Marriage Story / ଫେସବୁକ୍‌ରେ ହୋଇଥିଲା ବନ୍ଧୁତ୍ୱ, ୬ ବର୍ଷ ଲିଭ୍-ଇନ୍‌, ପରେ ଗୁରୁଦ୍ୱାରରେ ବିବାହ ଆଉ ତା'ପରେ...

ଫେସବୁକ୍‌ରେ ଆରମ୍ଭ ହୋଇଥିବା ବନ୍ଧୁତ୍ୱ, ପ୍ରାୟ ୬ ବର୍ଷର ଲିଭ୍-ଇନ୍ ରିଲେସନ୍‌ସିପ୍ ଏବଂ ଶେଷରେ ଜବଲପୁରର ଏକ ଗୁରୁଦ୍ୱାରରେ ଧୁମଧାମରେ ବିବାହ । କୌଣସି ଫିଲ୍ମର କାହାଣୀ ଭଳି ଲାଗୁଥିବା ଏହି ପ୍ରେମ କାହାଣୀ ଏବେ ପୋଲିସ ଥାନାରେ ପହଞ୍ଚିଛି ।

ଦୁବାଇର ଏକ ବହୁରାଷ୍ଟ୍ରୀୟ ଆଇଟି କମ୍ପାନୀରେ କଣ୍ଟ୍ରି ହେଡ୍ ଭାବେ କାମ କରୁଥିବା ଅଶ୍ୱିନ୍ଦର କୌର ନିଜ ସ୍ୱାମୀ ସୁନୀଲ ଠାକୁରଙ୍କୁ ଖୋଜି ଦୁବାଇରୁ ଜବଲପୁରରେ ପହଞ୍ଚିଛନ୍ତି । ପତ୍ନୀଙ୍କ ଅଭିଯୋଗ ଅନୁସାରେ, ଭାରତ ଫେରିବା ପରେ ସ୍ୱାମୀ ତାଙ୍କଠାରୁ ଦୂରେଇ ଯାଇଥିଲେ, ଫୋନ୍ ଓ କଥାବାର୍ତ୍ତା ବନ୍ଦ କରିଦେଇଥିଲେ । ଏହା ସହିତ ଶାଶୁଘର ଲୋକେ ତାଙ୍କ ଯୌତୁକ, ନଗଦ ଟଙ୍କା ଓ ଗହଣା ଫେରାଇ ନଥିବା ମଧ୍ୟ ସେ ଅଭିଯୋଗ କରିଛନ୍ତି । ଏହି ମାମଲାରେ ଜବଲପୁରର ଗୋହଲପୁର ଥାନାରେ ଏଫ୍‌ଆଇଆର୍ ରୁଜୁ ହୋଇଛି ।

ଫେସବୁକ୍‌ରୁ ଆରମ୍ଭ ହୋଇଥିଲା ପ୍ରେମ କାହାଣୀ
ଅଶ୍ୱିନ୍ଦର କୌରଙ୍କ କହିବା ଅନୁସାରେ, ଜବଲପୁରର ତ୍ରିମୂର୍ତ୍ତି ନଗରର ବାସିନ୍ଦା ସୁନୀଲ ଠାକୁରଙ୍କ ସହ ଅକ୍ଟୋବର ୨୦୨୦ରେ ଫେସବୁକ୍ ମାଧ୍ୟମରେ ତାଙ୍କର ପରିଚୟ ହୋଇଥିଲା । ଧୀରେ ଧୀରେ ଦୁହିଁଙ୍କ ମଧ୍ୟରେ ବନ୍ଧୁତ୍ୱ ଘନିଷ୍ଠ ହୋଇଥିଲା। ପରେ ୯ ନଭେମ୍ବର ୨୦୨୦ରେ ସୁନୀଲ ଦୁବାଇ ଯାଇଥିଲେ ଏବଂ ଦୁହେଁ ସେଠାରେ ଏକାଠି ରହିବା ଆରମ୍ଭ କରିଥିଲେ ।

