ଠକେଇ ହେଲେ ଆମେ ସାଧାରଣତଃ ଅଭିଯୋଗ କରିବାକୁ ପୋଲିସ ନିକଟକୁ ଯାଇଥାଉ। କିନ୍ତୁ ଆଜି ପୋଲିସ ବି ସୁରକ୍ଷିତ ନୁହେଁ। ପୋଲିସ ନିଜେ ଠକେଇର ଶିକାର ହୋଇ ଆତ୍ମହତ୍ୟା କରିବାକୁ ପଛାଇ ନାହାନ୍ତି। ଏଭଳି ଏକ ଘଟଣା ଦେଖିବାକୁ ମିଳିଛି ପଞ୍ଜାବରେ। ପଞ୍ଜାବ ପୋଲିସର ପୂର୍ବତନ ଇନ୍ସପେକ୍ଟର ଜେନେରାଲ (ଆଇଜି) ଅମର ସିଂହ ଚହଲଙ୍କୁ ପଞ୍ଜାବର ପଟିଆଲାରେ ତାଙ୍କ ଘରୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଥିଲା। ତାଙ୍କ ପରିବାର ତାଙ୍କୁ ତୁରନ୍ତ ଚିକିତ୍ସା ପାଇଁ ପଟିଆଲାର ପାର୍କ ହସ୍ପିଟାଲକୁ ନେଇଯାଇଥିଲେ, ଯେଉଁଠାରେ ଡାକ୍ତରଙ୍କ ଏକ ଦଳ ତାଙ୍କର ଚିକିତ୍ସା କରୁଛନ୍ତି। ତାଙ୍କ ଅବସ୍ଥା ସଙ୍କଟାପନ୍ନ ରହିଛି। ପରିବାର ସଦସ୍ୟମାନେ କହିଛନ୍ତି ଯେ, ଅମର ସିଂହ ଚହଲ ନିଜକୁ ନିଜେ ଗୁଳି କରି ଆତ୍ମହତ୍ୟା କରିବାକୁ ଉଦ୍ୟମ କରିଥିଲେ। 

ଏହାସହ ପଢ଼ନ୍ତୁ: ସ୍ବାମୀଙ୍କୁ ଛାଡ଼ି ପ୍ରେମିକଙ୍କ ସହ ଫେରାର ହୋଇଯାଇଥିଲେ ମହିଳା: ତା’ପରେ ଘଟିଲା ଏମିତି...

ପୋଲିସ ଘଟଣାସ୍ଥଳରୁ ଏକ ୧୨ ପୃଷ୍ଠାର ସୁଇସାଇଡ ନୋଟ୍ ଜବତ କରିଛି । ଯେଉଁଥିରେ ଅନଲାଇନ୍ ଠକେଇ ଯୋଗୁଁ ଆର୍ଥିକ ଅସୁବିଧା ବିଷୟରେ ଉଲ୍ଲେଖ କରାଯାଇଛି। ପୋଲିସ ଅଧିକାରୀମାନେ ସ୍ପଷ୍ଟ କରିଛନ୍ତି ଯେ, ସମସ୍ତ ଦିଗରୁ ମାମଲାର ତଦନ୍ତ କରାଯାଉଛି ଏବଂ କୌଣସି ନିଷ୍କର୍ଷରେ ପହଞ୍ଚିବା ପୂର୍ବରୁ ତଥ୍ୟକୁ ପୁଙ୍ଖାନୁପୁଙ୍ଖ ଭାବରେ ଯାଞ୍ଚ କରାଯିବ।

