ବର୍ତ୍ତମାନ ବଦଳିଛି ସମୟ... ବଦଳୁଛି ସମସ୍ତ ପ୍ରକାରର ଢ଼ାଞ୍ଚା । ଆଉ ଅଫିସ ମାନଙ୍କରେ ବଦଳିଯାଇଛି ପୂର୍ବରୁ ଥିବା ନିୟମ । ପୂର୍ବରୁ ବ୍ୟକ୍ତିଗତ କାରଣରୁ ଛୁଟି ନେବା କଷ୍ଟକର ହୋଇପଡ଼ୁଥିଲା, କିନ୍ତୁ ବର୍ତ୍ତମାନ ଏପରି ଏକ ଘଟଣା ସୋସିଆଲ ମିଡିଆରେ ଆଲୋଚନାର ବିଷୟ ପାଲଟିଛି । ଯାହାକୁ ଦେଖିଲେ ଆପଣବି ବିଶ୍ଵାସ କରିପାରିବେ ନାହିଁ । ଆପଣଙ୍କ ମନରେ ନିଶ୍ଚିତ ଭାବରେ ପ୍ରଶ୍ନ ଆସିବ କି ? ଏପରି କ'ଣ ସତରେ ହୋଇପାରେ । ଜଣେ ବ୍ୟକ୍ତି ଏତେ ସଚ୍ଚୋଟ କେମିତି ?

ସୂଚନାନୁଯାୟୀ ଜଣେ କର୍ମଚାରୀ ତାଙ୍କ ପ୍ରେମିକାଙ୍କ ସହିତ ସମୟ ବିତାଇବା ପାଇଁ ଛୁଟି ମାଗିବାକୁ ତାଙ୍କ ମ୍ୟାନେଜରଙ୍କୁ ଇମେଲ୍ କରିଥିଲେ । ସବୁଠାରୁ ବଡ଼ କଥା ହେଉଛି କି ଯେ ସେ କୌଣସି ବାହାନା କରିନଥିଲେ, ବରଂ ସ୍ପଷ୍ଟ ଏବଂ ସଚ୍ଚୋଟ ଭାବରେ କଥା କହିଥିଲେ । କର୍ମଚାରୀ ଜଣକ ଇମେଲ୍ କରିଥିଲେ ଯେ ତାଙ୍କ ପ୍ରେମିକା ଡିସେମ୍ବର ୧୭ ତାରିଖରେ ଉତ୍ତରାଖଣ୍ଡରେ ତାଙ୍କ ଘରକୁ ଯାଉଛନ୍ତି ଏବଂ ଜାନୁଆରୀ ଆରମ୍ଭ ପର୍ଯ୍ୟନ୍ତ ଫେରିବେ ନାହିଁ । ତେଣୁ, ସେ ତାଙ୍କ ଯିବା ପୂର୍ବରୁ ଡିସେମ୍ବର ୧୬ ତାରିଖରେ ଗୋଟେ ଦିନ ଛୁଟି ଚାହୁଁଥିଲେ ।

ପୂର୍ବରୁ ଲୋକମାନେ ବାହାନା କରି ଛୁଟି ନେଉଥିଲେ
ଏହି ଇମେଲ୍ ଏକ କମ୍ପାନୀର ମ୍ୟାନେଜର ବୀରେନ୍ ଖୁଲ୍ଲାରଙ୍କ ପାଖକୁ ପଠାଯାଇଥିଲା । ସେ ଲିଙ୍କଦିନ୍‌ରେ ଏହି ଛୁଟି ଅନୁରୋଧର ଏକ ସ୍କ୍ରିନ୍‌ସଟ୍ ସେୟାର କରିଥିଲେ, ଯାହା ଖୁବ୍ ଭାଇରାଲ୍ ହୋଇଥିଲା । ବୀରେନ୍ ଖୁଲ୍ଲାର ଲେଖିଛନ୍ତି ଯେ ପୂର୍ବରୁ, ଏପରି ପରିସ୍ଥିତିରେ ଲୋକମାନେ ହଠାତ୍ କହୁଥିଲେ, "ମୁଁ ଅସୁସ୍ଥ" କହି ଛୁଟିରେ ରହୁଥିଲେ କିନ୍ତୁ ଏବେ ଲୋକମାନେ ସତ କହିବା ସହ ସେମାନଙ୍କର ନିଜର ମତାମତ ଦେଉଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ ତାଙ୍କୁ ଏହି ପ୍ରକାରର ନିୟମ ପସନ୍ଦ ଏହିପରି ହେବା ଦ୍ଵାରା କାମ କରିବା ସହଜ ହୋଇଥାଏ ଓ ବିଶ୍ୱାସ ମଧ୍ୟ ବଢ଼ିଥାଏ ।

ସେହି ପୋଷ୍ଟରେ ମ୍ୟାନେଜର ମଜା କରି ଲେଖିଲେ, "ପ୍ରେମକୁ ମନା କରାଯାଇପାରିବ ନାହିଁ, ଛୁଟି ମିଳିଯିବ" ପୋଷ୍ଟଟି କୁ ଅନେକ ଲୋକ ଲାଇକ୍ କରିଛନ୍ତି । ଅନେକ ବ୍ୟବହାରକାରୀ କର୍ମଚାରୀଙ୍କ ସଚ୍ଚୋଟତା ଏବଂ ମ୍ୟାନେଜରଙ୍କ ବୁଝାମଣାକୁ ପ୍ରଶଂସା କରିଛନ୍ତି । ଲୋକମାନେ କହିଛନ୍ତି କି ଏହା ଏକ ଭଲ ଏବଂ ସୁସ୍ଥ କାର୍ଯ୍ୟ କଲଚରର ସଙ୍କେତ, ଯେଉଁଠାରେ କାମ ସହିତ ବ୍ୟକ୍ତିଗତ ଜୀବନକୁ ମଧ୍ୟ ସମ୍ମାନ କରାଯାଏ । କହିବାକୁ ଗଲେ ଏହି ମାମଲା ଆଜିର କାର୍ଯ୍ୟକ୍ଷେତ୍ରରେ ବିଶ୍ୱାସ, ବୁଝାମଣା ଏବଂ ସହାନୁଭୂତିର ଗୁରୁତ୍ୱକୁ ବୁଝାଉଛି । ଜଣେ ଅନ୍ୟ ଜଣର ଇଚ୍ଛାକୁ ସମ୍ମାନ ଦେଇଛନ୍ତି ।

ଅଧିକ ପଢ଼ନ୍ତୁ ଦେଶ ଖବର...