COVID Variant / ନୂଆ କୋଭିଡ୍ ଭାରିଆଣ୍ଟ PJ.2.1କୁ ନେଇ WHOର ସତର୍କତା, ଜାଣନ୍ତୁ ଲକ୍ଷଣ ଓ କେଉଁମାନେ ରହିବେ ସାବଧାନ

ଗତ କିଛି ବର୍ଷ ମଧ୍ୟରେ କରୋନା ଭାଇରସ୍‌ର ଅନେକ ନୂଆ ଭାରିଆଣ୍ଟ ସାମ୍ନାକୁ ଆସିଛି । ଏବେ ଏହି କ୍ରମରେ କୋଭିଡ୍‌ର ନୂଆ ଭାରିଆଣ୍ଟ PJ.2.1କୁ ନେଇ ଚର୍ଚ୍ଚା ଜୋର ଧରିଛି । ଏହାକୁ ନେଇ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଗୁରୁତ୍ୱପୂର୍ଣ୍ଣ ସୂଚନା ଦେଇଛି । WHO ଅନୁସାରେ, ବର୍ତ୍ତମାନ କେବଳ ଲକ୍ଷଣ ଦେଖି ଜଣେ ବ୍ୟକ୍ତିଙ୍କୁ କୋଭିଡ୍‌ ହୋଇଛି ନା ଫ୍ଲୁ କିମ୍ବା ଅନ୍ୟ କୌଣସି ଭାଇରାଲ୍‌ ସଂକ୍ରମଣ ହୋଇଛି, ତାହା ଜାଣିବା କଷ୍ଟକର । ତେଣୁ ଆବଶ୍ୟକ ସ୍ଥଳେ ଡାକ୍ତରଙ୍କ ପରାମର୍ଶ ନେଇ ପରୀକ୍ଷା କରାଇବା ଜରୁରୀ ।

କୋଭିଡ୍‌-୧୯, ଇନ୍‌ଫ୍ଲୁଏଞ୍ଜା ଏବଂ ଅନ୍ୟ ଶ୍ୱାସଜନିତ ସଂକ୍ରମଣର ଲକ୍ଷଣ ପ୍ରାୟ ସମାନ ହୋଇପାରେ । ଏଥିପାଇଁ କେବଳ ରୋଗୀଙ୍କ ଲକ୍ଷଣ ଆଧାରରେ ସଂକ୍ରମଣର ପ୍ରକୃତ କାରଣ ଜାଣିବା ସମ୍ଭବ ନୁହେଁ। WHOର ବିଶେଷଜ୍ଞମାନେ ମଧ୍ୟ ଏହି ଦିଗ ଉପରେ ଗୁରୁତ୍ୱ ଦେଇଛନ୍ତି ।

ଡିସେମ୍ବରରେ ହେବ ନୂଆ ଭାରିଆଣ୍ଟର ସମୀକ୍ଷା
WHO ଅନୁସାରେ, କୋଭିଡ୍‌-୧୯ ଟିକାର ଗଠନ ସମ୍ପର୍କିତ ବୈଷୟିକ ପରାମର୍ଶଦାତା ଗୋଷ୍ଠୀ (TAG-CO-VAC) ଆସନ୍ତା ଡିସେମ୍ବରରେ PJ.2.1, ST.1 ଏବଂ SW.2.1 ଭାରିଆଣ୍ଟ ସମ୍ପର୍କିତ ଉପଲବ୍ଧ ତଥ୍ୟର ସମୀକ୍ଷା କରିବ । ଏହି ସମୟରେ ବିଶେଷଜ୍ଞମାନେ ଭାଇରସ୍‌ର ଜେନେଟିକ୍‌ ପରିବର୍ତ୍ତନ, ସଂକ୍ରମଣର ପ୍ରସାର, ଆଣ୍ଟିଜେନିକ୍‌ ଗୁଣ ଏବଂ ମଣିଷର ରୋଗ ପ୍ରତିରୋଧକ କ୍ଷମତା ଉପରେ ଏହାର ପ୍ରଭାବ ଅନୁଧ୍ୟାନ କରିବେ । ଏହା ସହିତ ବର୍ତ୍ତମାନ ଉପଲବ୍ଧ କୋଭିଡ୍‌ ଟିକା ଏହି ନୂଆ ଭାରିଆଣ୍ଟ ବିରୋଧରେ କେତେ ପ୍ରଭାବଶାଳୀ, ତାହା ମଧ୍ୟ ଆକଳନ କରାଯିବ ।

ଏହା ପୂର୍ବରୁ WHOର ରୁଷିଆ କାର୍ଯ୍ୟାଳୟ ନୂଆ କରୋନା ଭାରିଆଣ୍ଟ PJ.2.1 ବିଶ୍ୱସ୍ତରରେ ବ୍ୟାପିବାର ଆଶଙ୍କା ନେଇ ସତର୍କ କରିଥିଲା । ସଂଗଠନ ପକ୍ଷରୁ ଏହି ଭାରିଆଣ୍ଟର କାର୍ଯ୍ୟକଳାପ ଏବଂ ସଂକ୍ରମଣର ପ୍ରସାର ଉପରେ ନଜର ରଖାଯାଉଛି । ପରିବର୍ତ୍ତିତ ଭାଇରସ୍‌ ଅନୁସାରେ କୋଭିଡ୍‌ ଟିକାକୁ ଅପଡେଟ୍‌ କରିବା ନେଇ WHOର ବୈଷୟିକ ପରାମର୍ଶଦାତା ଗୋଷ୍ଠୀ ସମୟ ସମୟରେ ସମୀକ୍ଷା କରିଥାଏ ।