ବରିଷ୍ଠ ଅଧିକାରୀମାନେ କହିଛନ୍ତି ଯେ, ଏକ ଫରେନସିକ୍ ଦଳ ଘଟଣାସ୍ଥଳର ତଦନ୍ତ କରିଛି ଏବଂ ଆବଶ୍ୟକୀୟ ପ୍ରମାଣ ସଂଗ୍ରହ କରିଛି। ପରିବାର ସଦସ୍ୟ ଏବଂ ଅନ୍ୟାନ୍ୟ ସମ୍ପର୍କିତ ବ୍ୟକ୍ତିଙ୍କ ବୟାନ ମଧ୍ୟ ରେକର୍ଡ କରାଯାଉଛି। ତଦନ୍ତ ସମାପ୍ତ ହେବା ପରେ ହିଁ ଘଟଣାର ସଠିକ୍ କାରଣ ଜଣାପଡ଼ିବ।
ଅମର ସିଂହ ଚହଲ ଅନଲାଇନ୍ ଠକେଇର ଶିକାର ହୋଇଛନ୍ତି । ସେରୁ ୮ କୋଟି ଟଙ୍କା ହରାଇଛନ୍ତି । ଠକେଇ ପରେ ସେ ଭାଙ୍ଗି ପଡ଼ିଥିଲେ। ସେ ୧୨ ପୃଷ୍ଠାର ଏକ ସୁଇସାଇଡ୍ ନୋଟରେ ନିଜର ଦୁଃଖ ବଖାଣିଥିଲେ। ସେ ପଞ୍ଜାବ ପୋଲିସ ମହାନିର୍ଦ୍ଦେଶକ (DGP)ଙ୍କୁ ଏ ବିଷୟରେ ତୁରନ୍ତ ଧ୍ୟାନ ଦେବାକୁ ଅନୁରୋଧ ମଧ୍ୟ କରିଥିଲେ।

ଅମର ସିଂହ ଚହଲ ୨୦୧୫ ଫରିଦକୋଟ ଗୁଳିକାଣ୍ଡ ଘଟଣାର ଜଣେ ଅଭିଯୁକ୍ତ ବୋଲି ଜଣାପଡ଼ିଛି। ୨୦୨୩ ମସିହାରେ, ପଞ୍ଜାବ ପୋଲିସର ଏକ ସ୍ୱତନ୍ତ୍ର ତଦନ୍ତ ଦଳ ପୂର୍ବତନ ମୁଖ୍ୟମନ୍ତ୍ରୀ ପ୍ରକାଶ ସିଂହ ବାଦଲ, ସୁଖବୀର ସିଂହ ବାଦଲ ଏବଂ ଚହଲ ସମେତ ଅନେକ ପୋଲିସ ଅଧିକାରୀଙ୍କ ବିରୁଦ୍ଧରେ ଏହି ମାମଲାରେ ଏକ ଚାର୍ଜସିଟ୍ ଦାଖଲ କରିଥିଲା।

ଏହାସହ ପଢ଼ନ୍ତୁ: ବୀଭତ୍ସ ହତ୍ୟା: ବାହା ହେବାକୁ କହିବାରୁ ପ୍ରେମିକାଙ୍କୁ ବାରମ୍ବାର ଛୁରି ଭୁସି ଚତୁର୍ଥ ମହଲାରୁ ଡେଇଁପଡ଼ିଲେ ଲିଭ-ଇନ-ପାର୍ଟନର

ପୂର୍ବତନ ଅଧିକାରୀଙ୍କ ଆତ୍ମହତ୍ୟା ଉଦ୍ୟମ ପୋଲିସ ବିଭାଗ ଏବଂ ରାଜନୈତିକ ମହଲରେ ଏକ ଆଶ୍ଚର୍ଯ୍ୟଜନକ ଘଟଣା ସୃଷ୍ଟି କରିଛି। ପୋଲିସ ସେମାନଙ୍କର ତଦନ୍ତ ଜାରି ରଖିଛି। "ଆମେ ଆତ୍ମହତ୍ୟା ନୋଟ୍ ଯାଞ୍ଚ କରୁଛୁ ଏବଂ ଠକେଇ ସହିତ ଜଡିତ ଆର୍ଥିକ କାରବାରର ତଦନ୍ତ କରୁଛୁ। ଏହା ଏକ ଗମ୍ଭୀର ବିଷୟ, ଏବଂ ଆମେ ଏହାକୁ ଅତ୍ୟନ୍ତ ଗମ୍ଭୀରତାର ସହିତ ବିଚାର କରୁଛୁ ବୋଲି ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି।