2027 Assembly Elections / ୨୦୨୭ ବିଧାନସଭା ନିର୍ବାଚନ: ୟୁପି, ପଞ୍ଜାବ ସମେତ ୫ ରାଜ୍ୟରେ ଅଧିକାରୀଙ୍କ ବଦଳି ପାଇଁ ECIଙ୍କ ନିର୍ଦ୍ଦେଶ

ନୂଆଦିଲ୍ଲୀ: ୨୦୨୭ରେ ହେବାକୁ ଥିବା ବିଧାନସଭା ନିର୍ବାଚନ ପୂର୍ବରୁ ୫ଟି ରାଜ୍ୟରେ ନିର୍ବାଚନ ସହ ଜଡ଼ିତ ଅଧିକାରୀଙ୍କ ବଦଳି ପାଇଁ ନିର୍ଦ୍ଦେଶ ଦେଇଛନ୍ତି ଭାରତୀୟ ନିର୍ବାଚନ ଆୟୋଗ (ECI) । ଏହି ତାଲିକାରେ ଗୋଆ, ମଣିପୁର, ପଞ୍ଜାବ, ଉତ୍ତର ପ୍ରଦେଶ ଓ ଉତ୍ତରାଖଣ୍ଡ ରହିଛି ।

ନିର୍ବାଚନ ପରିଚାଳନାରେ ନିୟୋଜିତ ଅଧିକାରୀମାନେ ନିରପେକ୍ଷ ଭାବେ କାମ କରିବା ସହ ସମାନ ଜିଲ୍ଲାରେ ଦୀର୍ଘ ସମୟ ଧରି ରହିବାରେ ବ୍ରେକ୍ ଦେବା ଏହି ନିର୍ଦ୍ଦେଶନାମାର ଉଦ୍ଦେଶ୍ୟ । ନିଜ ଗୃହ ଜିଲ୍ଲାରେ ଥିବା ଓ ଗୋଟିଏ ସ୍ଥାନରେ ୩ ବର୍ଷ କାର୍ଯ୍ୟକାଳ ପୂରଣ କରୁଥିବା ଅଧିକାରୀଙ୍କ ବଦଳି କରାଯିବ ।

୨୦୨୬ ଅକ୍ଟୋବର ୨୭ରେ ଜାରି ହୋଇଥିବା ନିର୍ଦ୍ଦେଶ ଅନୁସାରେ, ନିଜ ଗୃହ ଜିଲ୍ଲାରେ ନିଯୁକ୍ତ ଥିବା କିମ୍ବା ନିର୍ଦ୍ଧାରିତ ସମୟ ମଧ୍ୟରେ ଗୋଟିଏ ଜିଲ୍ଲାରେ ୩ ବର୍ଷ କାର୍ଯ୍ୟକାଳ ପୂରଣ କରୁଥିବା କେତେକ ଅଧିକାରୀଙ୍କୁ ଅନ୍ୟତ୍ର ବଦଳି କରିବାକୁ ପଡ଼ିବ । ଏହି ପ୍ରକ୍ରିୟା ଶେଷ କରି ନଭେମ୍ବର ୩୦ ସୁଦ୍ଧା ରିପୋର୍ଟ ଦାଖଲ କରିବାକୁ ରାଜ୍ୟ ସରକାରଙ୍କୁ କୁହାଯାଇଛି ।

କେଉଁ ଅଧିକାରୀ ବଦଳିବେ ?

ନିର୍ବାଚନ ଆୟୋଗଙ୍କ ନିର୍ଦ୍ଦେଶ ଅନୁସାରେ, ନିର୍ବାଚନ ପରିଚାଳନା ସହ ସିଧାସଳଖ ଜଡ଼ିତ ବିଭିନ୍ନ ବିଭାଗର ଅଧିକାରୀ ଏହାର ପରିସରଭୁକ୍ତ ହେବେ ।

ସେମାନଙ୍କ ମଧ୍ୟରେ ରହିଛନ୍ତି:

• ଜିଲ୍ଲା ନିର୍ବାଚନ ଅଧିକାରୀ (DEO) ଓ ରିଟର୍ଣ୍ଣିଂ ଅଫିସର (RO)
  
• ଅତିରିକ୍ତ ଜିଲ୍ଲା ମାଜିଷ୍ଟ୍ରେଟ୍‌ (ADM), ଉପଜିଲ୍ଲା ମାଜିଷ୍ଟ୍ରେଟ୍‌ (SDM), ତହସିଲଦାର ଓ ବ୍ଲକ୍‌ ଉନ୍ନୟନ ଅଧିକାରୀ (BDO)
  
