ନିର୍ବାଚନ ସମୟରେ ରାହୁଲ ଗାନ୍ଧିଙ୍କ ଦାୟିତ୍ବହୀନ ମନ୍ତବ୍ୟକୁ ନେଇ ପ୍ରତିକ୍ରିୟା ରଖିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ରାହୁଲ ଗାନ୍ଧିଙ୍କୁ ବିହାରର ବ ଅକ୍ଷର ଜଣାନାହିଁ । ତାଙ୍କ ବୟାନର ପ୍ରଭାବ ମହାମେଣ୍ଟର ଅନ୍ୟଦଳକୁ ଭୋଗିବାକୁ ପଡୁଛି । ବିହାରର ପରିଶ୍ରମୀ ଲୋକଙ୍କ ବିଷୟରେ କିଛି କହିବା ପୂର୍ବରୁ ସେମାନଙ୍କର ଅତୀତକୁ ଦେଖିବା ଦରକାର । ସ୍ବାଧୀନତାର ୪୦ ବର୍ଷ ପର୍ଯ୍ୟନ୍ତ ବିହାରରେ କଂଗ୍ରେସ ଶାସନ ଥିଲା । ଏହା ପରେ ୧୫ବର୍ଷ କଂଗ୍ରେସର ସାଥୀ ଦଳ ଆରଜେଡି କ୍ଷମତାରେ ଥିଲା ।

ଏହି ୫୫ ବର୍ଷ ଭିତରେ କଂଗ୍ରେସ ଓ ଆରଜେଡି ବିହାରକୁ ପଛକୁ ଠେଲିବାକୁ କୌଣସି ଅବସର ଛାଡିନାହାନ୍ତି । ୨୦୦୫ରେ ବିହାରର ଲୋକମାନେ ଆରଜେଡିର ଜଂଗଲରାଜକୁ ବିଦାକରି ଏନଡିଏ ସରକାର ଗଠନ କରିଥିଲେ । କିନ୍ତୁ କଂଗ୍ରେସକୁ ଏହା ଭଲ ଲାଗି ନଥିଲା । ୨୦୦୫ରୁ ୨୦୧୪ ପର୍ଯ୍ୟନ୍ତ ୯ ବର୍ଷ କେନ୍ଦ୍ର ସରକାରରେ ରହି କଂଗ୍ରେସ ବିହାରକୁ ସାବତ ବ୍ୟବହାର କରିଥିଲା । ତେଣୁ ରାହୁଲ ଗାନ୍ଧି କୌଣସି ପ୍ରଶ୍ନ ପଚାରିବା ପୂର୍ବରୁ ବିହାର ବାସୀଙ୍କୁ ପୂର୍ବରୁ କରିଥିବା ଅନ୍ୟାୟର ହିସାବ ଦେବା ଦରକାର । ୨୦୦୪ରୁ ୨୦୧୪ ମଧ୍ୟରେ କଂଗ୍ରେସ ଦ୍ବାରା ବିହାରକୁ ଦିଆଯାଇଥିବା ଅନୁଦାନ ଏବଂ ୨୦୧୪ରୁ ୨୦୨୫ ମଧ୍ୟରେ ମୋଦି ସରକାରଙ୍କ ଦ୍ବାରା ବିଭିନ୍ନ ଯୋଜନା ଓ ଅନୁଦାନର ତୁଳନାତ୍ମକ ତଥ୍ୟ ରଖିବାକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ।

ଅନ୍ୟପଟେ ବିହାରରେ ଶେଷ ପର୍ଯ୍ୟାୟରେ ପହଞ୍ଚିଛି ପ୍ରଚାର । ପୁରା ଦମ୍ ଲଗାଇ ଦେଇଛନ୍ତି ସବୁ ଦଳ । ଶନିବାର ବି ମଇଦାନରେ ପ୍ରଧାନମନ୍ତ୍ରୀ ମୋଦି ଏବଂ ଅମିତ ଶାହ କରିବେ ପ୍ରଚାର । ଆସନ୍ତା ୧୧ ତାରିଖରେ ଦ୍ବିତୀୟ ତଥା ଶେଷ ପର୍ଯ୍ୟାୟ ଭୋଟିଂ । ରବିବାର ସଂଧ୍ୟା ସୁଦ୍ଧା ସରିବ ପ୍ରଚାର । ପ୍ରଥମ ପର୍ଯ୍ୟାୟ ମତଦାନ ପରେ ପ୍ରଧାନମନ୍ତ୍ରୀ କହିଛନ୍ତି, "ବିହାରର ଯୁବପିଢ଼ି ମଧ୍ୟ RJDର ମିଛକୁ ପ୍ରତ୍ୟାଖ୍ୟାନ କରିଛନ୍ତି । ବିହାରର ଭୋଟରମାନେ ନରେନ୍ଦ୍ର ମୋଦି ଏବଂ ନୀତିଶ କୁମାରଙ୍କ ଟ୍ରାକ୍ ରେକର୍ଡ ଉପରେ ଭରସା କରୁଛନ୍ତି ।

