Relationship Trend / ଆଜିକାଲିର ଯୁବପିଢ଼ିଙ୍କ ପାଇଁ ‘ପ୍ରେମ’ ମାନେ କେବଳ ବୟଫ୍ରେଣ୍ଡ୍-ଗାର୍ଲଫ୍ରେଣ୍ଡ୍ ନୁହେଁ! ଜାଣନ୍ତୁ ଏହି ନୂଆ ଟ୍ରେଣ୍ଡ୍

ଭୁବନେଶ୍ୱର: ବଦଳୁଛି ସମୟ, ବଦଳୁଛି ଚିନ୍ତାଧାରା ଏବଂ ଏହାର ସିଧାସଳଖ ପ୍ରଭାବ ପଡ଼ିଛି ଆଜିକାଲିର ଯୁବପିଢ଼ି ଅର୍ଥାତ୍ 'ଜେନ-ଜେଡ୍' (Gen-Z)ଙ୍କ ସମ୍ପର୍କ ଉପରେ। ପୂର୍ବ କାଳରେ ସମ୍ପର୍କ କହିଲେ କେବଳ ବନ୍ଧୁତା, ପ୍ରେମ କିମ୍ବା ବିବାହକୁ ବୁଝାାଯାଉଥିଲା। ମାତ୍ର ଆଜିର ଡିଜିଟାଲ୍ ଯୁଗରେ ଏହି ପାରମ୍ପରିକ ପରିଭାଷା ସମ୍ପୂର୍ଣ୍ଣ ବଦଳି ଯାଇଛି। ସୋସିଆଲ ମିଡିଆ ଏବଂ ଡେଟିଂ ଆପ୍ଲିକେସନ୍‌ର ପ୍ରଭାବରେ ଯୁବକଯୁବତୀମାନେ ବିନା କୌଣସି ଗମ୍ଭୀର ପ୍ରତିବଦ୍ଧତାରେ ପରସ୍ପର ସହ ସମୟ ବିତାଇବାକୁ ପସନ୍ଦ କରୁଛନ୍ତି। ଫଳରେ ଜନ୍ମ ନେଇଛି 'ସିଚୁଏସନ୍ସିପ୍', 'ଟକିଂ ଷ୍ଟେଜ୍' ଏବଂ 'ଫ୍ରେଣ୍ଡସ୍ ୱିଥ୍ ବେନିଫିଟ୍ସ' ଭଳି ଅନେକ ନୂଆ ନୂଆ ଶବ୍ଦ।

ଆସନ୍ତୁ ଜାଣିବା ଆଜିକାଲିର ଏହି ନୂତନ ସମ୍ପର୍କଗୁଡ଼ିକର ପ୍ରକୃତ ଅର୍ଥ କ’ଣ ଏବଂ ପାରମ୍ପରିକ ସମ୍ପର୍କଠାରୁ ଏହା କିପରି ଭିନ୍ନ:

୧. ସିଚୁଏସନ୍ସିପ୍ (Situationship): ସମ୍ପର୍କ ଅଛି, କିନ୍ତୁ ନାଁ ନାହିଁ!
ଆଜିକାଲିର ଯୁବପିଢ଼ିଙ୍କ ମଧ୍ୟରେ ସବୁଠାରୁ ଅଧିକ ଚର୍ଚ୍ଚାରେ ଥିବା ଶବ୍ଦଟି ହେଉଛି ‘ସିଚୁଏସନ୍ସିପ୍’। ଏଥିରେ ଦୁଇଜଣ ବ୍ୟକ୍ତି ପରସ୍ପରର ଅତି ନିକଟତର ହୋଇଥାନ୍ତି, ଏକାଠି ସମୟ ବିତାନ୍ତି, କିନ୍ତୁ ସେମାନେ ଆନୁଷ୍ଠାନିକ ଭାବରେ ପ୍ରେମିକା-ପ୍ରେମିକା କିମ୍ବା ସମ୍ପର୍କରେ ଅଛନ୍ତି କି ନାହିଁ, ତାହା ସ୍ପଷ୍ଟ ନଥାଏ।

୨. ଟକିଂ ଷ୍ଟେଜ୍ (Talking Stage): ପରିଚୟର ପ୍ରାରମ୍ଭିକ ପର୍ଯ୍ୟାୟ
ଏହା ଯେକୌଣସି ସମ୍ପର୍କର ପ୍ରଥମ ପାହାଚ। ଏହି ପର୍ଯ୍ୟାୟରେ ଦୁଇଜଣ ବ୍ୟକ୍ତି ପରସ୍ପରକୁ ପସନ୍ଦ କରିବା, ନିୟମିତ ଚାଟ୍ କରିବା ଏବଂ ଫୋନରେ କଥା ହେବା ଆରମ୍ଭ କରନ୍ତି। କିନ୍ତୁ ସେମାନେ ଆଗକୁ ସମ୍ପର୍କରେ ଯିବେ କି ନାହିଁ, ତାହା ସେତେବେଳେ ସ୍ଥିର ହୋଇନଥାଏ।

