ଜାତୀୟ ଶିକ୍ଷା ନୀତିକୁ କଂଗ୍ରେସ ସଂସଦୀୟ ଦଳ ନେତା ସୋନିଆ ଗାନ୍ଧିଙ୍କ ସମାଲୋଚନାର କଡା ଜବାବ ରଖିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଜାତୀୟ ଶିକ୍ଷା ନୀତି ଦେଶରେ ଆଣିବ ନବଜାଗରଣ, ଶିକ୍ଷାରେ ଆସିବ ବୈପ୍ଳବିକ ପରିବର୍ତ୍ତନ । ଏନେଇ ଇଂରାଜୀ ଦୈନିକ ଦି ହିନ୍ଦୁରେ ଏକ ଆଲେଖ୍ୟ ଲେଖିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ । ସେ ଲେଖିଛନ୍ତି, ନୀତି ନିର୍ଦ୍ଧାରଣ କ୍ଷେତ୍ରରେ ଏହା ଏକ ସର୍ବୋତ୍କୃଷ୍ଟ ପ୍ରକ୍ରିୟା । ଏଥିରେ ଗ୍ରହଣୀୟତା, ସମାନତା, ଉତ୍କର୍ଷ, ସମସ୍ତଙ୍କୁ ଉପଲବ୍ଧ ହେବା ସହ ଉତ୍ତରଦାୟିତ୍ବ ରହିଛି । ଜାତୀୟ ଶିକ୍ଷାନୀତି ୨୦୦୦ ଲୋକମାନଙ୍କର, ଲୋକମାନଙ୍କ ଦ୍ବାରା ଓ ଭବିଷ୍ୟତ ଲୋକମାନଙ୍କ ପାଇଁ ।

ଏଥିରେ ବିଭିନ୍ନ ବର୍ଗର ଲୋକମାନଙ୍କ ମଧ୍ୟରେ ରହିଥିବା ଅସାମନତାକୁ ଦୂର କରିବା ସହ ସଶକ୍ତୀକରଣକୁ ଗୁରୁତ୍ବ ଦିଆଯାଇଛି । ମହିଳା ସଶକ୍ତୀକରଣକୁ ଦିଆଯାଇଛି ପ୍ରାଥମିକତା । ପ୍ରତ୍ୟେକ ଶିଶୁଙ୍କ ପାଇଁ ସରକାରୀ ଖର୍ଚ୍ଚ ପରିମାଣ ୧୩୦ ପ୍ରତିଶତ ବୃଦ୍ଧି କରାଯାଇଛି । ୨୦୧୩-୧୪ରେ ୧୦ହଜାର ୭୮୦ଟଙ୍କା ଖର୍ଚ୍ଚ କରାଯାଉଥିବା ବେଳେ ୨୦୨୧-୨୨ରେ ଏହାର ପରିମାଣ ୨୫ ହଜାର ୪୩ଟଙ୍କାକୁ ବୃଦ୍ଧି ପାଇଛି । ସରକାରୀ ସ୍କୁଲ ଗୁଡିକରେ ଅତ୍ୟାଧୁନିକ ଭିତ୍ତିଭୂମି ଯୋଗାଇ ଦିଆଯାଉଛି । ଶିକ୍ଷାପ୍ରତି ଛାତ୍ରଛାତ୍ରୀ ଆଗ୍ରହ ବଢୁଥିବାରୁ କମୁଛି ଡ୍ରପ୍ ଆଉଟ ସଂଖ୍ୟା। ଜାତୀୟ ଶିକ୍ଷା ନୀତିରେ ସବୁ ଆଞ୍ଚଳିକ ଭାଷାକୁ ଦିଆଯାଇଛି ପ୍ରାଥମିକତା । ପୂର୍ବରୁ ରହିଥିବା ଇଙ୍ଗଲିସ୍ ଫାଷ୍ଟ ନୀତିକୁ ବାଦ ଦିଆଯାଇଛି । ଏଥିପାଇଁ ଶିକ୍ଷା ମାଧ୍ୟମରେ ସଶକ୍ତ କରି ବିକଶିତ ଭାରତ ଗଠନର ଲକ୍ଷ୍ୟ ରହିଛି ।

ଆଗାମୀ ଦଶନ୍ଧିରେ ଶିକ୍ଷାରେ ନବଜାଗରଣ ସୃଷ୍ଟି ହେବ । ଯାହା ଭାରତର ଗୌରବମୟ ଐତିହ୍ୟକୁ ରୁଦ୍ଧିମନ୍ତ କରିବା ସହ ଭବିଷ୍ୟତର ବିକାଶ ପ୍ରକ୍ରିୟାକୁ ସହଜସାଧ୍ୟ କରିବ । ଶେଷରେ ଭାରତର ଶିକ୍ଷା ବ୍ୟବସ୍ଥା ଉପନିବେଶ ବାଦରୁ ମୁକ୍ତ ହୋଇଛି । ଆଗାମୀ ଦିନରେ ଏହା କୋଟି କୋଟି ଭାରତୀୟଙ୍କ ସ୍ବପ୍ନକୁ ସାକାର କରିବ ବୋଲି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଲେଖିଛନ୍ତି ।

Argus News | argus news | Odisha Latest News, Breaking News, Trending News, Live TV