ଗତ ଏପ୍ରିଲ୍‌ ମାସରେ ୱାକଫ୍‌ ବିଲ୍‌କୁ ନେଇ ବିଜେଡିରେ ରାଜନୈତିକ ଝଡ଼ ସୃଷ୍ଟି ହୋଇଥିଲା । ବିଲ୍‌କୁ ବିରୋଧ କରିବ ବୋଲି ଆରମ୍ଭରୁ କହି ଆସୁଥିବା ବିଜେଡି ଶେଷ ମୁହୂର୍ତ୍ତରେ ପଲଟିଯାଇଥିଲା । ସାଂସଦମାନଙ୍କ ବିବେକ ଉପରକୁ ନିଷ୍ପତ୍ତି ଛାଡ଼ି ଦିଆଯାଇଥିଲା । ବିଲ୍‌ ସପକ୍ଷରେ କିଏ ଓ ବିପକ୍ଷରେ କିଏ ଭୋଟ୍‌ ଦେଇଥିଲେ ସେ ସମ୍ପର୍କରେ ସ୍ପଷ୍ଟ ଚିତ୍ର ସାମ୍ନାକୁ ଆସିନଥିଲା ।

ରାଜ୍ୟସଭାରେ ଓ୍ବାକଫ୍ ସଂଶୋଧନ ବିଧେୟକ ପାରିତ ବେଳେ ୭ଜଣ ବିଜେଡି ସାଂସଦଙ୍କ ମଧ୍ୟରୁ ୫ଜଣ ସପକ୍ଷରେ , ଜଣେ ବିପକ୍ଷରେ ଓ ଅନ୍ୟଜଣେ ମତଦାନରୁ ବିରତ ରହିଥିଲେ । ରାଜ୍ୟସଭା ସଚିବାଳୟ ତଥ୍ୟ ଅନୁଯାୟୀ ସାଂସଦ ସସ୍ମିତ ପାତ୍ର, ସୁଲତା ଦେଓ, ନିରଞ୍ଜନ ବିଶି, ମାନସ ରଂଜନ ମଙ୍ଗରାଜ ଓ ଶୁଭାଶିଷ ଖୁଣ୍ଟିଆ ବିଧେୟକ ସପକ୍ଷରେ ଭୋଟ ଦେଇଥିଲେ । ବିଧେୟକ ବିପକ୍ଷରେ କେବଳ ସାଂସଦ ମୁନା ଖାନ୍ ମତଦାନ କରିଥିଲେ । ସାଂସଦ ଦେବାଶିଷ ସାମନ୍ତରାୟ ମତଦାନ ସମୟରେ ଅନୁପସ୍ଥିତ ରହିଥିଲେ ।

ତିନି ମାସ ପରେ ଓ୍ବାକଫ୍ ସଂଶୋଧନ ବିଧେୟକ ମତଦାନ ପ୍ରସଙ୍ଗରେ ସମସ୍ତ ସାଂସଦଙ୍କ ମତଦାନ ତଥ୍ୟକୁ ରାଜ୍ୟସଭା ସଚିବାଳୟ ସାର୍ବଜନୀନ କରିବା ପରେ ବିଜେଡି ପାଇଁ ଅଡୁଆ ବଢିଛି । ଓ୍ବାକଫ୍ ସଂଶୋଧନ ମତଦାନ ବେଳେ ବିଜେଡି ସାଂସଦଙ୍କ ଅସ୍ପଷ୍ଟ ଭୂମିକାକୁ ନେଇ ଚର୍ଚ୍ଚା ହୋଇଥିଲା । ପ୍ରଥମେ ଓ୍ବାକଫ୍ ବିରୋଧରେ ମତଦାନ କରିବାକୁ ନିଷ୍ପତ୍ତି ନିଆଯାଇଥିବା ବେଳେ ଶେଷ ମୁହୂର୍ତ୍ତରେ ମତଦାନ ପୂର୍ବରୁ ସ୍ବର ବଦଳାଇଥିଲା ବିଜେଡି । ଓ୍ବାକଫ୍ ମତଦାନ ପ୍ରସଙ୍ଗକୁ ସାଂସଦଙ୍କ ବିବେକ ଉପରେ ଛାଡି ଦେଇଥିଲା ବିଜେଡି ।