ଏକାଠି ହେବେ ଏଲନ୍‌ ମସ୍କ ଏବଂ ମୁକେଶ ଅମ୍ବାନୀ । ଭାରତରେ କରିବେ ବଡ଼ ବ୍ୟବସାୟ । ଦୂର ହେବ ଇଣ୍ଟରନେଟ ସମସ୍ୟା । ଏଣିକି ଗାଁ ଗହଳିରେ ବି ଘାଇଁ ଘାଇଁ ଚାଲିବ ଇଣ୍ଟରନେଟ୍ । ଫାଷ୍ଟ ହେବ ଡାଉନ୍‌ଲୋଡ୍, ଫାଷ୍ଟ ହେବ ବ୍ରାଉଜିଂ । ମୁକେଶ ଅମ୍ବାନୀଙ୍କ ଜିଓ ପ୍ଲାଟଫର୍ମସ ଲିମିଟେଡ୍ (ଜେପିଏଲ) ଏବଂ ଏଲନ୍ ମସ୍କଙ୍କ ସ୍ପେସ୍ଏକ୍ସ ଭାରତରେ ଷ୍ଟାରଲିଙ୍କ ବ୍ରଡବ୍ୟାଣ୍ଡ ଇଣ୍ଟରନେଟ୍ ସେବା ଉପଲବ୍ଧ କରାଇବା ପାଇଁ ଏକ ଚୁକ୍ତିନାମା ହୋଇସାରିଛି। ଏହି ଚୁକ୍ତିନାମା ପରେ, ଭାରତର ଗ୍ରାମାଞ୍ଚଳ ଏବଂ ଦୁର୍ଗମ ଅଞ୍ଚଳ ସମେତ ସାରା ଦେଶରେ ସାଟେଲାଇଟ୍ ଆଧାରିତ ବ୍ରଡବ୍ୟାଣ୍ଡ ସେବା ଉପଲବ୍ଧ ହେବ। ଜିଓ ବିଶ୍ୱର ସର୍ବବୃହତ ମୋବାଇଲ୍ ଅପରେଟର ହୋଇଥିବା ବେଳେ, ଷ୍ଟାରଲିଙ୍କ୍ ବିଶ୍ୱର ଅଗ୍ରଣୀ ଲୋ ଆର୍ଥ ଅର୍ବିଟ (ଲିଓ) ସାଟେଲାଇଟ୍ କନଷ୍ଟେଲେସନ ଅପରେଟର।

ପୂର୍ବରୁ ରିଲାଏନ୍ସ ଜିଓର ପ୍ରତିଦ୍ୱନ୍ଦ୍ୱୀ ଭାରତୀ ଏୟାରଟେଲ ମଧ୍ୟ ଷ୍ଟାରଲିଙ୍କ ସହିତ ସମାନ ଚୁକ୍ତିନାମା ସ୍ବାକ୍ଷର କରିଥିଲା। ଏହି ଦୁଇଟି ଚୁକ୍ତି ଭାରତ ସରକାରଙ୍କ ଅନୁମୋଦନ ଅଧୀନରେ ରହିଛି। ସରକାରଙ୍କ ଅନୁମୋଦନ ପାଇବା ପରେ ହିଁ ଷ୍ଟାରଲିଙ୍କ ଭାରତରେ ଏହାର ସେବା ଆରମ୍ଭ କରିପାରିବ।

ଜିଓ ପ୍ଲାଟଫର୍ମ ଅନୁଯାୟୀ, ଏହା ତାର ରିଟେଲ ଷ୍ଟୋର ଏବଂ ଅନଲାଇନ ପ୍ଲାଟଫର୍ମ ମାଧ୍ୟମରେ ଷ୍ଟାରଲିଙ୍କ ଡିଭାଇସଗୁଡ଼ିକ ଉପଲବ୍ଧ କରାଇବ। ଏହା ବ୍ୟତୀତ, ଜିଓ ଗ୍ରାହକମାନଙ୍କୁ ସଂସ୍ଥାପନ ଏବଂ ବୈଷୟିକ ସହାୟତା ମଧ୍ୟ ଯୋଗାଇବ, ଯାହା ଦ୍ୱାରା ସାଟେଲାଇଟ ଇଣ୍ଟରନେଟ ସୁଗମ ଭାବରେ ବ୍ୟବହାର କରାଯାଇପାରିବ।

