ଅର୍ଗସ ବ୍ୟୁରୋ: ପ୍ରତୀକ୍ଷାର ଅନ୍ତ, ଘୋଷଣା ହୋଇଛି ବହୁ ପ୍ରତୀକ୍ଷିତ ସାଧାରଣ ନିର୍ବାଚନ ତାରିଖ । ଏପ୍ରିଲ ୧୬ରୁ ସାତଟି ପର୍ଯ୍ୟାୟରେ ଦେଶରେ ହେବ ଲୋକସଭା ନିର୍ବାଚନ । ତା ସହିତ ଓଡ଼ିଶା, ଆନ୍ଧ୍ର ପ୍ରଦେଶ, ସିକ୍କିମ, ଅରୁଣାଚଳ ପ୍ରଦେଶର ବିଧାନସଭା ପାଇଁ ମଧ୍ୟ ମତଦାନ ହେବ । ଓଡ଼ିଶାରେ ଚାରିଟି ପର୍ଯ୍ୟାୟରେ ଭୋଟ୍ ନିଆଯିବ । ମୁଖ୍ୟ ନିର୍ବାଚନ କମିଶନର ନୂଆଦିଲ୍ଲୀରେ ଆଜି ତାରିଖ ଘୋଷଣା କରିଛନ୍ତି । ଏହା ସହିତ ଆଜି ଠାରୁ ସାରା ଦେଶରେ ଆଦର୍ଶ ଆଚରଣ ବିଧି ଲାଗୁ ହୋଇଛି ।

ଓଡ଼ିଶାରେ ଚାରିଟି ପର୍ଯ୍ୟାୟରେ ହେବ ନିର୍ବାଚନ । ମେ ୧୩ରେ ୪ଟି, ମେ ୨୦ରେ ୫ଟି, ମେ ୨୫ରେ ୬ଟି ଓ ଜୁନ୍ ୧ରେ ଅନ୍ୟ ୬ଟି ଆସନରେ ଭୋଟ୍ ନିଆଯିବ । ଏଥିସହ ଜୁନ୍ ୪ ତାରିଖରେ ଘୋଷଣା ହେବ ଫଳାଫଳ । ଆଜି ନୂଆଦିଲ୍ଲୀର ବିଜ୍ଞାନ ଭବନରେ ପ୍ରେସମିଟ କରି ନିର୍ବାଚନୀ କାର୍ଯ୍ୟସୂଚୀ ଘୋଷଣା କରିଛନ୍ତି ମୁଖ୍ୟ ନିର୍ବାଚନ କମିଶନର । ନିର୍ବାଚନ ତାରିଖ ଘୋଷଣା ସହ ଆଜିଠାରୁ ହିଁ ଲାଗୁ ହୋଇଛି ଆଦର୍ଶ ଆଚରଣ ବିଧି । 

ଲୋକସଭା ସହ ଓଡ଼ିଶା, ଆନ୍ଧ୍ର ପ୍ରଦେଶ, ସିକ୍କିମ ଓ ଅରୁଣାଚଳ ପ୍ରଦେଶରେ ଏକାସାଙ୍ଗରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ତେବେ ଜମ୍ମୁ ଓ କାଶ୍ମୀରରେ ବିଧାନସଭା ନିର୍ବାଚନ ଏବେ କରାଯିବ ନାହିଁ । ଏଥର ଦେଶର ୧୦.୫ ଲକ୍ଷ ବୁଥରେ ଭିଭିପାଟ୍ ଥିବା ୫୫ ଲକ୍ଷ ଇଭିଏମରେ ଭୋଟ୍ ନିଆଯିବ । ଅପରାଧ ପୃଷ୍ଠଭୂମି ଥିବା ନେତାମାନେ ନିଜ ସମ୍ପର୍କରେ ପ୍ରଚାର ସମୟରେ  ତିନି ଥର ବିଜ୍ଞାପନ ମାଧ୍ୟମରେ ଭୋଟରଙ୍କୁ ଅବଗତ କରିବେ । କାହିଁକି ଅପରାଧୀ ପୃଷ୍ଠଭୂମି ଥିବା ଲୋକଙ୍କୁ ଟିକେଟ୍ ଦିଆଗଲା ସେନେଇ ସୂଚନା ଦେବେ ରାଜନୈତିକ ଦଳ ।  

୨୦୧୯ରେ ଏପ୍ରିଲ ୧୧ରୁ ମେ ୧୯ ମଧ୍ୟରେ ଲୋକସଭା ନିର୍ବାଚନ ଅନୁଷ୍ଠିତ ହୋଇଥିଲା । ବିଜେପିକୁ ଏକାକୀ ୩୦୩ଟି ଆସନ ମିଳିଥିବା ବେଳେ ଏନଡିଏକୁ ମିଳିଥିଲା ୩୫୩ ସିଟ୍ । କଂଗ୍ରେସ ମାତ୍ର ୫୨ଟି ସିଟରେ ସୀମିତ ରହିଥିଲା । ଚଳିତ ଥର ପ୍ରାୟ ୯୭ କୋଟି ମତଦାତା ସେମାନଙ୍କର ମତଦାନ ସାବ୍ୟସ୍ତ କରିବେ ଯେଉଁମାନଙ୍କ ମଧ୍ୟରେ ନୂଆ ଭୋଟରଙ୍କ ସଂଖ୍ୟା ରହିଛି ୧.୮୨ କୋଟି । ସେହିପରି ଦେଢ଼ କୋଟି କର୍ମଚାରୀ ଓ ସୁରକ୍ଷା କର୍ମୀ ନିର୍ବାଚନ ପରିଚାଳନା ପାଇଁ ମୁତୟନ ହେବେ । 

ଆହୁରି ପଢନ୍ତୁ ଭାରତ ଖବର...