ନୂଆଦିଲ୍ଲୀ: କଂଗ୍ରେସର 'ଭୋଟ୍ ଚୋରି' ଅଭିଯୋଗର କଡ଼ା ଜବାବ ରଖିଲେ ଭାରତୀୟ ନିର୍ବାଚନ କମିଶନ । କଂଗ୍ରେସ ନାଁ ନ ନେଇ ମୁଖ୍ୟ ନିର୍ବାଚନ କମିଶନର ବର୍ଷିଛନ୍ତି । କହିଛନ୍ତି, 'ଭୋଟ୍ ଚୋରି' ଶବ୍ଦ ଯୋଡ଼ି ଲୋକଙ୍କୁ ଭ୍ରମିତ କରୁଛନ୍ତି ରାଜନୈତିକ ଦଳ । ନିର୍ବାଚନ କମିଶନଙ୍କ କାନ୍ଧରେ ବନ୍ଧୁକ ରଖି ମତଦାତାଙ୍କୁ ଟାର୍ଗେଟ୍ କରାଯାଉଥିବା କହିଛନ୍ତି । ଏପରିକି 'ଭୋଟ୍ ଚୋରି' ଶବ୍ଦ ସମ୍ବିଧାନର ଅପମାନ ବୋଲି ଅଭିହିତ କରିଛନ୍ତି ନିର୍ବାଚନ କମିଶନ ।

ଇସିଆଇ କହିଛନ୍ତି, ପ୍ରତିଟି ରାଜନୈତିକ ଦଳର ଜନ୍ମ ନିର୍ବାଚନ କମିଶନଙ୍କ ନିକଟରେ ପଞ୍ଜୀକରଣରୁ ହୁଏ । ତେଣୁ ନିର୍ବାଚନ କମିଶନ ସେହି ରାଜନୈତିକ ଦଳ ସହ ଭେଦଭାବ କେମିତି କରିବେ ? ନିର୍ବାଚନ କମିଶନଙ୍କ ପାଇଁ କେହି ପକ୍ଷ କି ବିପକ୍ଷ ନୁହଁନ୍ତି । କମିଶନ କେବେ ସାମ୍ବିଧାନିକ କର୍ତ୍ତବ୍ୟରୁ ପଛକୁ ହଟିବେ ନାହିଁ ।

ବିଗତ ୨ ଦଶନ୍ଧି ଧରି ପ୍ରାୟ ସବୁ ରାଜନୈତିକ ଦଳ ମତଦାତା ସୂଚୀରେ ସୁଧାର ପାଇଁ ଦାବି କରି ଆସୁଛନ୍ତି । ଏଥିପାଇଁ ନିର୍ବାଚନ କମିଶନ S.I.Rର ଆରମ୍ଭ ବିହାରରୁ ଆରମ୍ଭ କରିଛନ୍ତି । ଏହି ପ୍ରକ୍ରିୟାରେ ସମସ୍ତ ମତଦାତା, ବୁଥ୍ ଲେବଲ ଅଫିସର ଓ ସବୁ ରାଜନୈତିକ ଦଳ ଦ୍ଵାରା ନାମିତ ୧.୬ ଲକ୍ଷ ବିଏଲ୍‌ଏ ମିଳିତ ଭାବେ ଏକ ପ୍ରାରମ୍ଭ ସୂଚୀ ପ୍ରସ୍ତୁତ କରିଛନ୍ତି । ପ୍ରାରମ୍ଭିକ ସୂଚୀରେ ତ୍ରୁଟି ହଟାଇବା ଲାଗି ସମସ୍ତ ମତଦାତା, ରାଜନୈତିକ ଦଳ ମିଶି ଯୋଗଦାନ ଦେଉଛନ୍ତି ।

