ବ୍ଲାକ୍ ମନି ଓ ମନିଲଣ୍ଡ୍ରିଂ ସମ୍ପର୍କିତ ଏକ ହାଇପ୍ରୋଫାଇଲ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ବଡ଼ କାର୍ଯ୍ୟାନୁଷ୍ଠାନ ନେଇଛି। ରବର୍ଟ ଭଦ୍ରାଙ୍କୁ ପ୍ରଥମ ଥର ଅଧିକାରିକ ଭାବେ ଅଭିଯୁକ୍ତ କରିଛି। ଲଣ୍ଡନ ପ୍ରପର୍ଟି ଓ କଥିତ କଳାଧନ ନେଣଦେଣ ସମ୍ପର୍କିତ ମାମଲାରେ ଇଡି ଦିଲ୍ଲୀ ରାଉଜ ଏଭେନ୍ୟୁ କୋର୍ଟରେ ନୂଆ ଚାର୍ଜସିଟ୍ ମଧ୍ୟ ଦାଖଲ କରିଛି।

ଏହି ମାମଲା ୟୁକେର ଡିଫେନ୍ସ ଡିଲର ସଞ୍ଜୟ ଭଣ୍ଡାରୀ ସମ୍ପର୍କିତ ସନ୍ଦିଗ୍ଧ ନେଣଦେଣ ଯାଞ୍ଚରୁ ସାମ୍ନାକୁ ଆସିଥିଲା। ରବର୍ଟ ଭଦ୍ରାଙ୍କ ବିରୋଧରେ ଇଡି ଯାଞ୍ଚ ଲଣ୍ଡନସ୍ଥିତ ଦୁଇଟି ସମ୍ପତ୍ତି ସମ୍ପର୍କିତ, ଯାହା ବ୍ରିଟେନର ଅସ୍ତ୍ରଶସ୍ତ୍ର ବ୍ୟବସାୟୀ ସଞ୍ଜୟ ଭଣ୍ଡାରୀଙ୍କ ନାମରେ ପଞ୍ଜିକୃତ। ତେବେ ଏହି ସମ୍ପତ୍ତି ଭଦ୍ରାଙ୍କ ବେନାମୀ ସମ୍ପତ୍ତି ବୋଲି ଇଡି ଦାବି କରୁଛି।

ପୂର୍ବରୁ ମଧ୍ୟ ରବର୍ଟ ଭଦ୍ରା ଜମି ଜାଲିଆତି ମାମଲାରେ EDର ସମ୍ମୁଖୀନ ହୋଇଛନ୍ତି । ଗତ ଅଗଷ୍ଟ ମାସରେ ଏକ ମନି ଲଣ୍ଡରିଂ ମାମଲାରେ, ପ୍ରବର୍ତ୍ତନ ନିର୍ଦ୍ଦେଶାଳୟ ପ୍ରକାଶ କରିଛି ଯେ ଗୁରୁଗ୍ରାମରେ ଏକ ଜାଲ ଜମି ଚୁକ୍ତିନାମା ମାଧ୍ୟମରେ ସେ ୫୮ କୋଟି ଟଙ୍କା ଆୟ କରିଥିଲେ। ଭଦ୍ରା ଏବଂ ଅନ୍ୟମାନଙ୍କ ବିରୁଦ୍ଧରେ ଦାଖଲ ହୋଇଥିବା ଚାର୍ଜସିଟରେ, ଇଡି କହିଥିଲା ଯେ ୫୩ କୋଟି ଟଙ୍କା ସ୍କାଏ ଲାଇଟ୍ ହସପିଟାଲିଟି ମାଧ୍ୟମରେ ଏବଂ ୫ କୋଟି ଟଙ୍କା ବ୍ଲୁ ବ୍ରିଜ୍ ଟ୍ରେଡିଂ ମାଧ୍ୟମରେ ପଠାଯାଇଥିଲା।

ପଚରାଉଚରା ସମୟରେ ରବର୍ଟ ଭଦ୍ରା ତିନି ଜଣ ମୃତ ବ୍ୟକ୍ତିଙ୍କୁ ଏହି ଠକେଇର ଅଭିଯୁକ୍ତ କରିଥିଲେ। ସେମାନେ ହେଲେ ଏଚ୍.ଏଲ୍ ପହୱା, ରାଜେଶ ଖୁରାନା ଏବଂ ମହେଶ ନାଗର । ଗୁରୁଗ୍ରାମ ଜମି ଚୁକ୍ତିନାମାରେ ପ୍ରବର୍ତ୍ତନ ନିର୍ଦ୍ଦେଶାଳୟର ତଦନ୍ତରେ ରବର୍ଟ ଭାଡ୍ରାଙ୍କ ବୟାନ ଦୁଇଥର ରେକର୍ଡ କରାଯାଇଥିଲା, ପ୍ରଥମେ ୧୫ ଏପ୍ରିଲ୍ ଏବଂ ଦ୍ୱିତୀୟ ଥର ୧୬ ଏପ୍ରିଲରେ। ଜେରାବେଳେ ରବର୍ଟ କହିଥିଲେ ଯେ ମୃତବ୍ୟକ୍ତିମାନେ ତାଙ୍କ ପାଇଁ କାମ କରୁଥିଲେ । କିନ୍ତୁ ଏନେଇ ସେ କୌଣସି ପ୍ରମାଣ ଦେଇପାରିନଥିଲେ ।