ମହିଳାଙ୍କ ଉପରେ ହେଉଥିବା ସାମାଜିକ ଅତ୍ୟାଚାର ସଂପର୍କରେ ବଡ଼ ବୟାନ ଦେଇଛନ୍ତି RSS ମୁଖ୍ୟ । ବିଶେଷ କରି 'ଲଭ ଜିହାଦ'ର ନାଁ ନେଇ ସେଭଳି ଅପରାଧ ଆଡ଼କୁ ଇସାରା କରିଛନ୍ତି । ମୋହନ ଭାଗବତ କହିଛନ୍ତି, ଏଭଳି ଅପରାଧକୁ ରୋକିବା ପାଇଁ ପ୍ରଥମେ ପରିବାରରେ ପ୍ରୟାସ ହେବା ଉଚିତ୍ । କାରଣ ମହିଳାଙ୍କ ପାଇଁ ଆମ ଧର୍ମ, ସଂସ୍କୃତି ଓ ସାମାଜିକ ବ୍ୟବସ୍ଥା ସୁରକ୍ଷିତ ରହିଛି ।

ଭୋପାଳରେ 'ସ୍ତ୍ରୀ ଶକ୍ତି ସମ୍ବାଦ' କାର୍ଯ୍ୟକ୍ରମରେ ସମ୍ବୋଧନ କରି ମହିଳାଙ୍କ ସାମାଜିକ ଭାଗିଦାରୀ ବଢ଼ାଇବାକୁ କହିଛନ୍ତି ମୋହନ ଭାଗବତ । ପିଲାମାନଙ୍କୁ ଭଲ କ'ଣ, ଖରାପ କ'ଣ ତାର ଶିକ୍ଷା ମା' ଦେଇଥାଏ । ଏବେ ପରିବାରରେ ମିଳାମିଶା ଓ ପରସ୍ପର ମଧ୍ୟରେ କଥାବାର୍ତ୍ତାର ଅବସର କମିଯାଉଥିବାରୁ ପିଲାଙ୍କର ଉଚିତ୍ ଶିକ୍ଷା ପ୍ରଭାବିତ ହେଉଛି । ପୂର୍ବରୁ ସାମାଜିକ ବ୍ୟବସ୍ଥାରେ ମହିଳା ଓ ପୁରୁଷଙ୍କ ଭାଗିଦାରୀ ସମାନ ଥିଲା । ପରବର୍ତ୍ତୀ ସମୟରେ ସୁରକ୍ଷା ଦୃଷ୍ଟିରୁ ମହିଳାଙ୍କୁ ବିଭିନ୍ନ ବନ୍ଧନରେ ବାନ୍ଧିଦିଆଗଲା ।

ଏବେ ସମାଜରେ ପରିବର୍ତ୍ତନ ଆସିଥିଲେ ବି ମହିଳାଙ୍କୁ ସେହି ବନ୍ଧନରୁ ମୁକ୍ତ କରିବା କଥା ଆମେ ଭୁଲି ଯାଇଛେ । ତେଣୁ ପରିବାର ଭିତରେ ଆଲୋଚନା, ମହିଳାଙ୍କ ଆତ୍ମବିଶ୍ବାସ ଓ ଆତ୍ମରକ୍ଷା ସହ ଅପରାଧୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ହିଁ ମହିଳା ବିରୋଧୀ ଅପରାଧକୁ ରୋକି ପାରିବ ।