ବିହାର S.I.R ପାଇଁ ଅଗଷ୍ଟ ୧ରୁ ସେପ୍ଟେମ୍ବର ୧ ପର୍ଯ୍ୟନ୍ତ ସମୟ ନିର୍ଦ୍ଧାରଣ ହୋଇଛି । ଏବେ ବି ୧୫ ଦିନ ସମୟ ବାକି ଅଛି । ତେଣୁ ପ୍ରତିଟି ରାଜନୈତିକ ଦଳକୁ ନିର୍ବାଚନ କମିଶନ ଆହ୍ଵାନ କରୁଛନ୍ତି ମତଦାତା ସୂଚୀରେ କୌଣସି ତ୍ରୁଟି ଥିଲେ ଅଭିଯୋଗ କରନ୍ତୁ । ସବୁ ଦଳ ପାଇଁ ନିର୍ବାଚନ କମିଶନଙ୍କ ଦ୍ଵାର ଖୋଲା ରହିଛି । ସମସ୍ତେ ମିଳିମିଶି ପାରଦର୍ଶୀ ଭାବେ କାମ କରୁଛନ୍ତି ।

ପାଦ ସହ ପାଦ ମିଶାଇ ବିହାର S.I.Rକୁ ସଫଳ କରିବା ପାଇଁ ସମସ୍ତେ ଉଦ୍ୟମ କରୁଛନ୍ତି । ବିହାରର ୭ କୋଟିରୁ ଅଧିକ ମତଦାତା ନିର୍ବାଚନ କମିଶନଙ୍କ ସହ ଛିଡ଼ା ହୋଇଛନ୍ତି । ତେଣୁ ନିର୍ବାଚନ କମିଶନ ଓ ମତଦାତାଙ୍କ ଉପରେ କୌଣସି ପ୍ରଶ୍ନ ଗ୍ରହଣୀୟ ନୁହେଁ । ଭୋଟ୍ ଚୋରି ଭଳି ଶବ୍ଦର ବ୍ୟବହାର ଭାରତୀୟ ସମ୍ବିଧାନର ଅପମାନ ବୋଲି କହିଛନ୍ତି ନିର୍ବାଚନ କମିଶନ ।

ନିର୍ବାଚନ କମିଶନ କହିଛନ୍ତି, ଲୋକସଭା ନିର୍ବାଚନ ପ୍ରକ୍ରିୟାରେ ୧କୋଟିରୁ ଅଧିକ କର୍ମଚାରୀ, ୧୦ ଲକ୍ଷରୁ ଅଧିକ ବୁଥ୍ ଲେବୁଲ୍ ଏଜେଣ୍ଟ, ୨୦ ଲକ୍ଷରୁ ଅଧିକ ପ୍ରାର୍ଥୀଙ୍କ ପୁଲିଂ ଏଜେଣ୍ଟ କାମ କରନ୍ତି । ଏତେ ଲୋକ ଓ ପାରଦର୍ଶୀ ପ୍ରକ୍ରିୟାରେ କ'ଣ ଭୋଟ୍ ଚୋରି କରାଯାଇ ପାରିବ ବୋଲି ପ୍ରଶ୍ନ କରିଛନ୍ତି ନିର୍ବାଚନ କମିଶନ ।

ଭୋଟଚୋରି ନେଇ ରାଜନୈତିକ ଦଳ କରୁଥିବା ମିଥ୍ୟା ଅଭିଯୋଗକୁ ନେଇ ନିର୍ବାଚନ କମିଶନ କି ମତଦାତା ଡରୁନାହାନ୍ତି । ନିର୍ବାଚନ କମିଶନଙ୍କ କାନ୍ଧରେ ବନ୍ଧୁକ ରଖି ଭାରତର ମତଦାତାଙ୍କୁ ଟାର୍ଗେଟ୍ କରାଯାଇ ରାଜନୀତି କରାଯାଉଛି । ନିର୍ବାଚନ କମିଶନ କାହାକୁ ନ ଡରି ସମସ୍ତ ବର୍ଗ, ସମସ୍ତ ଧର୍ମର ମତଦାତାଙ୍କ ସହିତ କୌଣସି ଭେଦଭାବ ନ କରି କାନ୍ଥ ଭଳି ଛିଡ଼ା ହୋଇଛନ୍ତି ଆଗକୁ ମଧ୍ୟ ହେବେ ।

ଦେଶ ସମ୍ପର୍କିତ ଅଧିକ ଖବର ପଢ଼ନ୍ତୁ

Argus News | argus news | Odisha Latest News, Breaking News, Trending News, Live TV