ତାମିଲନାଡୁ ତିରୁଭଲ୍ଲୁର ନିକଟରେ ଡିଜେଲ ବୋଝେଇ ମାଲବାହୀ ଟ୍ରେନରେ ଲାଗିଲା ନିଆଁ । ଆଜି ସକାଳ ପ୍ରାୟ 5ଟା 30 ସମୟରେ ତିରୁଭଲ୍ଲୁର ରେଳ ଷ୍ଟେସନରେ ଏକ ଡିଜେଲ ଭର୍ତ୍ତି ମାଲବାହୀ ଟ୍ରେନରେ ନିଆଁ ଲାଗିଥିଲା । ଟ୍ରେନରେ ଡିଜେଲ ଥିବାରୁ ନିଆଁ ସଙ୍ଗେ ସଙ୍ଗେ ଚାରିଆଡ଼େ ବ୍ୟାପି ଯାଇଥିଲା । ହୁ ହୁ ହୋଇ ଜଳି ଯାଇଥିଲା ଟ୍ରେନ୍‌ଟି । ଅଗ୍ନିଶମ, ପୋଲିସ ନିଆଁ ଲିଭାରେ ଲାଗିଛନ୍ତି । ଡିଜେଲ୍‌ ଯୋଗୁ ନିଆଁର ପ୍ରଖର ଏତେ ଥିଲା ଯେ ନିଆଁକୁ ଆୟତ୍ତ କରିବା କଷ୍ଟକର ହୋଇପଡ଼ିଥିଲା ।

ଟ୍ରେନରେ ମୋଟ 52 ବଗି ଥିବା ବେଳେ ପ୍ରାୟ ୧୨ଟି ବଗିରେ ନିଆଁ ଲାଗି ଯାଇଥିଲା । ଅନ୍ୟ 40 ବଗିକୁ ଅଲଗା କରାଯାଇଛି । ଷ୍ଟେସନ ନିକଟରେ ରହୁଥିବା ଲୋକଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଇଛି । ନିଆଁକୁ ଆୟତ୍ତ କରିବାକୁ ଆଖପାଖ ଜିଲ୍ଲାରୁ ଅଗ୍ନିଶମ ବାହିନୀକୁ ନିୟୋଜିତ କରାଯାଇଛି । ରେଳବାଇର ବରିଷ୍ଠ ଅଧିକାରୀ, ପୋଲିସର ବରିଷ୍ଠ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛନ୍ତି । କେଉଁ ପରିସ୍ଥିତିରେ ଟ୍ରେନରେ ନିଆଁ ଲାଗିଲା ତାର କାରଣ ଖୋଜା ଚାଲିଛି ।