ଦେଶରେ ଥିବା ଜନଔଷଧୀ ଆଉଟଲେଟ ଗତ 11ବର୍ଷରେ ଜନସାଧାରଣଙ୍କର 38 ହଜାର କୋଟି ବଂଚିତ କରିଛି । ରାଜ୍ୟସଭାକୁ ଲିଖିତ ଉତ୍ତର ରଖି ଏହା କହିଛନ୍ତି ସାର ଓ ରସାୟନ କେନ୍ଦ୍ର ରାଷ୍ଟ୍ର ମନ୍ତ୍ରୀ ଅନୁପ୍ରିୟା ପଟେଲ । ସେ କହିଛନ୍ତି ଜୁନ 30 , 2025 ସୁଦ୍ଧା ଭାରତରେ 16ହଜାର 912ଟି ଜନଔଷଧୀ କେନ୍ଦ୍ର କାର୍ଯ୍ୟ କରୁଛି । ଏସବୁ ଜନଔଷଧୀ କେନ୍ଦ୍ରରେ ଦାମିକିଆ ମେଡିସିନ ତୁଳନାରେ କମ ଦରରେ ଲୋକେ ମେଡିସିନ କିଣିବାରୁ 38 ହଜାର କୋଟି ଟଙ୍କା ସାରା ଦେଶରେ ଲୋକମାନଙ୍କର ବଂଚିତ ହୋଇଛି । ପରିବାର ପିଛା ଔଷଧ ପିଛା ଖର୍ଚ୍ଚ 2014-15ରେ 62.6 ପ୍ରତିଶତ ଥିବା ବେଳେ 2021-22 ବର୍ଷରେ ଏହା କମି 39.4 ପ୍ରତିଶତରେ ପହଂଚିଛି ।

ନ୍ୟାସନାଲ ହେଲଥ ଆକାଉଣ୍ଟ ଏଷ୍ଟିମେଟ ପକ୍ଷରୁ ଏହି ତଥ୍ୟ ମିଳିଛି । ମାର୍ଚ୍ଚ 2027 ସୁଦ୍ଧା କେନ୍ଦ୍ର ସରକାର 25 ହଜାର ଜନଔଷଧୀ ଆଉଟଲେଟ ଖୋଲିବା ପାଇଁ ଲକ୍ଷ୍ୟ ଧାର୍ଯ୍ୟ କରିଛନ୍ତି । ଏହି ଜନଔଷଧୀ କେନ୍ଦ୍ରରେ ବାହାରେ ମିଳୁଥିବା ଔଷଧ ତୁଳନାରେ 50ରୁ 80 ପ୍ରତିଶତ ଶସ୍ତାରେ ମେଡିସିନ ମିଳୁଛି । 2023-24ରେ 1470 କୋଟି ଟଙ୍କାର ମେଡିସିନ ଏମଆରପିରେ ବିକ୍ରି ହୋଇଥିବା ବେଳେ 2024-25ରେ 2ହଜାର 22. 47 କୋଟି ଟଙ୍କା ଏମଆରପିରେ ମେଡିସିନ ବିକ୍ରି ହୋଇଛି ।