ଭାରତରେ ଅନେକ ଏପରି ଏୟାରପୋର୍ଟ ଅଛି, ଯେଉଁଠି ଟେକଅଫ୍ ଓ ଲ୍ୟାଣ୍ଡିଂ ସମୟରେ ଅନେକ ବିପଦ ଥାଏ । ଏହିପରି ରନୱେରେ ଉଡ଼ାଣ ଭରିବା ଅଭିଜ୍ଞ ପାଇଲଟଙ୍କ ପାଇଁ ମଧ୍ୟ କଷ୍ଟକର ହୋଇଥାଏ । ସାମାନ୍ୟ ଅସାବଧାନତାରେ ବଡ଼ ଦୁର୍ଘଟଣାର ଆଶଙ୍କା ରହିଥାଏ । ନିକଟ ଅତୀତରେ ବିଶ୍ୱର ବିଭିନ୍ନ ସ୍ଥାନରେ ବିମାନ ଦୁର୍ଘଟଣାର ଖବର ଶୁଣିବାକୁ ମିଳୁଛି । ଲ୍ୟାଣ୍ଡିଂର କେଇ କ୍ଷଣ ପୂର୍ବରୁ ଯାନ୍ତ୍ରିକ ତ୍ରୁଟି ହେଉ କିମ୍ବା ଛୋଟମୋଟ ଅଘଟଣ ପାଇଁ ଶହ ଶହ ଲୋକଙ୍କ ଜୀବନ ଚାଲିଯାଉଛି । ତେବେ ଆସନ୍ତୁ ଜାଣିବା ଭାରତର କେଉଁ କେଉଁ ବିମାନବନ୍ଦର ବିପଦଜନକ, ଯେଉଁଠାରେ ଅଭିଜ୍ଞ ପାଇଲଟ ମଧ୍ୟ ଟେକଅଫ୍ ଓ ଲ୍ୟାଣ୍ଡିଂ ପାଇଁ ଭୟ କରନ୍ତି ।

ମିଜୋରାମ ସ୍ଥିତ ଲେଙ୍ଗପୁଇ ବିମାନବନ୍ଦରକୁ ଭାରତର ସବୁଠାରୁ ବିପଜ୍ଜନକ ବିମାନବନ୍ଦର ବୋଲି କୁହାଯାଏ । ଏଠାରେ ରନୱେ ତଳେ ଜଳର ସ୍ରୋତ କ୍ରମାଗତ ଭାବରେ ପ୍ରବାହିତ ହେଉଥାଏ, ବର୍ଷା ଋତୁରେ ସ୍ଥିତି ଅଧିକ ବିପଦପୂର୍ଣ୍ଣ ହୋଇଯାଏ । ଏଭଳି ପରିବେଶରେ ବିମାନ ଅବତରଣ କରାଇବା ପାଇଲଟଙ୍କ ପାଇଁ କୌଣସି ବଡ଼ ପରୀକ୍ଷାଠାରୁ କମ୍ ନୁହେଁ ।

ସେହିପରି ଜାମ୍ମୁ କାଶ୍ମୀର ଲେହ ସ୍ଥିତ ରିମ୍ପୋଚି ବିମାନବନ୍ଦର, ଯାହାର ଉଚ୍ଚତା ୩୨୫୯ ମିଟର.. ଏଠାରେ ବିମାନ ଟେକ୍ ଅଫ୍ ଏବଂ ଲ୍ୟାଣ୍ଡିଂ ଅତ୍ୟନ୍ତ ବିପଦପୂର୍ଣ୍ଣ ଅନୁଭୂତି ଅଟେ । ଅତ୍ୟଧିକ ଉଚ୍ଚତା ଏବଂ ପ୍ରତିକୂଳ ବାୟୁମଣ୍ଡଳୀୟ ଅବସ୍ଥା ହେତୁ ଏଠାରେ ବିମାନକୁ ନିୟନ୍ତ୍ରଣ କରିବା ଅତ୍ୟନ୍ତ କଷ୍ଟକର ହୋଇଯାଏ ।

ହିମାଚଳ ପ୍ରଦେଶର କାଙ୍ଗଡ଼ାର ଗଗଲ ବିମାନବନ୍ଦରକୁ ମଧ୍ୟ ବହୁତ ବିପଦପୂର୍ଣ୍ଣ ବୋଲି ବିବେଚନା କରାଯାଏ। ଏହାର ରନୱେ ୨୪୯୨ ଫୁଟ ଉଚ୍ଚତାରେ ଅବସ୍ଥିତ। ଏପରି ପରିସ୍ଥିତିରେ, ବିମାନ ଅବତରଣ କରିବା ସମୟରେ ପାଇଲଟଙ୍କୁ ବହୁତ ସତର୍କ ରହିବାକୁ ପଡ଼ିଥାଏ।

ମାଙ୍ଗଲୋର ଏୟାରପୋର୍ଟକୁ ଟେବୁଲଟପ ଏଆରପୋର୍ଟ କୁହାଯାଏ । ୨୦୧୦ରେ ଏହି ବିମାନବନ୍ଦର ଏକ ବଡ଼ ବିମାନ ଦୁର୍ଘଟଣାର ସମ୍ମୁଖୀନ ହୋଇଥିଲା। ଏଠାରେ ଏୟାର ଇଣ୍ଡିଆର ବିମାନଟି ରନୱେ ବାହାରକୁ ଚାଲି ଯାଇଥିଲା ଏବଂ ପାହାଡ଼ ତଳକୁ ଖସିପଡ଼ିବା ପରେ ସେଥିରେ ନିଆଁ ଲାଗିଯାଇଯାଇଥିଲା। ଏହି ରନୱେର ଆକାର ଓ ଆଖପାଖର ଭୂଭାଗ କାରଣରୁ ଟେକଅଫ ଓ ଲାଣ୍ଡିଂ ବିପଦଜନକ ।

ଏପରି ବିପଜ୍ଜନକ ରନୱେରେ ଉଡ଼ାଣ ଭରିବା ସମୟରେ ପାଇଲଟମାନଙ୍କୁ ସ୍ୱତନ୍ତ୍ର ତାଲିମ ନେବା ସହ ଅତ୍ୟାଧୁନିକ ବୈଷୟିକ ସହାୟତାର ଆବଶ୍ୟକତା ପଡ଼ିଥାଏ । ଏଥିପାଇଁ ଏହି ବିମାନବନ୍ଦର ଗୁଡ଼ିକର ସୁରକ୍ଷା ଦୃଷ୍ଟିରୁ ସିସିଟିଭି ନୀରିକ୍ଷଣ, କଡା ନିୟମ ଏବଂ ସ୍ୱତନ୍ତ୍ର ପରିଚାଳନା ପ୍ରଣାଳୀ ଗ୍ରହଣ କରାଯାଇଛି, ଯଦ୍ୱାରା ଅଘଟଣକୁ ରୋକାଯାଇ ପାରିବ ।