Air Show / ଆକାଶରେ ଗର୍ଜିବ ଲଢ଼ୁଆ ବିମାନ ମାଂସ ମାଛ ବିକ୍ରି ଉପରେ କଟକଣା

ଭାରତୀୟ ବାୟୁସେନାର ୯୪ତମ ପ୍ରତିଷ୍ଠା ଦିବସ ଅବସରରେ ବାରାଣସୀର ନମୋ ଘାଟରେ ଆୟୋଜିତ ହେବାକୁ ଥିବା ଭବ୍ୟ ଏୟାର ଶୋକୁ ଦୃଷ୍ଟିରେ ରଖି ବାରାଣସୀ ନଗର ନିଗମ ପକ୍ଷରୁ ଏକ ବଡ଼ ନିଷ୍ପତ୍ତି ନିଆଯାଇଛି । କାର୍ଯ୍ୟକ୍ରମ ସ୍ଥଳର ୩୦ କିଲୋମିଟର ପରିଧି ମଧ୍ୟରେ ମାଂସ, ମାଛ ଓ ଅନ୍ୟାନ୍ୟ ଆମିଷ ସାମଗ୍ରୀ ବିକ୍ରି ଉପରେ କଟକଣା ଲଗାଯାଇଛି । ଏହି କଟକଣା ଅକ୍ଟୋବର ୧୯ରୁ ୨୬ ତାରିଖ ପର୍ଯ୍ୟନ୍ତ ବଳବତ୍ତର ରହିବ ।

ଲଢ଼ୁଆ ବିମାନଗୁଡ଼ିକୁ ପକ୍ଷୀ ଧକ୍କା ବା ‘ବାର୍ଡ ହିଟ୍’ ଆଶଙ୍କାରୁ ସୁରକ୍ଷିତ ରଖିବା ଲାଗି ଏହି ପଦକ୍ଷେପ ନିଆଯାଇଛି । ରାଜ୍ୟ ସରକାର ଏହି କାର୍ଯ୍ୟକ୍ରମକୁ ‘ଷ୍ଟେଟ୍ ଇଭେଣ୍ଟ’ ଭାବେ ଘୋଷଣା କରିଛନ୍ତି । ଅକ୍ଟୋବର ୨୨, ୨୩ ଓ ୨୫ ତାରିଖରେ ମୁଖ୍ୟ ଏୟାର ଶୋ ଅନୁଷ୍ଠିତ ହେବ । ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଯୋଗଦେବାର କାର୍ଯ୍ୟକ୍ରମ ରହିଛି । ଅକ୍ଟୋବର ୨୬ ତାରିଖକୁ ବିକଳ୍ପ ବା ଷ୍ଟାଣ୍ଡବାଇ ଦିବସ ଭାବେ ରଖାଯାଇଛି ।

ବାର୍ଡ ହିଟ୍ ରୋକିବାକୁ କଡ଼ା ପଦକ୍ଷେପ
ବାରାଣସୀ ନଗର ନିଗମର ଜନସମ୍ପର୍କ ଅଧିକାରୀ ସନ୍ଦୀପ ଶ୍ରୀବାସ୍ତବଙ୍କ ସୂଚନା ଅନୁଯାୟୀ, ଉଡ଼ନ୍ତା ଲଢ଼ୁଆ ବିମାନଗୁଡ଼ିକର ସୁରକ୍ଷାକୁ ଗୁରୁତ୍ୱ ଦେଇ ପକ୍ଷୀ ଧକ୍କାର ଆଶଙ୍କା ହ୍ରାସ କରିବା ଲାଗି ଏହି ନିଷ୍ପତ୍ତି ନିଆଯାଇଛି । ସମ୍ପୃକ୍ତ ବିଭାଗକୁ ମାଂସ ଓ ମାଛ ବିକ୍ରେତାଙ୍କୁ ନୋଟିସ୍ ଜାରି କରିବା ସହ ଦୋକାନ ଖୋଲିବାକୁ ବାରଣ କରିବା ପାଇଁ ନିର୍ଦ୍ଦେଶ ଦିଆଯାଇଛି । ପଶୁ ଚିକିତ୍ସା ଅଧିକାରୀ ଓ ନଗର ନିଗମର ସ୍ୱତନ୍ତ୍ର ଟିମ୍‌ଗୁଡ଼ିକୁ ନିୟମ କଡ଼ାକଡ଼ି ଭାବେ ପାଳନ କରାଇବାକୁ କୁହାଯାଇଛି ।

