ଭୁବନେଶ୍ୱର: ପଞ୍ଚଭୂତରେ ବିଲୀନ ହେଲା ପୂର୍ବ ପ୍ରଧାନମନ୍ତ୍ରୀ ମନମୋହନ ସିଂଙ୍କ ପାର୍ଥିବ ଶରୀର । ରାଷ୍ଟ୍ରୀୟ ମର୍ଯ୍ୟାଦା ସହ ନିଗମବୋଧ ଘାଟରେ ହେଲା ଅନ୍ତିମ ସଂସ୍କାର । ଶେଷ ଦର୍ଶନ କଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ , ଉପରାଷ୍ଟ୍ରପତି ଜଗଦୀପ ଧନଖର, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବହୁ ନେତୃବୃନ୍ଦ । ଭୁଟାନ ରାଜା ବି ତାଙ୍କ ଶେଷ ଦର୍ଶନ କରିଛନ୍ତି । ୩ ସେନା ପକ୍ଷରୁ ଦିଆଯାଇଛି ତୋପ ସଲାମୀ । କଂଗ୍ରେସର ଅସରଦାର ସର୍ଦ୍ଦାରଙ୍କୁ ଭାବବିହ୍ବଳ ବିଦାୟ ଦିଆଯାଇଛି । ତାଙ୍କ ଶେଷ ଦର୍ଶନ ପାଇଁ ବାସଭବନରୁ କଂଗ୍ରେସ ଭବନ, କଂଗ୍ରେସ ଭବନରୁ ନିଗମବୋଧ ଘାଟ ଯାଏ ସମର୍ଥକ ଓ ଶୁଭେଚ୍ଛୁ ସୁଅ ଲାଗିଥିଲା । ବିଦ୍ବାନ ଅର୍ଥଶାସ୍ତ୍ରୀ ଓ ରିଫର୍ମ ପ୍ରତି ସମର୍ପିତ ଏ ନେତାଙ୍କୁ ଦେଖିବାକୁ କାହିଁ କେଉଁ ଆଡୁ ଆସିଥିଲେ ନେତା ଓ କର୍ମୀ ।