ଦିଲ୍ଲୀର ବାୟୁ ବିଷାକ୍ତ ହେବାରେ ଲାଗିଛି। ପ୍ରଦୂଷଣ କ୍ରମାଗତ ଭାବରେ ବୃଦ୍ଧି ପାଉଛି। ଶନିବାର ଦିଲ୍ଲୀର AQI ୩୦୦ ତଳେ ଥିଲା, କିନ୍ତୁ ଆଜି ରବିବାର, AQI ପୁଣି ଥରେ ଅତ୍ୟନ୍ତ ଖରାପ ବର୍ଗରେ ପହଞ୍ଚିଛି। ଆଜି ଦିଲ୍ଲୀର ସାମଗ୍ରିକ AQI ୩୭୧ରେ ପହଞ୍ଚିଛି। ଯାହା ବହୁତ ଖରାପ ହୋଇଛି। ଏହା ଶ୍ୱାସକ୍ରିୟା ସମସ୍ୟା ସୃଷ୍ଟି କରୁଛି। ଦିଲ୍ଲୀରେ ବଢ଼ୁଥିବା ପ୍ରଦୂଷଣ ଯୋଗୁଁ ଲୋକମାନେ ଆଖିରେ ପୋଡ଼ାଜଳା ମଧ୍ୟ ଅନୁଭବ କରୁଛନ୍ତି।

ଆଜି, ଅନେକ ଅଞ୍ଚଳ ରେଡ୍ ଜୋନରେ ଅଛି। ଯେଉଁଠାରେ AQI ୩୦୦ ରୁ ୪୦୦ ମଧ୍ୟରେ ଅଛି। ପ୍ରଦୂଷଣ ସହିତ, ଦିଲ୍ଲୀବାସୀ ମଧ୍ୟ କୁହୁଡ଼ି ଯୋଗୁଁ ସମସ୍ୟାରେ ପଡିଛନ୍ତି। ବର୍ଦ୍ଧିତ ପ୍ରଦୂଷଣ ଯୋଗୁଁ, ଅନ୍ୟ ରାଜ୍ୟରୁ ପୁରୁଣା ଏବଂ BS-3 ବାଣିଜ୍ୟିକ ଯାନବାହାନକୁ ନିଷିଦ୍ଧ କରାଯାଇଛି। ପାଣିପାଗ ବିଭାଗ ନଭେମ୍ବର ୭ ତାରିଖ ପର୍ଯ୍ୟନ୍ତ ଦିଲ୍ଲୀରେ କୁହୁଡ଼ି ପାଇଁ ସତର୍କ ସୂଚନା ଜାରି କରିଛି। ଆଜି ଦିଲ୍ଲୀର ସର୍ବାଧିକ ତାପମାତ୍ରା ୩୧ ଡିଗ୍ରୀ ସେଲସିୟସ୍ ଏବଂ ସର୍ବନିମ୍ନ ତାପମାତ୍ରା ୧୭ ଡିଗ୍ରୀ ସେଲସିୟସ୍ ରହିବ ବୋଲି ଆଶା କରାଯାଉଛି।

