କ୍ରାଇମ୍ ସିନରେ ଗଡ଼ବଡ଼ି, ସୁଇସାଇଡ୍ ଥିଓରୀ, ପୀଡ଼ିତାଙ୍କ ଡାଏରୀ
4ଟି ଦିଗରୁ କୋଲକାତାର ତଦନ୍ତ କରୁଛି ସିବିଆଇ
ଶବ ବ୍ୟବଚ୍ଛେଦ ରିପୋର୍ଟରେ ଦୁଷ୍କର୍ମ ଓ ହତ୍ୟା ନେଇ ସାଂଘାତିକ ତଥ୍ୟ
ମୁଣ୍ଡ, ଓଠ, ଗାଲକୁ ମିଶାଇ ପୀଡ଼ିତାଙ୍କ ଶରୀରରେ 14ଟି କ୍ଷତ
ଫୁସଫୁସରେ ରକ୍ତସ୍ରାବ ସହ ସମ୍ବେଦନଶୀଳ ଅଙ୍ଗରେ ବି ଗଭୀର ଆଘାତ
ଘଟଣା ନେଇ ପଶ୍ଚିମବଙ୍ଗ ରାଜ୍ୟପାଳଙ୍କ ଉଦବେଗ
ଦୃଢ଼ କାର୍ଯ୍ୟାନୁଷ୍ଠାନ ଦାବିରେ ସାରା ଦେଶରେ ଜାରି ଡାକ୍ତର ଓ ସ୍ବାସ୍ଥ୍ୟ କର୍ମଚାରୀଙ୍କ ବିକ୍ଷୋଭ

ଅର୍ଗସ ବ୍ୟୁରୋ: କୋଲକାତାର ଆର୍ ଜି କର ମେଡିକାଲ କଲେଜ ଓ ହସ୍ପିଟାଲରେ ଡାକ୍ତରଙ୍କ ସହ ଦୁଷ୍କର୍ମ ଓ ହତ୍ୟା ଘଟଣା ନେଇ ସାରା ଦେଶରେ ସାଧାରଣ ଲୋକଙ୍କ ଭିତରେ ଜୋରଦାର ଅସନ୍ତୋଷ, କ୍ରୋଧ, ଓ ଆକ୍ରୋଶ। ଆମ ରାଜ୍ୟ ସମେତ ସାରା ଦେଶର ବିଭିନ୍ନ ହସ୍ପିଟାଲରେ ଜାରି ରହିଛି ଡାକ୍ତର ଓ ସ୍ବାସ୍ଥ୍ୟକର୍ମୀଙ୍କ ବିକ୍ଷୋଭ। ଏମାନଙ୍କର ଦାବି ଡାକ୍ତର ଓ ମେଡିକାଲ କର୍ମଚାରୀଙ୍କ ସହ ହସ୍ପିଟାଲର ସୁରକ୍ଷା ସୁନିଶ୍ଚିତ ତୁରନ୍ତ ଦୃଢ଼ ଆଇନ କରି ଶୀଘ୍ର ଲାଗୁ କରନ୍ତୁ ସରକାର।
ସେପଟେ କୋଲକାତା ଘଟଣାରେ ସାମ୍ନାକୁ ଆସିଛି ପୀଡ଼ିତାଙ୍କର ବିସ୍ତୃତ ଶବ ବ୍ୟବଚ୍ଛେଦ ରିପୋର୍ଟ। ଯାହା ଅନୁସାରେ ପୀଡ଼ିତାଙ୍କ ଶରୀରରେ ଥିଲା 14ରୁ ଅଧିକ କ୍ଷତ ଚିହ୍ନ। ମୁଣ୍ଡ, ଦୁଇ ଗାଲ, ଓଠର ଉପର ଓ ଭିତର ଅଂଶ, ନାକ, ଦାନ୍ତ ମାଢ଼ି, ଗଳା, ବାମ ହାତ, କାନ୍ଧ, ଆଣ୍ଠୁ, କହୁଣୀ ଓ ସମ୍ବେଦନଶୀଳ ଅଙ୍ଗରେ କ୍ଷତ ଚିହ୍ନ ମିଳିଛି । ପୋଷ୍ଟମର୍ଟମ ରିପୋର୍ଟରେ କୁହାଯାଇଛି ଯେ ଶରୀରର ବହୁ ସ୍ଥାନରେ ରକ୍ତ ଜମାଟ ବାନ୍ଧିବା ସହ ଫୁସଫୁସରେ ରକ୍ତସ୍ରାବ ଦେଖାଯାଇଛି ।

