Supreme Court / ଦିଲ୍ଲୀରେ ଦୁଷ୍କର୍ମ ବଢୁଥିବାରୁ ସୁପ୍ରିମକୋର୍ଟଙ୍କ ଉଦବେଗ…ଅପରାଧୀଙ୍କ ଉପରେ କଠୋର ଆକ୍ସନ ନେବାକୁ ନିର୍ଦ୍ଦେଶ

ଦିଲ୍ଲୀରେ ଗୋଟିଏ ପରେ ଗୋଟିଏ ଦୁଷ୍କର୍ମ ଘଟଣା ନଜରକୁ ଆସିବା ପରେ ଏହି ମାମଲାକୁ ଗୁରୁତର ସହ ନେଇଛନ୍ତି ସୁପ୍ରିମକୋର୍ଟ । ଏହି ଘଟଣାରେ ସର୍ବୋଚ୍ଚ ଅଦାଲତ ନିଜଆଡୁ ମାମଲା ରୁଜୁ କରି ଅପରାଧୀଙ୍କ ଉପରେ କଠୋର ପଦକ୍ଷେପ ନେବାକୁ ଦିଲ୍ଲୀ ପୋଲିସକୁ ନିର୍ଦ୍ଦେଶ ଦେଇଛନ୍ତି । ସୁପ୍ରିମକୋର୍ଟ ଜଷ୍ଟିସ ଜେ.ବି. ପଡିଓ୍ବାଲା ଓ ଜଷ୍ଟିସ କେ. ବିନୋଦ ଚନ୍ଦ୍ରନଙ୍କୁ ନେଇ ଗଠିତ ଦୁଇ ଜଣିଆ ଖଣ୍ଡପୀଠ ମାମଲାର ଶୁଣାଣି କରିଛନ୍ତି । ଦୁଷ୍କର୍ମ ମାମଲା ରୋକିବାକୁ କେବଳ ନିର୍ଦ୍ଦେଶାବଳୀ ଜାରି କରିବା ପର୍ଯ୍ୟାପ୍ତ ନୁହେଁ, ଏ ନେଇ ସ୍ପଟରେ କଡା ଆକ୍ସନ ନେବାକୁ ପଡିବ । ଏଭଳି ମାମଲାରେ ସଂପୃକ୍ତ ରହୁଥିବା ଅପରାଧୀଙ୍କ ମନରେ ଭୟ ସୃଷ୍ଟି କରିବାକୁ ପଡିବ ।

ଅପରାଧୀ ଭାବିବେ ସେମିତି କଲେ ଚାଲିଯିବ ଜୀବନ। ଯଦି ସେମିତି ନ ହୁଏ ତେବେ ଦୁଷ୍କର୍ମ ଘଟଣା ରୋକିବା କଷ୍ଟକର ହୋଇପଡିବ । ରାତି ୧୦ଟାରେ ଯେମିତି ମହିଳାମାନେ ନିଜକୁ ସୁରକ୍ଷିତ ମଣିବେ ସେଥିପାଇଁ କାର୍ଯ୍ୟାନୁଷ୍ଠାନ ନେବାକୁ ପଡିବ । କିଛି ବ୍ୟକ୍ତି ଧାରା ୨୧ ଅନୁଯାୟୀ ମାନବିକ ଅଧିକାର କ୍ଷୁର୍ଣ୍ଣ ହୋଇଥିବା ଅଭିଯୋଗ କରିବେ କିନ୍ତୁ ପୋଲିସକୁ ଦୃଷ୍ଟାନ୍ତମୂଳକ ପଦକ୍ଷେପ ନେବାକୁ ପଡିବ । ଏବେ ଘଟଣା ପରେ ଦୋଷୀକୁ ଧରି ଜେଲରେ ଭର୍ତ୍ତି କରାଯାଉଛି । କିନ୍ତୁ ଏଭଳି ଘଟଣାକୁ କିପରି ଏଡାଯାଇ ପାରିବ ତା ଉପରେ ଫୋକସ ଦରକାର । ଦୁଷ୍କର୍ମ ଓ ଅସଦାଚରଣ ମାମଲା ରୋକିବାକୁ ଯାଞ୍ଚ ଓ ପାଟ୍ରୋଲିଂ ଉପରେ ଅଧିକ ଗୁରୁତ୍ବ ଦେବାକୁ ପଡିବ ।

ମାମଲାର ଶୁଣାଣି କରି ସୁପ୍ରିମକୋର୍ଟଙ୍କ ଦୁଇ ଜଣିଆ ଖଣ୍ଡପୀଠ ଦିଲ୍ଲୀ ପୋଲିସକୁ ସର୍ବସାଧାରଣ ସ୍ଥାନରେ ଅଡିଟ୍ କରିବାକୁ ନିର୍ଦ୍ଦେଶ ଦେଇଛନ୍ତି । ପାର୍କ, ରାସ୍ତା, ବସଷ୍ଟାଣ୍ଡ ଓ ମେଟ୍ରୋ ଷ୍ଟେସନ୍ ସହ ଅନ୍ୟ ସ୍ଥାନରେ ସୁରକ୍ଷା ବ୍ୟବସ୍ଥାର ସମୀକ୍ଷାର ଆବଶ୍ୟକତା ରହିଛି । ଏ ସମ୍ପର୍କରେ ଦିଲ୍ଲୀ ପୋଲିସ ପକ୍ଷରୁ ଲଢୁଥିବା ସଲିସିଟର ଜେନେରାଲ ତୁଷାର ମେହଟ୍ଟା କହିଛନ୍ତି, ଦିଳ୍ଲୀ ପୋଳିସ ପକ୍ଷରୁ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଉଛି । ଏ ସମ୍ପର୍କିତ ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୧୬ରେ ହେବ ।