ ଏବଂ ଗୁଲକ ଦାନ କରିବାକୁ ଇଚ୍ଛା ପ୍ରକାଶ କରିଥିଲେ ।

ଅଲ୍‌ଫାଜଙ୍କ ଏହି ପଦକ୍ଷେପ ସୋସିଆଲ ମିଡିଆରେ ମଧ୍ୟ ଲୋକଙ୍କ ହୃଦୟ ଜିତିଛି । ଅନେକ ଲୋକ ଶିଶୁଟିର ସମ୍ବେଦନଶୀଳତା ଓ ମାନବିକତାକୁ ପ୍ରଶଂସା କରିଛନ୍ତି । ଏତେ କମ୍ ବୟସରେ ଅନ୍ୟମାନଙ୍କ ଦୁଃଖକୁ ବୁଝି ନିଜ ସଞ୍ଚୟ ଦାନ କରିବା ନିଶ୍ଚିତ ଭାବେ ଏକ ବଡ଼ ଉଦାହରଣ ବୋଲି ଲୋକେ କହିଛନ୍ତି ।

ସୂଚନା ଅନୁସାରେ, ଅଗଷ୍ଟ ୨୬ରେ ଚୀନ୍-ନେପାଳ ସୀମା ନିକଟରେ ଆସିଥିବା ବିନାଶକାରୀ ବନ୍ୟାରେ ନେପାଳ ସମେତ ଆଖପାଖ ଅଞ୍ଚଳରେ ବ୍ୟାପକ କ୍ଷୟକ୍ଷତି ହୋଇଥିଲା । ବନ୍ୟାରେ ରାସ୍ତା, ବ୍ରିଜ୍ ଓ ବିଦ୍ୟୁତ ପ୍ରକଳ୍ପଗୁଡ଼ିକ ପ୍ରଭାବିତ ହୋଇଥିବା ବେଳେ ଦୂରଦୂରାନ୍ତ ଅଞ୍ଚଳରେ ଏବେ ମଧ୍ୟ ରିଲିଫ୍ ଓ ଉଦ୍ଧାର କାର୍ଯ୍ୟ ଜାରି ରହିଛି । ଏଭଳି ବିପଦ ସମୟରେ ଅଲ୍‌ଫାଜଙ୍କ ଛୋଟ ହାତର ବଡ଼ ସହଯୋଗ ମାନବିକତାର ଏକ ଉଜ୍ଜ୍ୱଳ ଉଦାହରଣ ପାଲଟିଛି ।