ପୀଡ଼ିତାଙ୍କ ଶରୀର ଓ ସମ୍ବେଦନଶୀଳ ଅଙ୍ଗରେ ଲାଗିଥିବା ସମସ୍ତ ଆଘାତ ତାଙ୍କ ମୃତ୍ୟୁ ପୂର୍ବର । ଏଥିସହ ଏକାଧିକ ବ୍ୟକ୍ତି ଦୁଷ୍କର୍ମ କରିଥିବାର ପ୍ରମାଣ ମିଳିଛି। ପୋଷ୍ଟମର୍ଟମ ରିପୋର୍ଟ ଆଧାରରେ ମେଡିକାଲ ଅଫିସର କହିଛନ୍ତି ଯେ ଦୁଇ ହାତରେ ତଣ୍ଟି ଚିପିବା ଫଳରେ ପୀଡ଼ିତାଙ୍କର ମୃତ୍ୟୁ ହୋଇଛି। ଭିସେରା, ରକ୍ତ ଏବଂ ସଂଗ୍ରହ କରାଯାଇଥିବା ଅନ୍ୟ ନମୁନାର ବିଶ୍ଳେଷଣ ପାଇଁ ଲ୍ୟାବକୁ ପଠାଯାଇଛି।ସେପଟେ କୋଲକାତା ହାଇକୋର୍ଟଙ୍କ ନିର୍ଦ୍ଦେଶରେ ମାମଲାର ତଦନ୍ତ କରୁଥିବା ସିବିଆଇ ଘଟଣାର 4ଟି ଦିଗରେ ତନାଘନା କରୁଛି। ଆଜି ଆର୍ ଜି କର ମେଡିକାଲ କଲେଜର ପୂର୍ବ ପ୍ରିନ୍ସିପାଲ୍ ସନ୍ଦୀପ ଘୋଷଙ୍କୁ ଚତୁର୍ଥ ଥର ପାଇଁ ଜେରା କରିଛି ସିବିଆଇ। ଏଥିରୁ ସ୍ପଷ୍ଟ ସନ୍ଦୀପ ଘୋଷଙ୍କ ଜବାବରେ ସିବିଆଇ ସନ୍ତୁଷ୍ଟ ନୁହେଁ। ପୂର୍ବ ପ୍ରିନ୍ସିପାଲଙ୍କ ଉତ୍ତରରେ ବିରୋଧାଭାସ ରହିଛି। କଥା ହେଲା ଘଟଣା ଦିନ ରାତିରେ ହସ୍ପିଟାଲ ପକ୍ଷରୁ ପ୍ରଥମେ ପୀଡ଼ିତାଙ୍କ ପରିବାରକୁ ଫୋନ୍ କରି ଆତ୍ମହତ୍ୟା ଥିଓରୀ ଶୁଣାଯାଇଥିଲା। ଯେଉଁ ସ୍ଥାନରେ ଅପରାଧ ଘଟିଥିଲା ସେହି କ୍ରାଇମ୍ ସିନଙ୍କୁ ସମ୍ପୂର୍ଣ୍ଣ ଭାବେ ସୁରକ୍ଷିତ ରଖାଗଲା ନାହିଁ। ଏହାକୁ ନେଇ ବି ସିବିଆଇ ସନ୍ଦୀପ ଘୋଷଙ୍କୁ ପଚରାଉଚୁରା କରୁଛି।

