Dharmendra Pradhan / ପ୍ରଧାନମନ୍ତ୍ରୀଙ୍କୁ ଇସ୍ତଫା ପତ୍ର ପଠାଇଲେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ

ନୂଆଦିଲ୍ଲୀ: ଇସ୍ତଫା ଦେଲେ ଧର୍ମେନ୍ଦ୍ର ପ୍ରଧାନ । କେନ୍ଦ୍ର ଶିକ୍ଷା ମନ୍ତ୍ରୀ ପଦରୁ ଧର୍ମେନ୍ଦ୍ର ପ୍ରଧାନ ଇସ୍ତଫା ଦେଇଛନ୍ତି । ଧର୍ମେନ୍ଦ୍ର ତାଙ୍କ ଇସ୍ତଫାପତ୍ର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦେଇଛନ୍ତି । ଏନେଇ ସୋସିଆଲ୍ ମିଡିଆରେ ପୋଷ୍ଟ କରିଛନ୍ତି ଧର୍ମେନ୍ଦ୍ର ପ୍ରଧାନ ।

ଯେଉଁଥିରେ ସେ ଲେଖିଛନ୍ତି, "ବିଗତ ୪ ଦଶନ୍ଧିରୁ ଅଧିକ ସମୟ ଧରି ଛାତ୍ର, ଶିକ୍ଷକ ଓ ଶିକ୍ଷା ସୁଧାର ପାଇଁ ସମର୍ପିତ ରହିଛି । ମୋର ସବୁବେଳେ ବିଶ୍ଵାସ ଏକ ସଶକ୍ତ, ସମାବେଶୀ ଓ ଦୂରଦର୍ଶୀ ଶିକ୍ଷା ବ୍ୟବସ୍ଥା ହିଁ ସଶକ୍ତ ରାଷ୍ଟ୍ରର ଆଧାରଶିଳା ହୋଇଥାଏ ।"

ମୁଁ ଦେଶର ଯୁବବର୍ଗଙ୍କ ଆକାଂକ୍ଷା, ଭାବନା ଓ ସେମାନଙ୍କ ନ୍ୟାୟୋଚିତ ଅପେକ୍ଷାକୁ ଗମ୍ଭୀରତାର ସହ ସମ୍ମାନ କରେ । ଭାରତର ଯୁବପିଢ଼ିଙ୍କ ସ୍ଵପ୍ନ ସାକାର କରିବା ଆମ ସମସ୍ତଙ୍କ ରାଜନୈତିକ ଓ ସାମାଜିକ ଜୀବନର ନୈତିକ ସଂକଳ୍ପ । ଆଦରଣୀୟ ପ୍ରଧାନମନ୍ତ୍ରୀଙ୍କ ଦୂରଦର୍ଶୀ ନେତୃତ୍ଵରେ ଦେଶର ସେବା ପାଇଁ ସୁଯୋଗ ମିଳିଥିଲା । ସେଥିପାଇଁ ମୁଁ ପ୍ରଧାନମନ୍ତ୍ରୀଙ୍କ ନିକଟରେ କୃତଜ୍ଞତା ଜ୍ଞାପନ କରୁଛି ବୋଲି ଲେଖିଛନ୍ତି ଧର୍ମେନ୍ଦ୍ର ପ୍ରଧାନ ।

୨୦୨୬ ମେ ୩ରେ NEET-UG ପରୀକ୍ଷାରେ ଅନିୟମିତତା ହୋଇଥିବା ଜଣାପଡ଼ିଥିଲା । ତୁରନ୍ତ ଭାରତ ସରକାର ଅନିୟମିତତାର ତଦନ୍ତ ଭାର ସିବିଆଇକୁ ଦେବା ସହ ପରୀକ୍ଷା ବାତିଲ୍ କରିଥିଲେ । ଏଥିସହ ପୁନଃ ପରୀକ୍ଷା ତାରିଖ ଧାର୍ଯ୍ୟ କରାଯାଇଥିଲା । ଏଥିସହ ଆସନ୍ତା ବର୍ଷରୁ ଏହି ପରୀକ୍ଷା CBT ମୋଡ୍‌ରେ କରିବାକୁ ନିଷ୍ପତ୍ତି ନିଆ ଯାଇଥିଲା ।

pic.twitter.com/VSArqS98OJ

— Dharmendra Pradhan (@dpradhanbjp) July 25, 2026

ଏହି ସମୟରେ ସରକାରଙ୍କ ପ୍ରମୁଖ ପ୍ରାଥମିକତା ଥିଲା ୨୦ ଲକ୍ଷର ଅଧିକ ଛାତ୍ରଛାତ୍ରୀଙ୍କ ପରୀକ୍ଷା ସୂଚାରୁରୂପ ଆୟୋଜିତ କରିବା । ସରକାର ଏକାଠି କାମ କରିଥିଲେ । କେନ୍ଦ୍ର ସରକାରଙ୍କ ସହ ରାଜ୍ୟ ସରକାର, ଜିଲ୍ଲା ପ୍ରଶାସନ ଗୁରୁତ୍ଵପୂର୍ଣ୍ଣ ଭୂମିକା ନିର୍ବାହ କରିଥିଲେ । ଛାତ୍ରଛାତ୍ରୀ, ଅଭିଭାବକ, ଓ ମାତାପିତାଙ୍କ ସହଯୋଗରେ ୨୦୨୬ ଜୁନ୍ ୨୧ରେ ଏହି ପରୀକ୍ଷା ହୋଇଥିଲା ।