ପ୍ରାୟ ୬ ବର୍ଷ ଲିଭ୍-ଇନ୍‌ରେ ରହିବା ପରେ ୨୩ ଫେବୃଆରୀ ୨୦୨୫ରେ ଦୁହେଁ ଜବଲପୁରର ସିଭିକ୍ ସେଣ୍ଟରସ୍ଥିତ ଗୁରୁଦ୍ୱାରରେ ପରିବାରବର୍ଗଙ୍କ ଉପସ୍ଥିତିରେ ବିବାହ କରିଥିଲେ । ଅଶ୍ୱିନ୍ଦରଙ୍କ ଦାବି ଅନୁସାରେ, ବିବାହ ପୂର୍ବରୁ ସେ ନିଜ ବୟସ, ପୂର୍ବରୁ ହୋଇଥିବା ଦୁଇଟି ବିବାହ ଏବଂ ପାରିବାରିକ ପୃଷ୍ଠଭୂମି ସମ୍ପର୍କରେ ସୁନୀଲଙ୍କୁ ସମସ୍ତ ତଥ୍ୟ ଜଣାଇଥିଲେ ।

ଦରମାକୁ ନେଇ ମଧ୍ୟ ଥିଲା ମତଭେଦ
ପତ୍ନୀଙ୍କ ଅଭିଯୋଗ ଅନୁସାରେ, ତାଙ୍କ ଏବଂ ସ୍ୱାମୀଙ୍କ ଆର୍ଥିକ ସ୍ଥିତିରେ ବଡ଼ ପାର୍ଥକ୍ୟ ଥିଲା । ସେ ଦୁବାଇରେ ପ୍ରତି ମାସ ପ୍ରାୟ ୪.୫ ଲକ୍ଷ ଟଙ୍କା ରୋଜଗାର କରୁଥିବାବେଳେ ସ୍ୱାମୀଙ୍କ ଆୟ ପ୍ରାୟ ୫୫ ହଜାର ଟଙ୍କା ଥିଲା ।

ଅଶ୍ୱିନ୍ଦରଙ୍କ ଅଭିଯୋଗ ହେଉଛି, ସେ ଯେପର୍ଯ୍ୟନ୍ତ ସ୍ୱାମୀଙ୍କୁ ଆର୍ଥିକ ସହାୟତା କରୁଥିଲେ, ସେପର୍ଯ୍ୟନ୍ତ ସବୁକିଛି ଠିକ୍ ଥିଲା । କିନ୍ତୁ ପରେ ତାଙ୍କ ନିଜ ଆର୍ଥିକ ସ୍ଥିତି କିଛି ଦୁର୍ବଳ ହେବାରୁ ସ୍ୱାମୀଙ୍କ ସମସ୍ତ ଦାବି ପୂରଣ କରିବା ସମ୍ଭବ ହୋଇନଥିଲା । ଏହା ପରେ ଦୁହିଁଙ୍କ ସମ୍ପର୍କରେ ତିକ୍ତତା ବଢ଼ିଥିବା ସେ ଅଭିଯୋଗ କରିଛନ୍ତି ।

୩୧ ଜୁଲାଇରେ ଭାରତ ଆସିଲେ, ପରେ ସ୍ୱାମୀ ଗାଏବ
ଘଟଣାକ୍ରମ ଅନୁସାରେ, ୩୧ ଜୁଲାଇ ୨୦୨୬ରେ ଦୁହେଁ ଦୁବାଇରୁ ଏକାଠି ଭାରତ ଆସିଥିଲେ । ଅଗଷ୍ଟ ୧ରେ ବିମାନ ଭାରତରେ ପହଞ୍ଚିବା ପରେ ସୁନୀଲ ନିଜ ମାମୁଁଙ୍କ ଘରକୁ ଯାଇଥିଲେ । ସେଠାରୁ ସେ ଜବଲପୁର ଚାଲି ଆସିଥିଲେ। ଏହା ପରେ ସୁନୀଲ ପତ୍ନୀଙ୍କ ଫୋନ୍ ଉଠାଇବା ବନ୍ଦ କରିଦେଇଥିବା ଅଭିଯୋଗ ହୋଇଛି ।

