ଉପରାଷ୍ଟ୍ରପତି ନିର୍ବାଚନରେ ସିପି ରାଧାକ୍ରିଷ୍ଣନଙ୍କ ବିପୁଳ ବିଜୟ ପରେ ଛୁଟୁଛି ଶୁଭେଚ୍ଛାର ସୁଅ । NDA ପ୍ରାର୍ଥୀଙ୍କୁ ମିଳିଛି ୪୫୨ ସାଂସଦଙ୍କ ସମର୍ଥନ । ରାହୁଲଙ୍କ ଭୋଟ ଚୋରି ଅଭିଯୋଗ ଓ ଘୃଣ୍ୟ ରାଜନୀତିର କଡ଼ା ଜବାବ ଦେଇଛନ୍ତି ବିଭିନ୍ନ ଦଳର ସାଂସଦ । ବିଜେପି କହିଲା- ମୋଦି ସରକାରଙ୍କ ପଦକ୍ଷେପକୁ ମିଳୁଛି ସାଂସଦଙ୍କ ସମର୍ଥନ । ସିପି ରାଧାକ୍ରିଷ୍ଣନଙ୍କୁ ଆଶାଠାରୁ ୨୫ଟି ଅଧିକ ଭୋଟ ମିଳିଲା । ରାହୁଲଙ୍କୁ ଶିକ୍ଷା ଦେବାକୁ କ୍ରସ ଭୋଟିଂ କଲେ ବିରୋଧୀ ।

ସିପି ରାଧାକ୍ରିଷ୍ଣନଙ୍କୁ ୪୫୨ ସାଂସଦଙ୍କ ସମର୍ଥନ ମିଳିଥିବା ବେଳେ ଇଣ୍ଡିମେଣ୍ଟ ପ୍ରାର୍ଥୀ ଜଷ୍ଟିସ ବି. ସୁଦର୍ଶନ ରେଡ୍ଡିଙ୍କ ସପକ୍ଷରେ ଥିଲା ମାତ୍ର ୩ଶହ ସାଂସଦଙ୍କ ଭୋଟ୍ । ନିର୍ବାଚନରେ ମୋଟ ୭୬୭ ଜଣ ସାଂସଦ ମତଦାନ କରିଥିବାବେଳେ ୧୫ଟି ଭୋଟ ଅମାନ୍ୟ ହୋଇଛି । ମୋଟ ୯୮.୨୦ ପ୍ରତିଶତ ମତଦାନ ହୋଇଥିଲା । ଗୁରୁତ୍ୱପୂର୍ଣ୍ଣ କଥା ହେଉଛି ରାଧକ୍ରିଷ୍ଣନଙ୍କୁ ଆଶାଠାରୁ ୨୫ଟି ଅଧିକ ଭୋଟ ମିଳିଛି । ତାଙ୍କୁ ଏନଡିଏ ସାଂସଦଙ୍କ ସହ କିଛି ବିରୋଧୀ ସାଂସଦଙ୍କ ମଧ୍ୟ ସମର୍ଥନ ମିଳିଛି । ଉପରାଷ୍ଟ୍ରପତି ନିର୍ବାଚନରେ ଦଳୀୟ ହ୍ବିପ୍ ନଥିବାରୁ ସାଂସଦମାନେ ବିବେକାନୁମୋଦିତ ଭୋଟ୍ ଦେଇଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିଭିନ୍ନ ଲୋକପ୍ରିୟ କାର୍ଯ୍ୟକ୍ରମକୁ ଜନତାଙ୍କ ସମର୍ଥନ ମିଳୁଥିବା ବେଳେ ସାଂସଦମାନେ ମଧ୍ୟ ଏଥିରେ ସାମିଲ ହୋଇଛନ୍ତି ।

ବିରୋଧୀ ଦଳ ନେତା ରାହୁଲ ଗାନ୍ଧି ବିଭିନ୍ନ ଫୋରମରେ ଭୋଟ ଚୋରି ଅଭିଯୋଗ ଉଠାଉଛନ୍ତି । ଉପରାଷ୍ଟ୍ରପତି ନିର୍ବାଚନରେ ସିପି ରାଧାକ୍ରିଷ୍ଣନଙ୍କ ବିପୁଳ ବିଜୟକୁ ନେଇ ରାହୁଲ ଭୋଟ ଚୋରି ଅଭିଯୋଗ ଆଣିବେ କି ବୋଲି ତାତ୍ସଲ୍ୟ କରିଛନ୍ତି ଏନଡିଏ ସାଂସଦ ।

ତେବେ ପ୍ରଶ୍ନ ହେଲା NDA ଖାତାରେ ଏହି ଅଧିକ ଭୋଟ୍ ଆସିଲା କେଉଁଠୁ ? କାହିଁକି କମିଲା ରାହୁଲଙ୍କ ଭୋଟ୍ ? କିଏ କଲେ କ୍ରସ୍ ଭୋଟିଂ । ଏନଡିଏର ଲୋକସଭାରେ ୨୯୩, ରାଜ୍ୟସଭାରେ ୧୩୪ ଜଣଙ୍କ ସହ ମୋଟ୍ ୪୨୭ଜଣଙ୍କ ସମର୍ଥନ ରହିଥିଲା । କିନ୍ତୁ ସିପି ରାଧାକ୍ରିଷ୍ଣନଙ୍କୁ ୪୫୨ ଭୋଟ ମିଳିଛି । ଅର୍ଥାତ୍ ୨୫ ବିରୋଧୀ ସାଂସଦଙ୍କ ସମର୍ଥନ ତାଙ୍କୁ ମିଳିଛି । ସେହିପିର ଇଣ୍ଡି ମେଣ୍ଟର ଲୋକସଭାରେ ୨୩୪, ରାଜ୍ୟସଭାରେ ୯୧ ଜଣଙ୍କ ସହ ମୋଟ୍ ୩୧୫ ସାଂସଦ ଥିଲେ । କିନ୍ତୁ ଇଣ୍ଡି ମେଣ୍ଟ ପ୍ରାର୍ଥୀ ବି. ସୁଦର୍ଶନ ରେଡ୍ଡିଙ୍କୁ ମିଳିଲା ୩୦୦ଭୋଟ୍ । ରାହୁଲ ଗାନ୍ଧିଙ୍କ ଘୃଣା ରାଜନୀତିକୁ ତାଙ୍କ ଦଳର ସାଂସଦମାନେ ଗ୍ରହଣ କରିନଥିବା କହିଛନ୍ତି ବିଜେପିର ରାଷ୍ଟ୍ରୀୟ ମୁଖପାତ୍ର ।

ଗତକାଲି ସି.ପି. ରାଧାକ୍ରିଷ୍ଣନ ବିପୁଳ ଭୋଟରେ ବିଜୟୀ ହେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ଅନେକ କେନ୍ଦ୍ରମନ୍ତ୍ରୀ ତାଙ୍କୁ ଜଣାଇଥିଲେ ଶୁଭେଚ୍ଛା ।

Argus News | argus news | Odisha Latest News, Breaking News, Trending News, Live TV