Revenge Attack / ଚାକିରିରୁ ବାହାର କରିବାରୁ ରାଗିଗଲେ ପୂର୍ବତନ କର୍ମଚାରୀ, ଗ୍ୟାରେଜ୍‌ରେ ଲଗାଇଲେ ନିଆଁ

ମହାରାଷ୍ଟ୍ରର ନାଗପୁରରେ ଚାକିରିରୁ ବାହାର କରାଯିବାରୁ ରାଗି ଜଣେ ପୂର୍ବତନ କର୍ମଚାରୀ ନିଜ ମାଲିକଙ୍କ ଗ୍ୟାରେଜ୍‌ରେ ନିଆଁ ଲଗାଇଥିବା ଅଭିଯୋଗ ହୋଇଛି । ଶୁକ୍ରବାର ଭୋର ପ୍ରାୟ ୩ଟା ସମୟରେ କପିଲ ନଗର ଥାନା ଅଞ୍ଚଳର ବ୍ୟାଙ୍କ କଲୋନୀରେ ଏହି ଘଟଣା ଘଟିଛି । ଅଗ୍ନିକାଣ୍ଡରେ ଗ୍ୟାରେଜ୍‌ରେ ରଖାଯାଇଥିବା ପ୍ରାୟ ୨୦ଟି ଦୁଇଚକିଆ ଗାଡ଼ି ପୋଡ଼ି ନଷ୍ଟ ହୋଇଯାଇଛି ।

ସୂଚନା ଅନୁସାରେ, ବ୍ୟାଙ୍କ କଲୋନୀରେ ସତୀଶ ଯାଦବଙ୍କ ‘ଦିବେଶ ହୋଣ୍ଡା ସର୍ଭିସ୍’ ନାମରେ ଏକ ଗ୍ୟାରେଜ୍ ରହିଛି । ରାଜୁ ମହେନ୍ଦ୍ରକର ନାମକ ଜଣେ ଯୁବକ ପୂର୍ବରୁ ଏଠାରେ କାମ କରୁଥିଲେ । ପ୍ରାୟ ଦୁଇ ମାସ ତଳେ ତାଙ୍କୁ ଚାକିରିରୁ ବାହାର କରାଯାଇଥିଲା । ରାଜୁଙ୍କ ମଦ୍ୟପାନ ଅଭ୍ୟାସ ଯୋଗୁଁ ତାଙ୍କୁ କାମରୁ ହଟାଯାଇଥିବା କୁହାଯାଉଛି ।

ଚାକିରି ଯିବା ପରେ ରାଜୁ ମାଲିକଙ୍କ ଉପରେ ଅସନ୍ତୁଷ୍ଟ ଥିବା ଅଭିଯୋଗ ହୋଇଛି । ପୋଲିସର ପ୍ରାଥମିକ ସନ୍ଦେହ ଅନୁସାରେ, ଶୁକ୍ରବାର ଭୋରରେ ସେ ଗ୍ୟାରେଜ୍ ନିକଟକୁ ଆସି ନିଆଁ ଲଗାଇଥାଇପାରନ୍ତି । ଅଳ୍ପ ସମୟ ମଧ୍ୟରେ ନିଆଁ ଭୟଙ୍କର ରୂପ ନେଇଥିଲା ଏବଂ ଗ୍ୟାରେଜ୍‌ରେ ଥିବା ବାଇକ୍‌ ଓ ସ୍କୁଟରଗୁଡ଼ିକ ଜଳିଯାଇଥିଲା ।

ନିଆଁର ପ୍ରଭାବରେ ନିକଟରେ ଥିବା ଜଣେ ଡାକ୍ତରଙ୍କ କ୍ଲିନିକ୍‌ ମଧ୍ୟ କ୍ଷତିଗ୍ରସ୍ତ ହୋଇଛି । ଘଟଣାରେ ୨୦ ଲକ୍ଷ ଟଙ୍କାରୁ ଅଧିକ କ୍ଷତି ହୋଇଥିବା ପ୍ରାଥମିକ ଆକଳନ କରାଯାଇଛି । ଘଟଣାର ଖବର ପାଇ ପୋଲିସ ଓ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଅନେକ ସମୟର ଚେଷ୍ଟା ପରେ ନିଆଁକୁ ଆୟତ୍ତ କରିଥିଲେ । ଏହି ଘଟଣାର CCTV ଫୁଟେଜ୍‌ ମଧ୍ୟ ପୋଲିସର ହାତରେ ଲାଗିଛି । ଫୁଟେଜ୍‌ରେ ଜଣେ ସନ୍ଦିଗ୍ଧ ବ୍ୟକ୍ତି ଗ୍ୟାରେଜ୍‌ ଆଖପାଖରେ ବୁଲୁଥିବା ଦେଖାଯାଇଛି ।

CCTV ଫୁଟେଜ୍‌ ଆଧାରରେ ପୋଲିସ ଅଭିଯୁକ୍ତଙ୍କ ପରିଚୟ ଓ ତାଙ୍କୁ ଧରିବା ପାଇଁ ତଦନ୍ତ ଚଳାଇଛି । ନିଆଁ ଜାଣିଶୁଣି ଲଗାଯାଇଥିଲା କି ଅନ୍ୟ କୌଣସି କାରଣରୁ ଅଗ୍ନିକାଣ୍ଡ ଘଟିଥିଲା, ସେନେଇ ମଧ୍ୟ ତଦନ୍ତ କରାଯାଉଛି । ଅଭିଯୁକ୍ତ ଧରାପଡ଼ିବା ପରେ ଘଟଣା ପଛର ପ୍ରକୃତ କାରଣ ସ୍ପଷ୍ଟ ହେବ ବୋଲି ପୋଲିସ ଆଶା କରୁଛି ।