ହୋଲିରେ ଡିଜେ ବଜାଇଲେ ତ୍ରାହି ନାହିଁ। ଲାଉଡସ୍ପିକରକୁ ନେଇ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ବଡ଼ ବୟାନ । ହୋଲିରେ ଶବ୍ଦ ପ୍ରଦୂଷଣ କରୁଥିବା ଡିଜେ ଉପରେ କଟକଣା ଲଗାଇବାକୁ ଦେଇଛନ୍ତି ନିର୍ଦ୍ଦେଶ । ସୁରକ୍ଷାକୁ ଗୁରୁତ୍ବ ଦେଇ ଅଧିକାରୀମାନଙ୍କୁ ବ୍ୟାଙ୍କ, ଆର୍ଥିକ ଅନୁଷ୍ଠାନ, ଦୋକାନ ଏବଂ ବ୍ୟବସାୟିକ ସଂସ୍ଥା ଗୁଡିକରେ ସିସିଟିଭ ଲଗାଇବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି । ହୋଲିରେ ସୁରକ୍ଷାକୁ ଗୁରୁତ୍ବ ଦେଇ ଭିଡ଼ ନିୟନ୍ତ୍ରଣ ସହ ପୋଲିସ କର୍ମୀ ସାଧାରଣ ଲୋକଙ୍କ ସହ ଉତ୍ତମ ବ୍ୟବହାର ପାଇଁ ମଧ୍ୟ ନିର୍ଦ୍ଦେଶ ଦେଇଛନ୍ତି ।

ଅନ୍ୟପଟେ ଗୋରଖପୁରରେ ହୋଲିକା ଦହନ କାର୍ଯ୍ୟକ୍ରମରେ ସାମିଲ୍ ହୋଇଛନ୍ତି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ହୋଲି କା ଦହନ ଉତ୍ସବ ସମିତି ଗୋରଖପୁର ଦ୍ବାରା ଆୟୋଜିତ ଭକ୍ତ ପ୍ରହ୍ଲାଦ ଭବ୍ୟ ଶୋଭାଯାତ୍ରାରେ ସାମିଲ୍ ହୋଇଥିଲେ । ଏହି ଅବସରରେ ଶ୍ରଦ୍ଧାଳୁଙ୍କ ଉପରକୁ ପୁଷ୍ପ ବର୍ଷା କରିଥିଲେ ଯୋଗୀ । ଦଶନ୍ଧି ଦଶନ୍ଧି ଧରି ଚାଲି ଆସିଥିବା ପାଣ୍ଡେହତାରେ ହୋଲିକା ଦହନ କାର୍ଯ୍ୟକ୍ରମର ଏହି ପରମ୍ପରା ଆମ ସଂସ୍କୃତିର ଏକ ଅଂଶବିଶେଷ । ଏହି ଉତ୍ସବରେ ସାମିଲ୍ ହୋଇ ନିଜକୁ ଗୌରବାନ୍ବିତ ଅନୁଭବ କରୁଛି ବୋଲି କହିଛନ୍ତି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ଏହି ଅବସରରେ ସମସ୍ତଙ୍କୁ ହୋଲିର ଶୁଭେଚ୍ଛା ଜଣାଇଛନ୍ତି ମୁଖ୍ୟମନ୍ତ୍ରୀ ଯୋଗୀ ।

ପରିବେଶ ସୁରକ୍ଷା ପାଇଁ ଉଦ୍ୟୋଗ ଏବଂ ଜନସଚେତନତାର ସମନ୍ବୟରେ ଉତ୍ତମ ପରିଣାମ ହାସଲ ହୋଇପାରିବ । ଗୋରଖପୁରରେ ଜାତୀୟ ସ୍ବଚ୍ଛ ବାୟୁ କାର୍ଯ୍ୟକ୍ରମରେ ଏହା କହିଛନ୍ତି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ୨୦୭୦ ସୁଦ୍ଧା ଭାରତ ନେଟ୍ ଜିରୋ ହାସଲ ଲକ୍ଷ୍ୟ ରଖିଛି । ଏହାକୁ ହାସଲ କରିବାକୁ ହେଲେ ଜାତୀୟ ସ୍ତରରେ ଏବଂ ଆଂଚଳିକ ସ୍ତରରେ ଏକାଧିକ କାର୍ଯ୍ୟକ୍ରମ ଆୟୋଜନ କରିବାକୁ ପଡିବ ।

ପ୍ରକୃତି ସହ ଖେଳିବା କେତେ ମହଙ୍ଗା ତାହା ଲୋକେ କୋରୋନା କାଳରେ ଦେଖିଛନ୍ତି ବୋଲି କହିଛନ୍ତି ମୁଖ୍ୟମନ୍ତ୍ରୀ ଯୋଗୀ । ଏଥିପାଇଁ ବିଗତ ୮ ବର୍ଷରେ ଉତ୍ତରପ୍ରଦେଶ ସରକାର ୨୧୦ କୋଟି ବୃକ୍ଷ ରୋପଣ କରିସାରିଛନ୍ତି । ରାଜ୍ୟ ସରକାରଙ୍କ ଦ୍ବାରା ହୋଇଥିବା ବୃକ୍ଷରୋପଣର ୭୦-୭୫ ପ୍ରତିଶତ ଗଛ ବଞ୍ଚିଛି । ଏଥିସହ ଲୋକଙ୍କୁ ସ୍ବଚ୍ଛ ଇନ୍ଧନ ବ୍ୟବହାର କରିବାକୁ ଅପିଲ୍ କରିଛନ୍ତି ମୁଖ୍ୟମନ୍ତ୍ରୀ ଯୋଗୀ ।