ଆର୍ ଜି କର ହସ୍ପିଟାଲର 4 ଜଣ ଡାକ୍ତରୀ ଛାତ୍ରଙ୍କୁ ବି ପଚରାଉଚୁରା କରୁଛି ସିବିଆଇ। ଏମାନେ ସେହି ଛାତ୍ର ଯେଉଁମାନେ ସେଦିନ ରାତିରେ ଘଟଣା ପୂର୍ବରୁ ପୀଡ଼ିତାଙ୍କ ସହ ଡିନର କରିଥିଲେ। ପୋଷ୍ଟମର୍ଟମ ରିପୋର୍ଟରେ ପୀଡ଼ିତାଙ୍କ ଶରୀରରୁ ମିଳିଥିବା 14ରୁ ଅଧିକ କ୍ଷତଚିହ୍ନରୁ ସ୍ପଷ୍ଟ ତାଙ୍କ ସହ ଜୋରଦାର ମାରପିଟ୍ କରାଯାଇଥିଲା, ସେ ଜୋରରେ ଚିତ୍କାର କରିଥିଲେ ନିଶ୍ଚୟ। କେହି କଣ ତାଙ୍କର ଚିତ୍କାର ଶୁଣିନଥିଲେ ? ଏ ବାବଦରେ ଛାନଭିନ୍ କରୁଛି ସିବିଆଇ। ସିବିଆଇର ଗୋଟିଏ ଟିମ୍ ପୀଡ଼ିତାଙ୍କ ପରିବାରକୁ ମଧ୍ୟ ପଚରାଉଚୁରା କରୁଛି। କିଏ କିଏ ପୀଡ଼ିତାଙ୍କର ଅନ୍ତରଙ୍ଗ ବନ୍ଧୁ ଥିଲେ, ହସ୍ପିଟାଲ ବାବଦରେ ପୀଡ଼ିତା କଣ କଣ କହୁଥିଲେ, କାହା କାହା ସହ ସେ ପ୍ରତିଦିନ କଥା ହେଉଥିଲେ ଏ ସବୁ କଥା ତାଙ୍କ ପରିଜନଠାରୁ ଜାଣିବାକୁ ଚେଷ୍ଟା କରୁଛି ପୋଲିସ। ପୀଡ଼ିତା କୌଣସି ଡାଏରୀ ଲେଖୁଥିଲେ ନା ନାହିଁ ଏକଥା ବି ପତ୍ତା ଲଗାଇବାକୁ ଚେଷ୍ଟା କରୁଛି କେନ୍ଦ୍ରୀୟ ଯାଂଚ ଏଜେନ୍ସି।

ସିବିଆଇ ଟିମ୍ ଦିଲ୍ଲୀରୁ କୋଲକାତାରେ ପହଞ୍ଚିଥିବା ସେଣ୍ଟ୍ରାଲ୍ ଫରେନ୍ସିକ୍ ସାଇନ୍ସ ଲେବୋରେଟୋରୀର ଅଧିକାରୀଙ୍କ ମାଧ୍ୟମରେ ଅଭିଯୁକ୍ତ ସଞ୍ଜୟ ରାୟର ସାଇକ୍ଲୋଜିକାଲ୍ ଟେଷ୍ଟ କରାଇଛି। ଏହି ପରୀକ୍ଷା ମାଧ୍ୟମରେ ଅଭିଯୁକ୍ତର ମାନସିକତା, ତାର ବ୍ୟବହାରକୁ ବୁଝିବାକୁ ଚେଷ୍ଟା କରୁଛି ସିବିଆଇ। ୟା ଭିତରେ ଅଭିଯୁକ୍ତ ସଞ୍ଜର ପଲିଗ୍ରାଫ୍ କରିବାକୁ ସିବିଆଇକୁ ଅନୁମତି ମିଳିଛି। କୋଲକାତା ଘଟଣା ନେଇ ଉଦବେଗ ପ୍ରକାଶ କରିଛନ୍ତି ପଶ୍ଚିମବଙ୍ଗ ରାଜ୍ୟପାଳ । ପଶ୍ଚିମବଙ୍ଗରେ ମହିଳା ଅସୁରକ୍ଷିତ । ଦିଲ୍ଲୀ ଯାଇ ଗୃହମନ୍ତ୍ରୀଙ୍କୁ ଭେଟି କରାଇବେ ଅବଗତ। ସେପଟେ ଘଟଣାରେ ନିଜ ଆଡୁ ହସ୍ତକ୍ଷେପ କରିଥିବା ସୁପ୍ରିମକୋର୍ଟ ଆସନ୍ତାକାଲି ମାମଲାର ଶୁଣାଣି ଆରମ୍ଭ କରିବେ। ପ୍ରଧାନ ବିଚାରପତିଙ୍କ ଅଧ୍ୟକ୍ଷତାରେ ଗଠିତ ତିନିଜଣିଆ ଖଣ୍ଡପୀଠରେ ଏହି ମାମଲାର ଶୁଣାଣି ହେବ।

ଅଧିକ ପଢ଼ନ୍ତୁ ଦେଶ ଖବର:

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV