ରାହୁଲଙ୍କ ସହ କରୁଥିଲେ ପଦଯାତ୍ରା, ବଡ଼ ନେତାଙ୍କ ପାଇଁ କରୁଥିଲେ ପ୍ରଚାର
ସୁଟ୍କେସ୍ରୁ ବାହାରିଲା କଂଗ୍ରେସ ନେତ୍ରୀଙ୍କ ମୃତଦେହ । ଦିନେ ଯିଏ ରାହୁଲଙ୍କ ସହ କରୁଥିଲେ ପଦଯାତ୍ରା, ଏବେ ସୁଟ୍କେସ୍ରୁ ବାହାରିଛି ତାଙ୍କ ମୃତଦେହ । ହରିୟାଣାର ରୋହତକରୁ ଏହି ଘଟଣା ସାମ୍ନାକୁ ଆସିଛି । ସୁଟକେସ୍ରୁ ମିଳିଥିବା ମରଶରୀର କଂଗ୍ରେସ ନେତ୍ରୀ ହିମାନୀ ନରୱାଲଙ୍କର ବୋଲି ପୋଲିସ ସ୍ପଷ୍ଟ କରିଛି । ଏହି ଘଟଣାକୁ ନେଇ ରୋହତକର କଂଗ୍ରେସ ବିଧାୟକ ବିବି ବାତ୍ରା ରାଜ୍ୟର ଆଇନଶୃଙ୍ଖଳାକୁ ନେଇ ପ୍ରଶ୍ନ ଉଠାଇଥିବା ସହ ଏହି ହତ୍ୟାକାଣ୍ଡର ଏସଆଇଟି ତଦନ୍ତ ଦାବି କରିଛନ୍ତି।
ଘଟଣାଟି ଶନିବାର ସକାଳ ପ୍ରାୟ ୧୧ଟା ବେଳର । ସବୁଦିନ ଭଳି ରୋହତକ ସାମ୍ପଲା ବସଷ୍ଟାଣ୍ଡରେ ଲୋକଙ୍କ ଗହଳି ଚହଳି ଲାଗିଥାଏ । ଏତିକି ବେଳେ କାହାର ନଜର ପଡିଲା ଏକ ନୀଳ ରଙ୍ଗର ବଡ଼ ସୁଟ୍କେଶ ଉପରେ । ସୁଟ୍କେଶ ଭିତରେ କ'ଣ ଅଛି ଜାଣିବାକୁ ଲୋକଙ୍କ ମନରେ କୌତୁହଳ ସୃଷ୍ଟି ହେଲା । ହେଲେ ସନ୍ଦେହବଶତଃ ପୋଲିସକୁ ଖବର ଦିଆଯିବାପରେ ପୋଲିସ ଆସି ସୁଟ୍କେଶ ଖୋଲିଥିଲା । ଆଉ ତା' ଭିତରେ ଯାହା ଦେଖିଲେ, ସମସ୍ତଙ୍କ ହୋସ୍ ଉଡିଗଲା । ସୁଟ୍କେଶ ଭିତରେ ଥିଲା ଜଣେ ଯୁବତୀଙ୍କ ମୃତଦେହ ।
ହାତରେ ମେହେନ୍ଦୀ, ବେକରେ କଳା ରଙ୍ଗର ଓଢଣୀ । ଯୁବତୀଙ୍କୁ ଦେଖି ଏମିତି ଲାଗୁଥିଲା କେହି ଯେପରି ତାଙ୍କର ଗଳା ଚିପି ହତ୍ୟା କରିବା ପରେ ମୃତଦେହକୁ ସୁଟ୍କେଶରେ ଭର୍ତ୍ତି କରି ଫିଙ୍ଗି ଦେଇଛି । ତନଘନା ପରେ ଜଣାପଡିଲା ମୃତ ଯୁବତୀ କଂଗ୍ରେସ କର୍ମୀ ହିମାନୀ ନରୱାଲ । ତାଙ୍କ ଘର ରୋହତାକ ସହରର ବିଜୟ ନଗରରେ । ଯୁବତୀଙ୍କ ମୃତଦେହ ସମ୍ପର୍କରେ ରୋହତକର କଂଗ୍ରେସ ବିଧାୟକ ଭାରତ ଭୂଷଣ ବାତ୍ରା କହିଛନ୍ତି ଯେ ସେ ଜଣେ ସକ୍ରିୟ କଂଗ୍ରେସ କର୍ମୀ ଥିଲେ।
ତେବେ କିପରି ହିମାନୀଙ୍କ ମୃତ୍ୟୁ ହେଲା ତାହା ଜଣାପଡିନି । ଏହା ଏକ ହତ୍ୟାକାଣ୍ଡ ବୋଲି ପୋଲିସ ସନ୍ଦେହ କରୁଛି ଏବଂ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ଏହି ଘଟଣାରେ କଂଗ୍ରେସ ପକ୍ଷରୁ ଶୋକ ପ୍ରକାଶ କରାଯିବା ସହ ନିରପେକ୍ଷ ତଦନ୍ତ କରାଯାଇ ଦୋଷୀକୁ କଡା ଦଣ୍ଡ ଦେବାକୁ ଦାବି ହୋଇଛି । ତୁରନ୍ତ ଯୁବତୀଙ୍କ ହତ୍ୟାକାଣ୍ଡର ତଦନ୍ତ ପାଇଁ ଏସଆଇଟି ଗଠନ କରିବାକୁ ଭାରତ ଭୂଷଣ ବାତ୍ରା ଦାବି କରିଛନ୍ତି।
ରାହୁଲ ଗାନ୍ଧିଙ୍କ ସହ ଭାରତ ଯୋଡୋ ଯାତ୍ରା ସମୟରେ ହିମାନୀ ହରିୟାଣବୀ ପୋଷାକ ପିନ୍ଧିଥିବାର ନଜର ଆସିଥିଲେ । ସେ ସୋସିଆଲ ମିଡିଆରେ ରାହୁଲ ଗାନ୍ଧିଙ୍କ ସହ ଏକ ଫଟୋ ମଧ୍ୟ ସେୟାର କରିଥିଲେ । ହରିୟାଣା ବିଧାନସଭା ନିର୍ବାଚନ ସମୟରେ ହିମାନୀ ରୋହତକରେ ଦୀପେନ୍ଦ୍ର ହୁଡା ଓ ଭୁପେନ୍ଦ୍ର ହୁଡାଙ୍କ ପାଇଁ ପ୍ରଚାର କରିଥିଲେ।