ଏହା ଉଲ୍ଲେଖନୀୟ ଯେ, ପୂର୍ବରୁ ଭାରତରେ ସାଟେଲାଇଟ ସ୍ପେକ୍ଟ୍ରମ ଆବଣ୍ଟନକୁ ନେଇ ଜିଓ ଏବଂ SpaceX ମଧ୍ୟରେ ବିବାଦ ହୋଇଥିଲା। ରିଲାଏନ୍ସ ଜିଓ ସ୍ପେକ୍ଟ୍ରମ ନିଲାମକୁ ନେଇ ବିବାଦ ଦେଖାଦେଇଥିଲା। ଶେଷରେ ଭାରତ ସରକାର ଏଲନ ମସ୍କଙ୍କ ସପକ୍ଷରେ ରାୟ ଦେଲେ ଏବଂ ବିଶ୍ୱସ୍ତରୀୟ ଅଭ୍ୟାସ ଅନୁଯାୟୀ ସିଧାସଳଖ ସ୍ପେକ୍ଟ୍ରମ ଆବଣ୍ଟନ କରିବାକୁ ନିଷ୍ପତ୍ତି ନେଲେ।

ତେବେ ଷ୍ଟାରଲିଙ୍କ୍ ସବୁଠାରୁ ଅହ୍ୱାନପୂର୍ଣ୍ଣ ସ୍ଥାନଗୁଡିକରେ ଦ୍ରୁତ ଏବଂ ସୁଲଭ ଉପାୟରେ ସବୁଠାରୁ ହାଇ-ସ୍ପିଡ୍ ଇଣ୍ଟରନେଟ୍ ବିସ୍ତାର କରି ଜିଓ ଏୟାରଫାଇବର ଏବଂ ଜିଓଫାଇବରର ପରିପୂରକ ହେବ। ଦୁଇ କମ୍ପାନୀ ଭାରତର ଡିଜିଟାଲ୍ ଇକୋସିଷ୍ଟମରେ ସହଯୋଗର ଅନ୍ୟାନ୍ୟ ସମ୍ଭାବନା ମଧ୍ୟ ଅନୁସନ୍ଧାନ କରିବେ।

ରିଲାଏନ୍ସ ଜିଓର ଗ୍ରୁପ୍ ସିଇଓ ମାଥ୍ୟୁ ଓମେନ୍ କହିଛନ୍ତି, “ପ୍ରତ୍ୟେକ ଭାରତୀୟଙ୍କୁ ସୁଲଭ ଏବଂ ହାଇ-ସ୍ପିଡ୍ ବ୍ରଡବ୍ୟାଣ୍ଡର ସୁବିଧା ଉପଲବ୍ଧ ହେବା ସୁନିଶ୍ଚିତ କରିବା ଜିଓର ସର୍ବୋଚ୍ଚ ପ୍ରାଥମିକତା ରହିଛି। ଷ୍ଟାରଲିଙ୍କକୁ ଭାରତକୁ ଆଣିବା ପାଇଁ ସ୍ପେସଏକ୍ସ ସହିତ ଆମର ସହଭାଗିତା ଆମର ପ୍ରତିବଦ୍ଧତାକୁ ସୁଦୃଢ଼ କରୁଛି ଏବଂ ସମସ୍ତଙ୍କ ପାଇଁ ନିରବଛିନ୍ନ ବ୍ରଡବ୍ୟାଣ୍ଡ ସଂଯୋଗ ଦିଗରେ ଏକ ବଡ଼ ପଦକ୍ଷେପ।

ଜିଓର ବ୍ରଡବ୍ୟାଣ୍ଡ ଇକୋସିଷ୍ଟମରେ ଷ୍ଟାରଲିଙ୍କକୁ ସାମିଲ କରି, ଆମେ ଆମର ଉପଲବ୍ଧତାର ବିସ୍ତାର କରୁଛୁ ଏବଂ ଏହି ଏଆଇ-ଚାଳିତ ଯୁଗରେ ହାଇ-ସ୍ପିଡ୍ ବ୍ରଡବ୍ୟାଣ୍ଡର ନିର୍ଭରଯୋଗ୍ୟତା ଏବଂ ଉପଲବ୍ଧତାକୁ ବୃଦ୍ଧି କରୁଛୁ, ଯାହା ଦ୍ୱାରା ସାରା ଦେଶରେ ସମୁଦାୟ ଏବଂ ବ୍ୟବସାୟଗୁଡ଼ିକୁ ସଶକ୍ତ କରାଯାଇପାରିବ।”