ସାମ୍ନାକୁ ଆସୁଛି ନାଗପୁର ହିଂସାକାଣ୍ଡର ଗୋଟିଏ ପରେ ଗୋଟିଏ ଭୟାନକ ଭିଡିଓ । ସିସିଟିଭି ଫୁଟେଜରୁ ପର୍ଦ୍ଦାଫାସ ହେଉଛି ଉବଦ୍ରବୀଙ୍କ ପରିଚୟ । ନାଗପୁର ହିଂସା ମାମଲାରେ ବର୍ତ୍ତମାନ ସୁଦ୍ଧା ସାଇବର ସେଲ୍ ଅଭିଯୁକ୍ତଙ୍କ ବିରୋଧରେ ରୁଜୁ କରିଛି ୪ ମାମଲା । ହିଂସାକାଣ୍ଡର ମାଷ୍ଟରମାଇଣ୍ଡ ଫହୀମ ଶମୀମ ଖାନ ବିରୋଧରେ ଲାଗିଛି ଦେଶଦ୍ରୋହ ଦଫା । ଔରଙ୍ଗଜେବ ସମାଧି ସ୍ଥଳ ହଟାଇବା ଦାବିରେ ବିଶ୍ବ ହିନ୍ଦୁ ପରିଷଦର ବିକ୍ଷୋଭ ଭିଡିଓକୁ ଏଡିଟ କରି ସୋସିଆଲ ମିଡିଆରେ ଭାଇରାଲ କରାଯାଇଥିଲା । ଗୁଜବ ପ୍ରଚାର କରି ଉପଦ୍ରବୀ ଗୋଷ୍ଠୀକୁ ହିଂସା ପାଇଁ ଫହୀମ ଶମୀମ ଖାନ ଉସୁକାଉଥିବା କହିଛନ୍ତି ନାଗପୁର ପୋଲିସ କମିଶନର ଓ ଡିଜିପି ।

ଗୋଷ୍ଠୀ ସଂଘର୍ଷ ପରେ ନାଗପୁରର ୧୦ଟି ଥାନା ଅଞ୍ଚଳରେ ଲାଗୁ ହୋଇଛି କର୍ଫ୍ୟୁ । ବର୍ତ୍ତମାନ ସୁଦ୍ଧା ପୋଲିସ ଚଢ଼ାଉ କରି ୭୦ରୁ ଅଧିକ ଅଭିଯୁକ୍ତଙ୍କୁ ଅଟକ ରଖି ପଚରାଉଚରା କରୁଛି । ହିଂସାକାଣ୍ଡ ପଛରେ ଯୋଜନାବଦ୍ଧ ଷଡ଼ଯନ୍ତ୍ର ରହିଥିବା ବିଧାନସଭାରେ ମଙ୍ଗଳବାର କହିଥିଲେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭୀସ । ଯାହାର ଗୋଟିଏ ପରେ ଗୋଟିଏ ପ୍ରମାଣ ସାମ୍ନାକୁ ଆସୁଛି । ପୋଲିସ ଉପରେ ଆକ୍ରମଣ କରିଥିବା ଉପଦ୍ରବୀଙ୍କୁ ଛଡ଼ାଯିବ ନାହିଁ ବୋଲି ଚେତାବନୀ ଶୁଣାଇଥିଲେ ମୁଖ୍ୟମନ୍ତ୍ରୀ ।

ସୋମବାର ନାଗପୁରରେ ଥିବା ମୋଗଲ ସମ୍ରାଟ ଔରଙ୍ଗଜେବଙ୍କ ସମାଧି ହଟାଇବାକୁ ନେଇ ଆରମ୍ଭ ହୋଇଥିଲା ଗୋଷ୍ଠୀ ସଂଘର୍ଷ । ସଂଧ୍ୟା ହେବା ବେଳକୁ ଏହା ତୀବ୍ର ରୂପ ଧାରଣ କରିଥିଲା । ହିଂସାରେ ୩ ଡିସିପିଙ୍କ ସମେତ ଆହତ ହୋଇଥିଲେ ୩୩ ପୋଲିସ କର୍ମଚାରୀ ।

ଅଧିକ ପଢ଼ନ୍ତୁ ଦେଶ ଖବର: