ସୁନା ଚୋରା ଚାଲାଣରେ ସମ୍ପୃକ୍ତ ଅଭିନେତ୍ରୀ । ମିଳିଲା ୧୪.୮ କେଜି ସୁନା । ଜଣେ ଅଭିନେତ୍ରୀଙ୍କ ଠାରୁ ବିପୁଳ ପରିମାଣର ସୁନା ଜବତ କରିଛି ବେଙ୍ଗାଲୁରୁର ରାଜସ୍ଵ ଗୁଇନ୍ଦା ନିର୍ଦ୍ଦେଶାଳୟ (DRI) । ସୁନା ତସ୍କରୀ ମାମଲାରେ ବଡ଼ ସଫଳତା ମିଳିଛି । କେମ୍ପେଗୌଡ଼ା ଅନ୍ତର୍ଜାତୀୟ ବିମାନବନ୍ଦରରୁ ଅଭିନେତ୍ରୀଙ୍କ ଠାରୁ ୧୪ କେଜିରୁ ଅଧିକ ସୁନା ଜବତ କରାଯିବା ସହ ତାଙ୍କୁ ଗିରଫ କରାଯାଇଛି ।

ଗିରଫ ଜଣଙ୍କ ହେଉଛନ୍ତି କନ୍ନଡ଼ ଅଭିନେତ୍ରୀ ରାନ୍ୟା ରାଓ (Ranya Rao) । ବାରମ୍ବାର ବିଦେଶ ଯାଉଥିବା ରାନ୍ୟାଙ୍କ ଉପରେ ଦୀର୍ଘ ଦିନରୁ ନଜର ରଖିଥିଲା ରାଜସ୍ଵ ଗୁଇନ୍ଦା ନିର୍ଦ୍ଦେଶାଳୟ । ମାର୍ଚ୍ଚ ୩ ତାରିଖରେ ରାନ୍ୟା ଦୁବାଇରୁ ଏମିରେଟ୍‌ସ ବିମାନରେ ଫେରିଥିଲେ ବେଙ୍ଗାଲୁରୁ । ଆଉ ଯାଞ୍ଚ ବେଳେ ତାଙ୍କ ନିକଟରୁ ମିଳିଥିଲା ୧୪ କେଜିରୁ ଅଧିକ ସୁନା । ଏହା ପରେ କନ୍ନଡ଼ ଅଭିନେତ୍ରୀ ରାନ୍ୟା ରାଓଙ୍କୁ ଡିଆରଆଇ ଗିରଫ କରିଛି ।

ରାଜସ୍ଵ ଗୁଇନ୍ଦା ନିର୍ଦ୍ଦେଶାଳୟର ସୂଚନା ଅନୁସାରେ, ଅଭିନେତ୍ରୀ ରାନ୍ୟା ଅଧିକାଂଶ ସୁନାକୁ ପିନ୍ଧିଥିଲେ । ଏଥିସହ କେତେକ ସୁନା ଅଳଙ୍କାରକୁ ପୋଷାକରେ ଲୁଚାଇ ରଖିଥିଲେ । ଅଭିନେତ୍ରୀ ରାନ୍ୟା ରାଓ ହେଉଛନ୍ତି ଆଇପିଏସ୍‌ ରାମଚନ୍ଦ୍ର ରାଓଙ୍କ ଝିଅ । ରାମଚନ୍ଦ୍ର ଏବେ କର୍ଣ୍ଣାଟକ ପୋଲିସର ହାଉସିଂ କର୍ପୋରେସନ୍ ଡିଜିପି ଅଛନ୍ତି ।
ରାନ୍ୟା ଗିରଫ ପରେ ଏବେ ଆଇପିଏସ୍‌ ବାପା ବି ରାଜସ୍ଵ ଗୁଇନ୍ଦା ନିର୍ଦ୍ଦେଶାଳୟ ସ୍କାନରକୁ ଆସିଛନ୍ତି । ରାନ୍ୟାଙ୍କ ସୁନା ଚାଲାଣରେ ପୋଲିସ କିମ୍ବା ଅନ୍ୟ ଏଜେନ୍ସିର କର୍ମଚାରୀଙ୍କ ସହଯୋଗ ରହିଥିଲା କି ? ଏବେ ଏସବୁ ଦିଗରେ ଖୋଳତାଡ଼ କରୁଛି ବେଙ୍ଗାଲୁରୁ ରାଜସ୍ଵ ଗୁଇନ୍ଦା ନିର୍ଦ୍ଦେଶାଳୟ ।

DGPଙ୍କ ଝିଅ କହି ଟାଳୁଥିଲେ ଯାଞ୍ଚ

ଡିଆରଆଇ ଅନୁସାରେ, ବିମାନବନ୍ଦରରେ ପହଞ୍ଚିବା ପରେ ରାନ୍ୟା ନିଜକୁ ଡିଜିପିଙ୍କ ଝିଅ କହିବା ସହ ସେଠାରେ ମୁତୟନ ଥିବା ପୋଲିସ କର୍ମୀଙ୍କୁ ଡାକି ଘରେ ଛାଡ଼ିବାକୁ କହିଥାନ୍ତି । ଏବେ ଡିଆରଆଇ ଯାଞ୍ଚ କରୁଛି କି, କଣ ସେହି ପୋଲିସ କର୍ମଚାରୀମାନେ ଏହି ଗୋଲ୍ଡ ସ୍ମଗଲିଂରେ ସାମିଲ୍ ? ନା ଅଜାଣତରେ ସେମାନଙ୍କୁ ବ୍ୟବହାର କରୁଥିଲେ ରାନ୍ୟା ?

ତଥ୍ୟ ଅନୁସାରେ, ରାନ୍ୟା ଗତ ୧୫ ଦିନରେ ଚାରି ଚାରି ଥର ଦୁବାଇ ଯାଇଛନ୍ତି । ଆଉ ଏହା ହିଁ ରାଜସ୍ଵ ଗୁଇନ୍ଦା ନିର୍ଦ୍ଦେଶାଳୟକୁ ଚମକାଇ ଦେଇଥିଲା । ଏହା ପରେ ରାନ୍ୟାଙ୍କ ଉପରେ ନଜର ରଖିବା ଆରମ୍ଭ କରିଥିଲା ଡିଆରଆଇ । ଆଉ ମିଳିଥିବା ପୂର୍ବ ସୂଚନା ଅନୁସାରେ ରାନ୍ୟା ଦୁବାଇରୁ ବିପୁଳ ସୁନା ନେଇ ବେଙ୍ଗାଲୁରୁ ଆସିବା ବେଳେ ଡିଆରଆଇ ହାତରେ ଧରା ପଡ଼ିଛନ୍ତି । ୧୪.୮ କେଜି ସୁନା ଜବତ ହୋଇଥିବା ବେଳେ ଏହାର ବଜାର ମୂଲ୍ୟ ୧୨ କୋଟି ଟଙ୍କା ହେବ ।

Argus News | argus news | -Argusnews Home: Odisha Latest News, Breaking News, Trending News, Live TV and more