୭୫ ତମ ଜନ୍ମଦିନରେ ମଧ୍ୟପ୍ରଦେଶର ଧାରରୁ ବଡ଼ ବାର୍ତ୍ତା ଦେଇଛନ୍ତି ପ୍ରଧାନମନ୍ତ୍ରୀ ମୋଦି। କହିଛନ୍ତି, ଇଏ ନୂଆ ଭାରତ, ପରମାଣୁ ଧମକକୁ ଡରିବନି, ଘରେ ପଶି ମାରିଛୁ । ଅପରେସନ୍ ସିନ୍ଦୁରରେ ଭାରତୀୟ ସେନାର ବୀରତ୍ବର କାହାଣୀ ମନେପକାଇଲେ ପିଏମ । ଏହି ଅବସରରେ 'ସୁସ୍ଥ ନାରୀ ସଶକ୍ତ ପରିବାର' ଓ 'ଅଷ୍ଟମ ରାଷ୍ଟ୍ରୀୟ ପୋଷଣ ମାସ' ଅଭିଯାନର ଶୁଭାରମ୍ଭ କରିଛନ୍ତି ପ୍ରଧାନମନ୍ତ୍ରୀ ।

ଲକ୍ଷ୍ୟ ଆଉ ବେଶୀ ଦୂର ନୁହେଁ । ପୂରଣ ହେବ ବିକଶିତ ଭାରତ ସଂକଳ୍ପ । ୭୫ ତମ ଜନ୍ମଦିନରେ ମଧ୍ୟପ୍ରଦେଶର ଧାର ଜନସଭାରୁ ଦେଶବାସୀଙ୍କୁ ବିକଶିତ ଭାରତ ସଂକଳ୍ପ ପୂରଣ ପାଇଁ ଦେଇଛନ୍ତି ବଡ଼ ବାର୍ତ୍ତା । ଦେଶର ଗରୀବଙ୍କ ଉପରେ ଧ୍ୟାନ ଦେଲେ ଦେଶର ବିକାଶ ନିଶ୍ଚିତ । ୧୧ ବର୍ଷ ମଧ୍ୟରେ ଦେଶର ୨୫ କୋଟି ଜନତା ଗରିବୀ ସୀମାରେଖାରୁ ଉର୍ଦ୍ଧ୍ବକୁ ଉଠି ନୂଆ ଭାରତର ଶକ୍ତ ମୂଳଦୂଆ ପକାଇସାରିଛନ୍ତି । ମଧ୍ୟପ୍ରଦେଶର ଧାରରେ ସୁସ୍ଥ ନାରୀ ସଶକ୍ତ ପରିବାର ଓ ଅଷ୍ଟମ ରାଷ୍ଟ୍ରୀୟ ପୋଷଣ ମାସ’ ଅଭିଯାନର ଶୁଭାରମ୍ଭ କରି ସଶକ୍ତ ଭାରତ ପ୍ରତି ସରକାରଙ୍କ ପ୍ରତିବଦ୍ଧତାକୁ ସୁଦୃଢ଼ କରିଛନ୍ତି ପ୍ରଧାନମନ୍ତ୍ରୀ ମୋଦି ।

ବିକଶିତ ଭାରତର ନକ୍‌ସା ଆତ୍ମନିର୍ଭର ଭାରତ ଦେଇ ଯିବ । ନୂଆ ଭାରତରେ ନାରୀ, ଯୁବକ, କୃଷକ ଓ ଗରୀବଙ୍କୁ ୪ ଦୃଢ଼ ମୂଳଦୂଆ କହିବା ସହ ସ୍ବଦେଶ ସାମଗ୍ରୀ କିଣିବାକୁ ଦେଶବାସୀଙ୍କୁ ଆହ୍ବାନ ଦେଇଛନ୍ତି ପ୍ରଧାନମନ୍ତ୍ରୀ । ବିଶ୍ବକର୍ମା ଜୟନ୍ତୀ ଅବସରରେ ମଧ୍ୟପ୍ରଦେଶର ଧାରରେ ଦେଶର ସବୁଠାରୁ ବଡ଼ ଇଣ୍ଟିଗ୍ରେଟେଡ୍ ଟେକ୍ସଟାଇଲ ପାର୍କର ଶିଳାନ୍ୟାସ କରି ଆତ୍ମନିର୍ଭର ଭାରତ ଅଭିଯାନକୁ ଆଗକୁ ନେଇଛନ୍ତି ମୋଦି ।

ଧାର ଜନସଭାରେ ସମ୍ବୋଧନରେ ଭାରତମାତାର ସୁରକ୍ଷାକୁ ପ୍ରଥମ କର୍ତ୍ତବ୍ୟ ବୋଲି କହିଛନ୍ତି ମୋଦି । 'ଅପରେସନ୍‌ ସିନ୍ଦୂର'ର ସଫଳତା ବଖାଣିବା ସହ ନୂଆ ଭାରତ ଏବେ ଆତଙ୍କୀଙ୍କୁ ଘରେ ପଶି ମାରୁଛି ବୋଲି କହିବା ସହ ଯବାନଙ୍କ ପରାକ୍ରମକୁ କରିଛନ୍ତି ଉଚ୍ଚ ପ୍ରଶଂସା । ପହଲଗାମରେ ସିନ୍ଦୂର ଉଜାଡ଼ିଥିବା ଆତଙ୍କୀଙ୍କୁ ନିପାତ କରି ସେନା ବିରତ୍ବର ପ୍ରମାଣ ଦେଇଛି । ଆତଙ୍କୀ ଏବେ କାନ୍ଦି କାନ୍ଦି ନିଜର ବିକଳ ସ୍ଥିତି ବଖାଣୁଛନ୍ତି ବୋଲି କହିଛନ୍ତି ପ୍ରଧାନମନ୍ତ୍ରୀ ।

ମଧ୍ୟପ୍ରଦେଶର ଧାର ଜିଲ୍ଲାର ଭୌଂସଲା ଗାଁରେ ବିଶାଳ ଜନସଭାରେ ବିକଶିତ ଭାରତ ସଂକଳ୍ପ ଉପରେ ଗୁତୁତ୍ବ ଦେଇଛନ୍ତି ପ୍ରଧାନମନ୍ତ୍ରୀ ମୋଦି । ଗରୀବଙ୍କ ବିକାଶ, ସ୍ବଦେଶୀ ସାମଗ୍ରୀ ବ୍ୟବହାର ଆତ୍ମନିର୍ଭର ଭାରତ ପାଇଁ ବଡ଼ ଶକ୍ତି ହେବାକୁ ଯାଉଛି । ଗର୍ବର ସହିତ ସ୍ବଦେଶୀ ସାମଗ୍ରୀ ବ୍ୟବହାର କରି ବିକଶିତ ଭାରତର ଦୃଢ଼ ଅଂଶୀଦାର ବନିବାକୁ ଦେଶବାସୀଙ୍କୁ ଆହ୍ବାନ ଦେଇଛନ୍ତି ମୋଦି ।