ପ୍ରଥମ ଦିନରୁ ହିଁ ଏଥିପାଇଁ ଦାୟିତ୍ଵ ନେଇଥିଲି ଏବଂ କେବେ ପରିସ୍ଥିତିରୁ ମୁହଁ ଫେରାଇ ନେଇ ନଥିଲି । ମୋ ସଂକଳ୍ପ ଥିଲା, ଆମେ କୌଣସି ମେଧାବୀ ଛାତ୍ରଛାତ୍ରୀଙ୍କ ସମ୍ଭାବନା ପରୀକ୍ଷାକୁ ମାଫିଆଙ୍କ ପାଇଁ ଖରାପ ହେବାକୁ ଦେବୁ ନାହିଁ । କୌଣସି ଛାତ୍ରଛାତ୍ରୀଙ୍କ ସହ ଅନ୍ୟାୟ ହେବାକୁ ଦେବୁ ନାହିଁ ।

୧୬ ଜୁଲାଇରେ ନିଟ୍-ୟୁଜି ପରୀକ୍ଷା ଫଳ ଘୋଷଣା ହୋଇଥିବା ବେଳେ ପରିଣାମ ସନ୍ତୋଷଜନକ ରହିଥିଲା । ଯେଉଁଥିରେ ଗରିବୀରୁ ଆସିଥିବା ମେଧାବୀ ଛାତ୍ରଛାତ୍ରୀଙ୍କୁ ମଧ୍ୟ ସଫଳତା ମିଳିଥିଲା । ମୁଁ ସବୁବେଳେ ଗଣତନ୍ତ୍ରର ଶକ୍ତି ଉପରେ ଅତୁଟ ବିଶ୍ଵାସ ରଖି ଆସିଛି । ଯୁବବର୍ଗଙ୍କ ଆକାଂକ୍ଷା, ସ୍ଵପ୍ନ, ଓ ଅପେକ୍ଷାକୁ ଗଭୀର ଭାବେ ସମ୍ମାନ କରି ଆସିଛି । ଏହା କେବଳ ଭାରତର ଭବିଷ୍ୟତ ନୁହେଁ, ବରଂ ଏକ ନୂଆ ଓ ବିକଶିତ ଭାରତର ବାହକ, ନିର୍ମାତା ଓ ଭବିଷ୍ୟତର ଶିଳ୍ପକାର ଅଟନ୍ତି । ଭାରତର ଯୁବ ଶକ୍ତି ହିଁ ଦେଶର ପ୍ରକୃତ ଶକ୍ତି ଅଟନ୍ତି ।

ଦେଶର ଯୁବଶକ୍ତିଙ୍କୁ ଭ୍ରମ, କୁଚକ୍ରରେ ଫସିବାକୁ ନଦେବା ହେଉଛି ମୋର ସଂକଳ୍ପ । ଜନ୍ତରମନ୍ତର ଓ ଦେଶରେ ଯେଉଁ ସ୍ଥିତି ସୃଷ୍ଟି ହୋଇଛି, ଏହାର ଲାଭ ରାଷ୍ଟ୍ର ବିରୋଧୀ ଶକ୍ତି ନ ଉଠାନ୍ତୁ । ଦେଶର ଏକତା ବଜାୟ ରହୁ, ଭାରତର ପ୍ରତିଟି ବିଦ୍ୟାର୍ଥୀଙ୍କ ଭବିଷ୍ୟତ ସୁରକ୍ଷିତ ରହୁ, ଆମ ଛାତ୍ରଛାତ୍ରୀ ସମୟ ପାଠପଢ଼ାରେ ଦିଅନ୍ତୁ, କ୍ୟାରିୟର ଉପରେ ଫୋକସ୍ କରନ୍ତୁ ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମାର୍ଗ ଦର୍ଶନ, ବିଶ୍ଵାସ ଓ ନିରନ୍ତର ସହଯୋଗ ପାଇଁ କୃତଜ୍ଞତା ଜଣାଇଛନ୍ତି ଧର୍ମେନ୍ଦ୍ର ପ୍ରଧାନ । ଏଥିସହ ମନ୍ତ୍ରିପରିଷଦର ସମସ୍ତ ସହଯୋଗୀ, ମନ୍ତ୍ରଣାଳୟର ଅଧିକାରୀ ଏବଂ କର୍ମଚାରୀଙ୍କୁ କୃତଜ୍ଞତା ଜଣାଇଛନ୍ତି । ଧର୍ମେନ୍ଦ୍ର ପ୍ରଧାନ କହିଛନ୍ତି, "ରାଷ୍ଟ୍ରସେବା ମୋ ଜୀବନରେ ସର୍ବୋଚ୍ଚ ପ୍ରାଥମିକତା, ମୁଁ ଏଥିପାଇଁ ସବୁବେଳେ ସମର୍ପିତ ରହିବି । ପ୍ରଭୁ ଶ୍ରୀଜଗନ୍ନାଥଙ୍କ ଆଶୀର୍ବାଦରୁ ମୁଁ ଭବିଷ୍ୟତରେ ମଧ୍ୟ ଭାରତ ମାତା, ଓଡ଼ିଶାର ଜନସାଧାରଣ ତଥା ଦେଶର ଯୁବବର୍ଗଙ୍କ ଆକାଂକ୍ଷା ପୂରଣ ପାଇଁ ସବୁବେଳେ ନିଜକୁ ସମର୍ପିତ ରଖିବି ।"