ବର୍ତ୍ତମାନ ସମୟରେ ଲୋକ ଚାକିରୀ ଏବଂ ରୋଜଗାର ସହିତ ପରିବାରକୁ ଟାଇମ ଦେବାକୁ ଚାହୁଁଛନ୍ତି । କିନ୍ତୁ କର୍ପୋରେଟ ଚାକିରୀରେ ଏପରି କରିବା ଅସମ୍ଭବ । କେତେବେଳେ ଛୁଟି ପାଇବା କଷ୍ଟକର, ଆଉ କେତେବେଳେ ଅଫିସ୍ ସମୟ ପରେ ମଧ୍ୟ କାମ ଶେଷ ହୁଏ ନାହିଁ। ସେମିତି ଏକ କାହାଣୀ ହେଉଛି ବେଙ୍ଗାଲୁରୁର ଦୀପେଶଙ୍କର। ଶେଷରେ ଦିନେ ଏହି ଅଶାନ୍ତି ଓ ଅଫିସର ଚାପ ଭରା ଜୀବନରୁ ବିରକ୍ତ ହୋଇ ସେ ଚାକିରି ଛାଡିବାକୁ ନେଇଥିଲେ ବାଧ୍ୟ ହେଲେ ।

ଦୀପେଶଙ୍କର କର୍ପୋରେଟ ସେକ୍ଟରରେ କରୁଥିଲେ ଚାକିରୀ । ମାସକୁ ଦରମା ଥିଲା ୪୦ ହଜାର । କିନ୍ତୁ ଏହି ଚାକଚକ୍ୟ ଭରା ଚାକିରୀ ତାଙ୍କୁ ଶାନ୍ତି ଦେଇ ପାରୁନଥିଲା । ସେ ଚାକିରୀ ଛାଡିଦେଇଥିଲେ । ଆଉ ପାଲଟିଥିଲେ କ୍ୟାବ୍‌ ଡ୍ରାଇଭର । ଏହି ବ୍ୟକ୍ତି ଜଣକ ହେଉଛନ୍ତି ବେଙ୍ଗାଲୁରୁର ବାସିନ୍ଦା । ତାଙ୍କ କାହାଣୀ ଏବେ ସୋସିଆଲ ମିଡିଆରେ ହେଉଛି ଭାଇରାଲ । ବାସ୍ତବରେ ଦୀପେଶ ତାଙ୍କ ଅତ୍ୟଧିକ କାମ କାରଣରୁ ସେ ସ୍ତ୍ରୀ ଏବଂ ପିଲାମାନଙ୍କୁ ଅଧିକ ସମୟ ଦେଇପାରୁନଥିଲେ । ତାଙ୍କ ପାଇଁ ଓ୍ବାର୍କ-ଲାଇଫ ବାଲାନ୍ସ କରିବା କଷ୍ଟକର ହୋଇପଡିଥିଲା । ଏଥିପାଇଁ ସେ ଚାକିରି ଛାଡି ଦେଲେ ଏବଂ କ୍ୟାବ୍ ଚଲାଇବା ଆରମ୍ଭ କଲେ।

ଦୀପେଶ ବେଙ୍ଗାଲୁରୁରେ ଏକ କମ୍ପାନୀରେ କାମ କରୁଥିଲେ । ସେ ଅଭିଯୋଗ କରିଛନ୍ତି ଯେ ସେ ଅଫିସ୍ ସମୟ ପରେ ମଧ୍ୟ ସବୁବେଳେ କାମରେ ବ୍ୟସ୍ତ ରହୁଥିଲେ । ଏମିତିକି ତାଙ୍କ ସ୍ତ୍ରୀ ଏବଂ ପିଲାମାନଙ୍କ ପାଇଁ ସମୟ ଦେବା କଷ୍ଟକର ହୋଇପଡୁଥିଲା। ସେ ସେହି କମ୍ପାନୀରେ ୮ ବର୍ଷ କାମ କରିଥିଲେ । ଏତେ ପରେ ବି ତାଙ୍କର ଦରମା ୪୦ ହଜାର ଟଙ୍କାରେ ପହଞ୍ଚିଥିଲା। ତେଣୁ ସେ ଚାକିରି ଛାଡି ଏକ ଫୁଲ ଟାଇମ୍‌ ଡ୍ରାଇଭର ହେବାକୁ ନିଷ୍ପତ୍ତି ନେଇଥିଲେ । ବର୍ତ୍ତମାନ ସେ ଅଧିକ ରୋଜଗାର କରୁଛନ୍ତି । ଏମିତିକି ତାଙ୍କ ପରିବାର ପାଇଁ ସମୟ ଦେଇପାରୁଛନ୍ତି ।

ଦୀପେଶ ମାସକୁ କେବଳ ୨୧ ଦିନ କାମ କରନ୍ତି । ସେ ନିଜର ଛୁଟି ଦିନ ମଧ୍ୟ ନିର୍ଦ୍ଦିଷ୍ଟ କରିଛନ୍ତି । ଏବେ ତାଙ୍କ ପାଖରେ ପରିବାର ସହିତ ବିତାଇବା ପାଇଁ ବାକି ସମୟ ଅଛି । ଯାହା ପୂର୍ବରୁ ସମ୍ଭବ ନଥିଲା । କ୍ୟାବ୍ ଚଲାଇ ମାସକୁ ପ୍ରାୟ ୫୬ ହଜାର ଟଙ୍କା ରୋଜଗାର କରୁଛନ୍ତି । ସେ ଏହି ଆୟରୁ ଭଲ ପରିମାଣର ସଞ୍ଚୟ ମଧ୍ୟ କରୁଛନ୍ତି । ଏହି ଆୟ ସହିତ ସେ ଆଉ ଏକ କାର କିଣିଛନ୍ତି ଏବଂ ଏହାକୁ ଚଲାଇବା ପାଇଁ ଜଣେ ଡ୍ରାଇଭରଙ୍କୁ ନିଯୁକ୍ତି ଦେଇଛନ୍ତି । ବର୍ତ୍ତମାନ ଦୀପେଶ ଆଗକୁ ବଢିବାକୁ ଚେଷ୍ଟା କରୁଛନ୍ତି । ଦୀପେଶଙ୍କ କାହାଣୀ ପ୍ରତ୍ୟେକ ବ୍ୟକ୍ତିଙ୍କ ପାଇଁ ବର୍ତ୍ତମାନ ସମୟରେ ପ୍ରେରଣା ପାଲଟିଛି ।