୩. ଫ୍ରେଣ୍ଡସ୍ ୱିଥ୍ ବେନିଫିଟ୍ସ (Friends with Benefits): ବିନା ପ୍ରତିବଦ୍ଧତାର ବନ୍ଧୁତା
ଏହି ସମ୍ପର୍କରେ ଥିବା ବ୍ୟକ୍ତିମାନେ ନିଜକୁ କେବଳ ବନ୍ଧୁ ବୋଲି ଭାବନ୍ତି, ମାତ୍ର ସେମାନଙ୍କ ମଧ୍ୟରେ ବନ୍ଧୁତାଠାରୁ ଅଧିକ ଘନିଷ୍ଠତା ଥାଏ। ଏଥିରେ ବିବାହ କିମ୍ବା କୌଣସି ଦୀର୍ଘକାଳୀନ ପ୍ରତିବଦ୍ଧତାର କୌଣସି ସ୍ଥାନ ନଥାଏ। ତେବେ ଭୁଲ୍ ବୁଝାମଣା ଏଡ଼ାଇବା ପାଇଁ ଏଥିରେ ସ୍ପଷ୍ଟତା ରହିବା ଅତ୍ୟନ୍ତ ଜରୁରୀ।

୪. ଏକ୍ସକ୍ଲୁସିଭ୍ ଡେଟିଂ (Exclusive Dating): ଅନ୍ୟ କାହାକୁ ନୁହେଁ, କେବଳ ଜଣଙ୍କୁ
ଏଥିରେ ଦୁଇଜଣ ବ୍ୟକ୍ତି ପରସ୍ପରକୁ ଡେଟ୍ କରିବାକୁ ରାଜି ହୋଇଥାନ୍ତି ଏବଂ ଏହି ସମୟରେ ଅନ୍ୟ କାହାକୁ ମଧ୍ୟ ଡେଟ୍ କରନ୍ତି ନାହିଁ। ତଥାପି, ଏହାକୁ ଏପର୍ଯ୍ୟନ୍ତ ବିବାହ ବା କୌଣସି ବଡ଼ ପ୍ରତିବଦ୍ଧତା ଭାବେ ଗ୍ରହଣ କରାଯାଇନଥାଏ।

ପଢନ୍ତୁ ଏହି ଖବର:  ପ୍ରଥମ ନେହା, ଆଉ ଏବେ ରିୟା, ଏହି ମାମଲାରେ ଗିରଫ କଲା ପୋଲିସ୍

୫. ଓପନ୍ ରିଲେସନ୍‌ସିପ୍ (Open Relationship): ପାରସ୍ପରିକ ସମ୍ମତିରେ ମୁକ୍ତ ସମ୍ପର୍କ
ଏହି ପ୍ରକାର ସମ୍ପର୍କରେ ଦୁଇଜଣ ସାଥୀ ଏକାଠି ରହୁଥିଲେ ମଧ୍ୟ, ପାରସ୍ପରିକ ସମ୍ମତିକ୍ରମେ ସେମାନେ ସମ୍ପର୍କ ବାହାରେ ଅନ୍ୟ ବ୍ୟକ୍ତିଙ୍କ ସହିତ ପ୍ରେମ ବା ଡେଟିଂ ସମ୍ପର୍କ ରଖିବାକୁ ସ୍ୱାଧୀନତା ପାଇଥାନ୍ତି। ଏଥିପାଇଁ ଗଭୀର ବିଶ୍ୱାସ ଏବଂ ସ୍ପଷ୍ଟ ନିୟମ ଦରକାର ହୋଇଥାଏ।

୬. ଲଙ୍ଗ୍-ଡିଷ୍ଟାନ୍ସ ରିଲେସନ୍‌ସିପ୍ (Long-Distance Relationship): ଦୂରତା ଯାହା ବାଧା ନୁହେଁ
ଭିନ୍ନ ସହର କିମ୍ବା ଦେଶରେ ରହି ମଧ୍ୟ ଭିଡିଓ କଲ୍ ଓ ମେସେଜ୍ ମାଧ୍ୟମରେ ସମ୍ପର୍କକୁ ଜୀବନ୍ତ ରଖିବା ଜେନ-ଜେଡ୍ ମଧ୍ୟରେ ଆଜିକାଲି ଏକ ସାଧାରଣ କଥା ହୋଇପଡ଼ିଛି।

ଜେନ-ଜେଡ୍ ସମ୍ପର୍କ ଏତେ ଭିନ୍ନ କାହିଁକି?
ବିଶ୍ୱବିଦ୍ୟାଳୟର ପାଠପଢ଼ା, କ୍ୟାରିଅର୍ ଗଠନ ଏବଂ ବ୍ୟକ୍ତିଗତ ସ୍ୱାଧୀନତାକୁ ଆଜିର ଯୁବପିଢ଼ି ସବୁଠାରୁ ଅଧିକ ଗୁରୁତ୍ୱ ଦେଉଛନ୍ତି। କୌଣସି ବଡ଼ ନିଷ୍ପତ୍ତି ନେବା ପୂର୍ବରୁ ସେମାନେ ସାଥୀଙ୍କୁ ଭଲ ଭାବରେ ଜାଣିବାକୁ ଚାହାଁନ୍ତି। ତେବେ ସମ୍ପର୍କର ନାମ ଯାହା ବି ହେଉନା କାହିଁକି, ପରସ୍ପର ପ୍ରତି ସମ୍ମାନ, ବିଶ୍ୱାସ, ସଚ୍ଚୋଟତା ଏବଂ ସ୍ପଷ୍ଟ ଭାବନା ଆଦାନପ୍ରଦାନ ହିଁ ଏକ ସୁସ୍ଥ ସମ୍ପର୍କର ମୂଳଦୁଆ ବୋଲି ବିଶେଷଜ୍ଞମାନେ ମତ ଦେଇଛନ୍ତି।