ତେବେ ବିହାର ନିର୍ବାଚନୀ ମାହୋଲରେ ମହାମେଣ୍ଟର ସ୍ଥିତି ବିଗୁଡ଼ୁଥିବା ବେଳେ ରାହୁଲଙ୍କ ବୟାନ ଅଧିକ ଘାତକ ସାଜୁଛି । ରାହୁଲ ଗାନ୍ଧିଙ୍କ ମିଛ ନାଟକର ପର୍ଦ୍ଦାଫାସ ହୋଇଛି । ତିନି ଦିନ ପୂର୍ବରୁ ଭୋଟର ତାଲିକାରେ ଯେଉଁ ମଡେଲଙ୍କ ନାଁ ଓ ଫଟୋକୁ ନେଇ ରାହୁଲ ପ୍ରଶ୍ନ କରିଥିଲେ ତା'ର ଖୁଲାସା ହୋଇଛି । ରାହୁଲଙ୍କ ମିଛର ପୋଲ୍ ଖୋଲି ଦେଇଛନ୍ତି ନିଜେ ବ୍ରାଜିଲ ମଡେଲ ଲାରିସା । ସେ ପାଲଟା ଆକ୍ରମଣ କରିଛନ୍ତି, ତାଙ୍କର ୧୦ ବର୍ଷ ତଳର ଫଟୋକୁ ବ୍ୟବହାର କରି ଲୋକଙ୍କୁ ଠକିବାକୁ ପ୍ରୟାସ କରାଯାଉଥିବା ସେ କହିଛନ୍ତି । ଭାରତରେ ନିର୍ବାଚନ ସମ୍ପର୍କରେ ତାଙ୍କୁ ବିଶେଷ ଜଣାନାହିଁ । ହରିୟାଣାର ଜଣେ ଭୋଟର ଭାବେ ତାଙ୍କୁ ଚିତ୍ରଣ କରିବାକୁ ହାସ୍ୟାସ୍ପଦ ଓ ପାଗଳାମୀ ବୋଲି କହିଛନ୍ତି ଲାରିସା ।

ରାହୁଲ ଗାନ୍ଧି ଭୋଟ୍ ଚୋରି ଅଭିଯୋଗ ଆଣି ବ୍ରାଜିଲ ମଡେଲଙ୍କ ନାଁ ୧୦ଟି ବୁଥର ଭୋଟର ଲିଷ୍ଟରେ ଥିବା ଦର୍ଶାଇଥିଲେ । ବ୍ରାଜିଲ ମଡେଲ ଲାରିସାଙ୍କ ଫଟୋ ଦେଖାଇ ସେ ହରିୟାଣାର ମୁରଥାଲର ବାସିନ୍ଦା ଗୁନିଆ ବୋଲି ଦର୍ଶାଇଥିଲେ ରାହୁଲ ଗାନ୍ଧି । ଅନୁସନ୍ଧାନରୁ ଜଣାପଡ଼ିଛି ୪ ବର୍ଷ ପୂର୍ବରୁ ଗୁନିଆ ନାମକ ବ୍ୟକ୍ତିଙ୍କର ମୃତ୍ୟୁ ହୋଇଯାଇଛି । ତା ପରେ ତାଙ୍କ ନାଁ ଭୋଟର ତାଲିକାରୁ କଟାଯାଇନାହିଁ । ଶତାଧିକ ଭୋଟରଙ୍କ ସମାନ ଠିକଣାକୁ ନେଇ ବି ପ୍ରଶ୍ନ ଉଠାଇଥିଲେ ରାହୁଲ । ଗତ ମାସରେ ନିର୍ବାଚନ କମିଶନ ବିହାରରେ SIR ଅଭିଯୋଗ ଉପରେ ଜବାବ ଦେବା ସହ ରାହୁଲ ଗାନ୍ଧିଙ୍କୁ ଅଭିଯୋଗ ପ୍ରମାଣିତ କରିବାକୁ ଗୋଟିଏ ସପ୍ତାହ ସମୟ ଦେଇଥିଲେ । କିନ୍ତୁ ମିଛ ଧରାପଡ଼ିବା ପରେ ଚୁପ୍ ହୋଇଯାଇଥିଲେ ରାହୁଲ ।