ନମୋ ଘାଟରେ ୨୦ ଲକ୍ଷ ଦର୍ଶକଙ୍କ ସମାଗମ ଆଶା
ଏହି ଐତିହାସିକ ‘ଏରିଆଲ୍ ଡିସ୍‌ପ୍ଲେ-୨୦୨୬’ ଦେଖିବା ପାଇଁ ଗଙ୍ଗା ଘାଟଗୁଡ଼ିକରେ ପ୍ରାୟ ୨୦ ଲକ୍ଷ ଦର୍ଶକଙ୍କ ସମାଗମ ହେବ ବୋଲି ଆକଳନ କରାଯାଇଛି । ଏତେ ବଡ଼ ଜନସମାଗମକୁ ଦୃଷ୍ଟିରେ ରଖି ଗଙ୍ଗାର ଗଭୀର ଜଳ ଥିବା ଅଞ୍ଚଳଗୁଡ଼ିକରେ ବ୍ୟାରିକେଡ୍ ଲଗାଯାଉଛି । ଏଥିସହ ଲୋକଙ୍କୁ ସତର୍କ କରିବା ପାଇଁ ସୂଚନା ଫଳକ ମଧ୍ୟ ଲଗାଯିବ । ଦର୍ଶକମାନେ ଯେପରି ଅସାବଧାନତାବଶତଃ ଗଭୀର ଜଳକୁ ଚାଲି ନଯାଆନ୍ତି, ସେଥିପାଇଁ ସମ୍ବେଦନଶୀଳ ରାସ୍ତାଗୁଡ଼ିକରେ ଅତିରିକ୍ତ ପ୍ରତିବନ୍ଧକ ବ୍ୟବସ୍ଥା କରାଯିବ ।

ସ୍ୱଚ୍ଛତା ଓ ଦର୍ଶକଙ୍କ ସୁବିଧା ପାଇଁ ସ୍ୱତନ୍ତ୍ର ବ୍ୟବସ୍ଥା
କାର୍ଯ୍ୟକ୍ରମ ସ୍ଥଳ ଓ ଏହାର ଆଖପାଖ ଅଞ୍ଚଳରେ ପକ୍ଷୀଙ୍କ ଗତିବିଧି ନିୟନ୍ତ୍ରଣ ତଥା ପରିବେଶକୁ ସ୍ୱଚ୍ଛ ରଖିବା ପାଇଁ ଅକ୍ଟୋବର ୨୦ରୁ ୨୬ ତାରିଖ ପର୍ଯ୍ୟନ୍ତ ସ୍ୱତନ୍ତ୍ର ସଫେଇ ଅଭିଯାନ ଚାଲିବ । ଦର୍ଶକ ଓ ଶ୍ରଦ୍ଧାଳୁଙ୍କ ସୁବିଧା ପାଇଁ ପର୍ଯ୍ୟାପ୍ତ ସଂଖ୍ୟାରେ ମୋବାଇଲ୍ ଟଏଲେଟ୍ ସ୍ଥାପନ କରାଯିବ । ଏଥିସହ ଆବଶ୍ୟକ ସ୍ଥାନରେ ମୋବାଇଲ୍ ଟାୱାର୍ ବ୍ୟବସ୍ଥା ଏବଂ ବୁଲା ପଶୁଙ୍କ ନିୟନ୍ତ୍ରଣ ପାଇଁ ମଧ୍ୟ ନଗର ନିଗମ ପକ୍ଷରୁ ପଦକ୍ଷେପ ନିଆଯାଉଛି । ବାୟୁସେନାର ଏହି ଭବ୍ୟ ପ୍ରଦର୍ଶନକୁ ସୁରକ୍ଷିତ ଓ ସଫଳ କରିବା ସହ ଲକ୍ଷ ଲକ୍ଷ ଦର୍ଶକଙ୍କ ପାଇଁ ସୁବ୍ୟବସ୍ଥିତ ପରିବେଶ ସୃଷ୍ଟି କରିବା ନଗର ନିଗମର ମୁଖ୍ୟ ଲକ୍ଷ୍ୟ ରହିଛି ।