କ’ଣ ଏହି ନୂଆ କୋଭିଡ୍‌ ଭାରିଆଣ୍ଟ PJ.2.1 ?
PJ.2.1 ହେଉଛି କୋଭିଡ୍‌ ଭାଇରସ୍‌ର ଏକ ନୂଆ ଭାରିଆଣ୍ଟ। ଚଳିତ ବର୍ଷ ଜୁନ୍‌ ମାସରେ ଆମେରିକାରେ ଏହି ଭାରିଆଣ୍ଟର ସଂକ୍ରମଣ ମାମଲା ସାମ୍ନାକୁ ଆସିଥିଲା । ଏବେ ଏହାକୁ ନେଇ WHO ପକ୍ଷରୁ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି ।

ଏହି ଭାରିଆଣ୍ଟରେ ସଂକ୍ରମିତ କିଛି ରୋଗୀଙ୍କଠାରେ ଗଳାରେ ଅଧିକ ଯନ୍ତ୍ରଣା ଏବଂ ସୁସ୍ଥ ହେବା ପରେ ମଧ୍ୟ ଦୀର୍ଘ ସମୟ ଧରି ଥକ୍କାପଣ ରହୁଥିବା ନେଇ ସୂଚନା ମିଳିଛି । ରୁଷିଆର ସଂକ୍ରାମକ ରୋଗ ବିଶେଷଜ୍ଞ ତଥା ଭାଇରୋଲୋଜିଷ୍ଟ ଏଲେନା ମାଲିନିକୋଭା ଏହି ଲକ୍ଷଣଗୁଡ଼ିକ ବିଷୟରେ ଉଲ୍ଲେଖ କରିଛନ୍ତି । ତେବେ ଏହି ଲକ୍ଷଣ ସମସ୍ତ ରୋଗୀଙ୍କଠାରେ ଦେଖାଯିବ ବୋଲି କୌଣସି ନିଶ୍ଚିତ ପ୍ରମାଣ ନାହିଁ । WHOର ସୂଚନା ଅନୁସାରେ, ଏହି ଭାରିଆଣ୍ଟକୁ ନେଇ ବର୍ତ୍ତମାନ ବିଶେଷ ଚିନ୍ତାର କାରଣ ନାହିଁ । ଏହାର ଅଧିକାଂଶ ଲକ୍ଷଣ ଫ୍ଲୁ ଭଳି ହୋଇଥାଏ ।

PJ.2.1 ଭାରିଆଣ୍ଟର ଲକ୍ଷଣ କ’ଣ ?
ଏହି ଭାରିଆଣ୍ଟରେ ସଂକ୍ରମଣ ହେଲେ ନିମ୍ନଲିଖିତ ଲକ୍ଷଣ ଦେଖାଦେଇପାରେ।
- ଜ୍ୱର ହେବା, ଗଳାରେ ଯନ୍ତ୍ରଣା ବା ଖରାପ ଲାଗିବା, କାଶ ହେବା, ନାକରୁ ପାଣି ବୋହିବା କିମ୍ବା ନାକ ବନ୍ଦ ହେବା, ମୁଣ୍ଡବିନ୍ଧା ଓ ଶରୀରରେ ଯନ୍ତ୍ରଣା, ଅଧିକ ଥକ୍କାପଣ ଅନୁଭବ ହେବା, ଏହି ଲୋକମାନେ ରୁହନ୍ତୁ ଅଧିକ ସତର୍କ, ବୟସ୍କ ବ୍ୟକ୍ତି, ଦୁର୍ବଳ ରୋଗ ପ୍ରତିରୋଧକ କ୍ଷମତା ଥିବା ଲୋକ ଏବଂ ପୂର୍ବରୁ ଗୁରୁତର ରୋଗରେ ପୀଡ଼ିତ ଥିବା ବ୍ୟକ୍ତିମାନେ ଶ୍ୱାସଜନିତ ସଂକ୍ରମଣର ଲକ୍ଷଣକୁ ଅଣଦେଖା କରିବା ଉଚିତ୍‌ ନୁହେଁ ।

ଜ୍ୱର, ଲଗାତାର କାଶ କିମ୍ବା ଗଳାରେ ଯନ୍ତ୍ରଣା ହେଲେ ଡାକ୍ତରଙ୍କ ପରାମର୍ଶ ନିଅନ୍ତୁ । ଯଦି ନିଶ୍ୱାସ ନେବାରେ କଷ୍ଟ ହୁଏ କିମ୍ବା ଛାତିରେ ଲଗାତାର ଯନ୍ତ୍ରଣା ହୁଏ, ତେବେ ବିଳମ୍ବ ନକରି ତୁରନ୍ତ ହସ୍ପିଟାଲ ଯାଆନ୍ତୁ । ମନେ ରଖନ୍ତୁ, କେବଳ ଲକ୍ଷଣ ଦେଖି କୋଭିଡ୍‌ ଓ ଫ୍ଲୁ ମଧ୍ୟରେ ଫରକ ଜାଣିବା ସମ୍ଭବ ନୁହେଁ । ତେଣୁ ଆବଶ୍ୟକ ହେଲେ ଡାକ୍ତରଙ୍କ ପରାମର୍ଶରେ ଉପଯୁକ୍ତ ପରୀକ୍ଷା କରାଇବା ହିଁ ସବୁଠାରୁ ଭଲ ଉପାୟ ।