ହଁ ଆଜ୍ଞା ଏଠି ସଜହ ନୁହେଁ ପାରା କିମ୍ବା କୌଣସି ପଶୁ ପକ୍ଷୀଙ୍କୁ ଦାନା ଖୁଆଇବା । କାରଣ ଯଦି ଆପଣ ନିଜ ଇଚ୍ଛାରେ ଏମିତି କରନ୍ତି ତେବେ ପକେଟରୁ ଖାଲି ହୋଇଯିବ ଲକ୍ଷ ଲକ୍ଷ ଟଙ୍କା । ଏ ଘଟଣା ହେଉଛି ସିଙ୍ଗାପୁରରେ । ଏଠାରେ ନିଜ ଇଚ୍ଛାରେ ପଶୁ ପକ୍ଷୀଙ୍କୁ ଖାଇବାକୁ ଦେବା ଆଇନଗତ ଅପରାଧ । ପାରାଙ୍କୁ ଦାନା ଦେବାକୁ ହେଲେ ଲିଖିତ ଅନୁମତି ଆଣିବାକୁ ପଡିବ ।

ସିଙ୍ଗାପୁରରେ ୭୧ ବର୍ଷୀୟ ଭାରତୀୟ ବଂଶୋଦ୍ଭବ ମହିଳା ୬ ମାସରେ ୯ ଥର ଜଙ୍ଗଲି ପକ୍ଷୀଙ୍କୁ ଦାନା ଖୁଆଇଥିଲେ । ଯେଉଁଥି ପାଇଁ ସିଙ୍ଗାପୁର ବନ୍ୟଜୀବ ଅଧିନିୟମ ଅଧୀନରେ ତାଙ୍କ ବିରୋଧରେ ୨,୨୬,୭୫୦ ଟଙ୍କା ଜରିମାନା ଲାଗୁ ହୋଇଛି । କାରଣ ସିଙ୍ଗାପୁରରେ ପାରା ଓ ଅନ୍ୟ ଜଙ୍ଗଲି ପକ୍ଷୀଙ୍କୁ ଦାନା ଦେବା ଆଇନଗତ ଅପରାଧ ।

ସନମୁଗନାଥନ ଶାମଲା ନାମକ ଏହି ମହିଳା ଗେଆ ପେଓହର ବୃକ୍ ୬୨-ବି, ଲରଙ୍ଗ-୪ରେ ରୁହନ୍ତି । ଏମିତି ପ୍ରଥମ ଥର ନୁହେଁ ଯେ ସେ ଏପରି ତଣ୍ଡ ଗଣିଛନ୍ତି । ବରଂ ଏହା ପୂର୍ବରୁ ସେ ବାରମ୍ବାର ପାରାଙ୍କୁ ଖାଇବାକୁ ଦେଇ ତଣ୍ଡ ଗଣିସାରିଛନ୍ତି । ଏ ମାମଲା କୋର୍ଟକୁ ଯାଇଥିବାବେଳେ ନ୍ୟାସ୍‌ନାଲ ପାର୍କସ ବୋର୍ଡ କୋର୍ଟରେ ସଫେଇ ରଖିଛି, ଶାମଲା ଜାଣି ଜାଣି ଆଇନ ଉଲଂଘନ କରିଛନ୍ତି । କାରଣ ପୂର୍ବରୁ ମଧ୍ୟ ଏହି ଅପରାଧ ପାଇଁ ତାଙ୍କୁ ଦଣ୍ଡ ମିଳିଥିଲା । ସେତେବେଳେ ସେ କହିଥିଲେ ଯେ ଆଉ ଏଭଳି କରିବେ ନାହିଁ ।

ଗତ ବର୍ଷ ଜଙ୍ଗଲି ପକ୍ଷୀଙ୍କୁ ଦାନା ଦେବା ସହିତ ଏନ୍‌ପାର୍କସର ପାରା ଧରିବା ଅଭିଯାନରେ ବାଧା ଉତ୍ପନ୍ନ କରିବା ଲାଗି ତାଙ୍କ ଉପରେ ୮୬,୯୨୭ ଟଙ୍କା ଜରିମାନା ଲାଗୁ ହୋଇଥିଲା । ସେ ନିଜ ଆପାର୍ଟମେଣ୍ଟ୍ ପାଖରେ ଅବୈଧ ରୂପେ ପକ୍ଷୀଙ୍କୁ ଦାନା ଦେଉଥିଲେ । ଜୁଲାଇ ୨୦୨୫ରୁ ଜାନୁଆରୀ ୨୦୨୬ ମଧ୍ୟରେ ସେ ୯ ଥର ଏହି ଅପରାଧ ଦୋହରାଇଛନ୍ତି ।

ତେବେ ଆପଣ ଭାବୁଥିବେ ପକ୍ଷୀଙ୍କୁ ଖାଇବାକୁ ଦେବାରେ ଅସୁବିଧା କଣ । ଏମିତି ନିୟମ କାହିଁକି ହୋଇଛି । ସିଙ୍ଗାପୁର ୱାଇଲ୍ଡ ଲାଇଫ୍ ର ନିୟମ ଅନୁଯାୟୀ ପକ୍ଷୀମାନଙ୍କୁ ଖାଇବାକୁ ଦେବା ଦ୍ୱାରା ଜନସ୍ୱାସ୍ଥ୍ୟ ଏବଂ ପରିଷ୍କାର ପରିଚ୍ଛନ୍ନତା ସମସ୍ୟା ସୃଷ୍ଟି ହୋଇପାରେ। କପୋତଗୁଡ଼ିକ ସାଲମୋନେଲା ଭଳି ଜୀବାଣୁ ବହନ କରିପାରନ୍ତି ଏବଂ ଘର ପାଖରେ ପକ୍ଷୀ ସଂଖ୍ୟା ବୃଦ୍ଧି କରିପାରନ୍ତି । ଫଳରେ କାହାର ସମ୍ପତ୍ତି କ୍ଷତି ହୋଇପାରେ । ଅନ୍ୟାନ୍ୟ ସୁରକ୍ଷା ଚିନ୍ତା ସୃଷ୍ଟି ହୋଇପାରେ ।