• ଡିଭିଜନାଲ୍‌ ଓ ମ୍ୟୁନିସିପାଲ୍‌ କମିଶନର
  
• ପୋଲିସ ବିଭାଗର ନିର୍ବାଚନ ସମ୍ପୃକ୍ତ ଅଧିକାରୀ
  
• ଅବକାରୀ ଓ ପରିବହନ ବିଭାଗର ନିର୍ଦ୍ଧାରିତ ପଦବୀର ଅଧିକାରୀ
  

ତେବେ ରାଜ୍ୟ ମୁଖ୍ୟାଳୟରେ କାର୍ଯ୍ୟରତ ଅଧିକାରୀ ଏବଂ ନିର୍ବାଚନ ସହ ସିଧାସଳଖ ଜଡ଼ିତ ନଥିବା ଡାକ୍ତର, ଇଞ୍ଜିନିୟର ଓ ଶିକ୍ଷକଙ୍କ ଭଳି କର୍ମଚାରୀଙ୍କୁ ସାଧାରଣତଃ ଏହି ବଦଳି ନିୟମରୁ ବାଦ୍‌ ଦିଆଯାଇଛି ।

କେଉଁ ରାଜ୍ୟ ପାଇଁ କେତେ ତାରିଖ ଧାର୍ଯ୍ୟ ?

ନିର୍ବାଚନ ଆୟୋଗ ଅଧିକାରୀଙ୍କ କାର୍ଯ୍ୟକାଳ ଗଣନା ପାଇଁ ଦୁଇଟି ଅଲଗା ତାରିଖ ଧାର୍ଯ୍ୟ କରିଛନ୍ତି । ଗୋଆ, ମଣିପୁର, ପଞ୍ଜାବ ଓ ଉତ୍ତରାଖଣ୍ଡ ପାଇଁ ୩୧ ମାର୍ଚ୍ଚ ୨୦୨୭କୁ ଆଧାର କରି କାର୍ଯ୍ୟକାଳ ଗଣନା ହେବ । ସେହିଭଳି ଉତ୍ତର ପ୍ରଦେଶରେ ୩୧ ମେ ୨୦୨୭କୁ ଆଧାର କରି କାର୍ଯ୍ୟକାଳ ଗଣନା ହେବ ।

ଗତ ୪ ବର୍ଷ ମଧ୍ୟରେ ଗୋଟିଏ ଜିଲ୍ଲାରେ ୩ ବର୍ଷ କାମ କରିଥିବା କିମ୍ବା ଉପରୋକ୍ତ ଧାର୍ଯ୍ୟ ତାରିଖ ସୁଦ୍ଧା ୩ ବର୍ଷ ପୂରଣ କରୁଥିବା ଅଧିକାରୀଙ୍କୁ ନିୟମ ଅନୁସାରେ ବଦଳି କରାଯିବ । ସେହି ଜିଲ୍ଲାରେ ପଦୋନ୍ନତି ପାଇ ଅନ୍ୟ ପଦବୀରେ ରହିଥିବା ସମୟକୁ ମଧ୍ୟ କାର୍ଯ୍ୟକାଳ ଗଣନାରେ ଧରାଯିବ ।

କେବେ ସରିବ ବିଧାନସଭାର କାର୍ଯ୍ୟକାଳ ?

ଏହି ୫ଟି ରାଜ୍ୟରେ ୨୦୨୭ରେ ବିଧାନସଭା ନିର୍ବାଚନ ହେବାର ଯୋଜନା ରହିଛି । ଗୋଆ, ମଣିପୁର, ପଞ୍ଜାବ ଓ ଉତ୍ତରାଖଣ୍ଡର ବିଧାନସଭାର କାର୍ଯ୍ୟକାଳ ମାର୍ଚ୍ଚ ୨୦୨୭ରେ ଶେଷ ହେଉଥିବାବେଳେ ଉତ୍ତର ପ୍ରଦେଶ ବିଧାନସଭାର କାର୍ଯ୍ୟକାଳ ୨୨ ମେ ୨୦୨୭ରେ ଶେଷ ହେବ । ନିର୍ବାଚନ ଆୟୋଗଙ୍କ ଏହି ନିର୍ଦ୍ଦେଶ ନିର୍ବାଚନ ପୂର୍ବରୁ ପ୍ରଶାସନିକ ଓ ପୋଲିସ ବ୍ୟବସ୍ଥାକୁ ନିରପେକ୍ଷ ରଖିବା ପାଇଁ ନିଆଯାଇଛି ।