ଇବୋଲା ଭାଇରସ ସଂକ୍ରମଣ ଚିନ୍ତା ଥିବାରୁ ଭାରତ ଏବଂ ଆଫ୍ରିକୀୟ ସଂଘ ମେ ୨୮-୩୧ ପର୍ଯ୍ୟନ୍ତ ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଥିବା ଭାରତ-ଆଫ୍ରିକା ଫୋରମ୍ ଶିଖର ସମ୍ମିଳନୀକୁ ସ୍ଥଗିତ ରଖାଯାଇଛି। ବୈଦେଶିକ ବ୍ୟାପାର ମନ୍ତ୍ରଣାଳୟ (MEA) ସ୍ଥଗିତ ହେବାର କାରଣ ସ୍ପଷ୍ଟ ଭାବରେ ଉଲ୍ଲେଖ କରିନାହିଁ କିନ୍ତୁ କହିଛି ଯେ ଆଫ୍ରିକୀୟ ଦେଶମାନଙ୍କ ସହିତ ପରାମର୍ଶ କରିବା ପରେ ଶିଖର ସମ୍ମିଳନୀର ନୂତନ ତାରିଖ ସ୍ଥିର କରାଯିବ।
ଭାରତ-ଆଫ୍ରିକୀୟ ୟୁନିଅନ କମିଶନଙ୍କ ସହଯୋଗରେ ମେ ୨୮-୩୧ ଯାଏଁ ନୂଆଦିଲ୍ଲୀରେ ଚତୁର୍ଥ ଭାରତ-ଆଫ୍ରିକା ଫୋରମ୍ ଶିଖର ସମ୍ମିଳନୀ (IAFS-IV) ଆୟୋଜନ କରିବାକୁ ସ୍ଥିର କରାଯାଇଥିଲା । ଏହାର ଲକ୍ଷ୍ୟ ଥିଲା ଭାରତ-ଆଫ୍ରିକା ସହଭାଗୀତାକୁ ସୁଦୃଢ଼ କରିବା ଏବଂ ବିବିଧ କ୍ଷେତ୍ରରେ ସହଯୋଗକୁ ଆହୁରି ବିସ୍ତାର କରିବା ପାଇଁ ଏକ ରୋଡମ୍ୟାପ୍ ପ୍ରସ୍ତୁତ କରିବା। 

ଏହାସହ ପଢ଼ନ୍ତୁ: ଇବୋଲାକୁ ନେଇ ଦିଲ୍ଲୀ ବିମାନବନ୍ଦରରେ ସତର୍କତା, ଯାତ୍ରୀଙ୍କ ପାଇଁ ପରାମର୍ଶ ଜାରି

ପୂର୍ବ ସଂସ୍କରଣ ତିନି ସଂସ୍କରଣ ୨୦୦୮, ୨୦୧୧ ଏବଂ ୨୦୧୫ରେ ଅନୁଷ୍ଠିତ ହୋଇଥିଲା । ୧୦ ବର୍ଷର ବ୍ୟବଧାନ ପରେ ଏହି ଶିଖର ସମ୍ମିଳନୀ ଅନୁଷ୍ଠିତ ହେବାକୁ ସ୍ଥିର ହୋଇଥିଲା । ଗୁରୁବାର କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ "ଉଚ୍ଚ ବିପଦପୂର୍ଣ୍ଣ ଦେଶ"ରୁ ଭାରତୀୟ ବନ୍ଦର, ବିମାନବନ୍ଦର ଏବଂ ସମସ୍ତ ପ୍ରବେଶ ସ୍ଥାନରେ ଇବୋଲା ସମ୍ପର୍କରେ ଯାତ୍ରୀମାନଙ୍କ ପାଇଁ ଏକ ପରାମର୍ଶ ଜାରି କରିଥିଲା ।

ଆଡଭାଇଜରିରେ କୁହାଯାଇଥିଲା, ଯଦି କୌଣସି ବ୍ୟକ୍ତି ଡିଆର କଙ୍ଗୋ, ଉଗାଣ୍ଡା ଏବଂ ଦକ୍ଷିଣ ସୁଦାନରୁ ଫେରୁଛନ୍ତି ସେମାନଙ୍କ ସ୍ୱାସ୍ଥ୍ୟ ଯାଞ୍ଚ କରାଯିବ । ବିମାନବନ୍ଦରରେ ସ୍କ୍ରିନିଂ, କ୍ୱାରେଣ୍ଟାଇନ୍ ପ୍ରୋଟୋକଲ, ମାମଲା ପରିଚାଳନା, ରେଫରାଲ୍ ବ୍ୟବସ୍ଥା ଏବଂ ଲ୍ୟାବ ପରୀକ୍ଷା ପାଇଁ ଏସଓପି କରିବାକୁ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ନିର୍ଦ୍ଦେଶ ଦିଆଯାଇଛି ।

• କଙ୍ଗୋରେ ଇବୋଲା ପ୍ରକୋପରେ ୧୩୬ ଜଣଙ୍କର ମୃତ୍ୟୁ

ଡେମୋକ୍ରାଟିକ୍ ରିପବ୍ଲିକ୍ ଅଫ୍ କଙ୍ଗୋ (DRC)ରେ ଇବୋଲା ପ୍ରକୋପ ବୃଦ୍ଧି ପାଇଛି। ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ଏହାକୁ ଅନ୍ତର୍ଜାତୀୟ ଚିନ୍ତାର ଏକ ସାର୍ବଜନୀନ ସ୍ୱାସ୍ଥ୍ୟ ଜରୁରୀକାଳୀନ ପରିସ୍ଥିତି ଘୋଷଣା କରିଛି। ଏହି ଆଫ୍ରିକୀୟ ଦେଶରେ ଏହି ପ୍ରକୋପରେ ଏବେ ୧୩୬ ରୁ ଅଧିକ ଲୋକଙ୍କର ମୃତ୍ୟୁ ହୋଇସାରିଛି।

ଭାରତ ଆଫ୍ରିକୀୟ ମହାଦେଶ ସହିତ ସମ୍ପର୍କକୁ ସୁଦୃଢ଼ କରିବା ପାଇଁ ସମ୍ମିଳନୀରେ ଯୋଜନା ଉପସ୍ଥାପନ କରିବାକୁ ଯୋଜନା କରିଥିଲା। ଅନେକ ଆଫ୍ରିକୀୟ ଦେଶର ଶୀର୍ଷ ନେତାମାନେ ପୂର୍ବରୁ ସେମାନଙ୍କର ଅଂଶଗ୍ରହଣ ନିଶ୍ଚିତ କରିସାରିଛନ୍ତି। କିନ୍ତୁ ଏହାକୁ ଏବେ କିଛି ଦିନ ପାଇଁ ବନ୍ଦ କରାଯାଇଛି। ଜ୍ବର, ଦୁର୍ବଳତା, ଥକ୍କାପଣ, ମୁଣ୍ଡବିନ୍ଧା, ମାଂସପେଶୀ ଯନ୍ତ୍ରଣା, ବାନ୍ତି, ଡାଇରିଆ ଭଳି ଲକ୍ଷଣ ଅନୁଭବ କରୁଥିବା ଲୋକଙ୍କୁ ଇମିଗ୍ରେସନ ଯାଞ୍ଚ ପାଇଁ ଯିବା ପୂର୍ବରୁ ବିମାନବନ୍ଦର ସ୍ବାସ୍ଥ୍ୟ ଅଧିକାରୀଙ୍କୁ ରିପୋର୍ଟ କରିବାକୁ କୁହାଯାଇଛି।