ବାୟୁ ପ୍ରଦୂଷଣ ଏବେ ଦିଲ୍ଲୀର ସବୁଠାରୁ ମାରାତ୍ମକ ସ୍ୱାସ୍ଥ୍ୟ ବିପଦ ଭାବେ ଉଭା ହୋଇଛି, ଯାହା ଉଚ୍ଚ ରକ୍ତଚାପ, ମଧୁମେହ କିମ୍ବା ମେଦବହୁଳତା ଅପେକ୍ଷା ଅଧିକ ଜୀବନ ନେଉଛି। ଇନ୍‌ଷ୍ଟିଚ୍ୟୁଟ୍ ଫର୍ ହେଲଥ୍ ମେଟ୍ରିକ୍ସ ଆଣ୍ଡ୍ ଇଭାଲ୍ୟୁଏସନ୍ (ଆଇଏଚ୍ଏମ୍ଇ) ଦ୍ୱାରା କରାଯାଇଥିବା ଏକ ବିଶ୍ଳେଷଣ ଅନୁଯାୟୀ,୨୦୨୩ ମସିହାରେ କଣିକା ପଦାର୍ଥ ପ୍ରଦୂଷଣ ୧୭,୧୮୮ ମୃତ୍ୟୁ ସହିତ ଜଡିତ ଥିଲା, ଯାହା ସମସ୍ତ ମୃତ୍ୟୁର ୧୫ ପ୍ରତିଶତ। ୨୦୨୩ରେ ଜାତୀୟ ରାଜଧାନୀରେ ପ୍ରତି ସାତଟି ମୃତ୍ୟୁ ମଧ୍ୟରୁ ଗୋଟିଏ ବିଷାକ୍ତ ବାୟୁ ସହ ଜଡିତ ଥିଲା। ପ୍ରଦୂଷଣ ସହ ଜଡିତ ମୃତ୍ୟୁ ୨୦୧୮ରେ ୧୫,୭୮୬ରୁ ୨୦୨୩ରେ ୧୭,୧୮୮କୁ ବୃଦ୍ଧି ପାଇଛି। ଏହା ଦର୍ଶାଏ ଯେ ବାୟୁ ଗୁଣବତ୍ତା ଦିଲ୍ଲୀ ବାସିନ୍ଦାଙ୍କ ସ୍ୱାସ୍ଥ୍ୟ ଓ ଆୟୁ ଉପରେ କିପରି ସାଂଘାତିକ ପ୍ରଭାବ ପକାଇବାରେ ଲାଗିଛି।

ବାସ୍ତବରେ, ୨୦୧୮ରୁ ୨୦୨୪ ପର୍ଯ୍ୟନ୍ତ କ୍ରମାଗତ ସାତ ବର୍ଷ ଧରି ଦିଲ୍ଲୀ ବିଶ୍ୱର ସବୁଠାରୁ ପ୍ରଦୂଷିତ ରାଜଧାନୀ ତାଲିକାର ଶୀର୍ଷରେ ରହିଛି ବୋଲି ସ୍ୱିସ୍ କମ୍ପାନି ଆଇକ୍ୟୁଏୟାର୍ କହିଛି। ଦିଲ୍ଲୀରେ ମୃତ୍ୟୁ ପଛରେ ଥିବା ଅନ୍ୟାନ୍ୟ ପ୍ରମୁଖ ସ୍ୱାସ୍ଥ୍ୟ ବିପଦ କାରଣ ମଧ୍ୟରେ ରହିଛି ଉଚ୍ଚ ରକ୍ତଚାପ - ୧୪,୮୭୪ ମୃତ୍ୟୁ (୧୨.୫%), ମଧୁମେହ - ୧୦,୬୫୩ ମୃତ୍ୟୁ (୯%), ଉଚ୍ଚ କୋଲେଷ୍ଟ୍ରଲ- ୭,୨୬୭ ମୃତ୍ୟୁ (୬%) ଏବଂ ମେଦବହୁଳତା - ୬,୬୯୮ ମୃତ୍ୟୁ (୫.୬%)। କଣିକା ପଦାର୍ଥ ପ୍ରଦୂଷଣ ହେତୁ ଦିଲ୍ଲୀରେ ମୃତ୍ୟୁ କ୍ରମାଗତ ଭାବରେ ଅଧିକ ରହିଛି, କିନ୍ତୁ ତାହା ପ୍ରାୟତଃ ଉଚ୍ଚ ରକ୍ତଚାପ କିମ୍ବା ମଧୁମେହ କାରଣରୁ ହେଉଥିବା ମୃତ୍ୟୁଠାରୁ ଅଧିକ ନ ଥିଲା। ଏବେ କିନ୍ତୁ ପ୍ରଦୂଷଣଜନିତ ମୃତ୍ୟୁସଂଖ୍ୟା ତାହାକୁ ଅତିକ୍ରମ କରିଛି।

ଅଧିକ ପଢ଼ନ୍ତୁ ଭାରତ ଖବର...