ସ୍ୱାମୀଙ୍କୁ ଖୋଜି ଅଶ୍ୱିନ୍ଦର ପ୍ରଥମେ ମୁମ୍ବାଇ, ପରେ ଜବଲପୁର ଏବଂ ତା'ପରେ ସତନାରେ ପହଞ୍ଚିଥିଲେ । ଅଗଷ୍ଟ ୪ରେ ସତନାରେ ଥିବା ସ୍ୱାମୀଙ୍କ ଭିଣୋଇଙ୍କ ଦୋକାନକୁ ସୁନୀଲଙ୍କୁ ଡକାଯାଇଥିଲା । ତେବେ ସେ ପତ୍ନୀଙ୍କ ସହ ଆଉ ରହିବାକୁ ସ୍ପଷ୍ଟ ଭାବେ ମନା କରିଦେଇଥିବା ଅଶ୍ୱିନ୍ଦର କହିଛନ୍ତି । ତାଙ୍କ ଅଭିଯୋଗ ଅନୁସାରେ, ସୁନୀଲଙ୍କ ମା' ତାଙ୍କୁ ପତ୍ନୀଙ୍କ ସହ ନ ରହିବା ପାଇଁ ଶପଥ ଦେଇଥିଲେ ।

ଗୋହଲପୁର ଥାନାରେ ମାମଲା, ତଦନ୍ତ ଆରମ୍ଭ
ନିଜ ସହ ଠକେଇ, ମାନସିକ ନିର୍ଯାତନା ଏବଂ ବଦନାମ କରାଯାଇଥିବା ଅଭିଯୋଗ ଆଣି ଅଶ୍ୱିନ୍ଦର ଜବଲପୁରର ଗୋହଲପୁର ଥାନାରେ ପହଞ୍ଚିଥିଲେ । ସେ ସ୍ୱାମୀ ସୁନୀଲ ଠାକୁର ଏବଂ ଶାଶୁଘର ପକ୍ଷ ବିରୋଧରେ ଯୌତୁକ, ଗହଣା ଓ ନଗଦ ଟଙ୍କା ହଡ଼ପ କରିବା ନେଇ ଅଭିଯୋଗ କରିଛନ୍ତି ।

ଗୋହଲପୁର ଥାନା ପ୍ରଭାରୀ ରିତେଶ ପାଣ୍ଡେୟଙ୍କ କହିବା ଅନୁସାରେ, ଅଭିଯୋଗକାରୀ ମୂଳତଃ ମୁମ୍ବାଇର ବାସିନ୍ଦା ଏବଂ ଦୁବାଇରେ ଚାକିରି କରନ୍ତି । ତାଙ୍କ ସ୍ୱାମୀ ଗୋହଲପୁରର ତ୍ରିମୂର୍ତ୍ତି ନଗରର ବାସିନ୍ଦା । ସ୍ୱାମୀ-ସ୍ତ୍ରୀଙ୍କ ମଧ୍ୟରେ ବିବାଦ କାରଣରୁ ସ୍ୱାମୀ ତାଙ୍କୁ ଘରେ ପ୍ରବେଶ କରିବାକୁ ଦେଉନଥିଲେ । ପୋଲିସ ଅଭିଯୋଗ ଆଧାରରେ ଏଫ୍‌ଆଇଆର୍ ରୁଜୁ କରିଛି । ମାମଲାର ସମସ୍ତ ଆଇନଗତ ପକ୍ଷକୁ ନେଇ ବିସ୍ତୃତ ତଦନ୍ତ ଚାଲିଥିବା ପୋଲିସ ପକ୍ଷରୁ କୁହାଯାଇଛି ।