ଅନେକ ଦୁଷ୍କର୍ମ ଆଉ ଧର୍ମ ପରିବର୍ତ୍ତନ ଅଭିଯୋଗରେ ଫସିବା ପରେ ଗିରଫ ହେଲେ ଦୁଇ ଭଉଣୀ । ଝିଅମାନଙ୍କୁ ଚାକିରି ଦେବା ନାଁ କହି ନିଜ ଜାଲରେ ଫସାଉଥିଲେ । ଆଉ ପରେ ତାଙ୍କୁ ବଳପୂର୍ବକ ଧର୍ମ ପରିବର୍ତ୍ତନ କରାଇବା ସହ ସେମାନଙ୍କୁ ସେକ୍ସ ରାକେଟ୍‌ରେ ଲଗାଉଥିଲେ । ମଧ୍ୟପ୍ରଦେଶର ରାଜଧାନୀ ଭୋପାଳରେ ଏମିତି ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି । ଅଭିଯୁକ୍ତ ୨ ଭଉଣୀ ହେଉଛନ୍ତି ଆମରିନ ଏବଂ ଆଫ୍ରିନ୍ ।

ତେବେ ଏହି ଦୁଇଜଣ ଭଉଣୀଙ୍କ ନାଁରେ ରବିବାର ରାତିରେ ବାଗ୍‌ ସେୱନିଆ ଥାନାରେ ୨ ଜଣ ମହିଳା ଅଭିଯୋଗ କରିବାପରେ ପୋଲିସ ଏହି ଘଟଣାକୁ ନେଇ ତଦନ୍ତ ଆରମ୍ଭ କରିଥିଲା । ଏଥିସହ ଘଟଣାରେ ସମ୍ପୃକ୍ତ ଥିବା ୨ ଭଉଣୀ ଏବଂ ଅନ୍ୟଜଣେ ଅଭିଯୁକ୍ତ ଚନ୍ଦନଙ୍କୁ ଗିରଫ କରିଛି ପୋଲିସ।
ତେବେ ଏହି ୨ ଭଉଣୀ ଆୱାସ ନଗରର ଏକ ବସ୍ତିରେ ରହୁଥିଲେ । ସେଠାରେ ଦେହ ବ୍ୟବସାୟ କରି ଟଙ୍କା ରୋଜଗାର କରିବା ପରେ ଏକ ଭଲ ବଙ୍ଗଳାକୁ ସେମାନେ ଯାଇଥିଲେ । ଆଉ ସେଠାରେ ରହି ଅନ୍ୟ ଗରିବ ଶ୍ରେଣୀର ଯୁବତୀ ମାନଙ୍କୁ ଚାକିରି ଦେବାର ଲୋଭ ଦେଖାଇ ନିଜ ଜାଲରେ ଫସାଉଥିଲେ । ମାସକୁ ୧୦ ହଜାର ଟଙ୍କା ସହ ଖାଇବା, ରହିବା, ବୁଲିବା ଭଳି ହାଇ ପ୍ରୋଫାଇଲର ଜୀବନଶୈଳୀର ଲୋଭ ଦେଖାଉଥିଲେ । ଆଉ ସେମାନଙ୍କୁ ନେଇ ପାର୍ଟି ପବ୍‌ରେ ଗ୍ରାହକମାନଙ୍କ ସହ ମିଶିବାକୁ ବାଧ୍ୟ କରୁଥିଲେ । ସେଠାରେ ସେମାନଙ୍କୁ ନିଶା ଦିଆଯାଇ ଯୌନ ନିର୍ଯାତନା ଦିଆଯାଉଥିଲା ।

ପରେ ସେମାନଙ୍କୁ ବାଧ୍ୟ କରାଯାଇ ଧର୍ମ ପରିବର୍ତ୍ତନ ମଧ୍ୟ କରାଯାଉଥିଲା । ଏନେଇ ପରେ ଅନେକ ମହିଳା ମୁହଁ ଖୋଲି ଥାନାରେ ଅଭିଯୋଗ କରିଥିଲେ । ୨ ଭଉଣୀ ଅନେକ ଝିଅଙ୍କୁ ଫସାଇ ବେଆଇନ ଭାବେ ଲକ୍ଷଲକ୍ଷ ଟଙ୍କା ରୋଜଗାର କରୁଥିଲେ । ତେବେ ଏହି ଘଟଣାରେ ଅଭିଯୋଗ ପରେ ପୋଲିସ ଘଟଣାରେ ସମ୍ପୃକ୍ତ ୨ ଭଉଣୀ ଏବଂ ଆଉ ଜଣେ ସହଯୋଗୀଙ୍କୁ ଗିରଫ କରିଛି । ଏଥିସହ ଘଟଣାର ଅଧିକ ତଦନ୍ତ ଆରମ୍ଭ କରିଛି ପୋଲିସ ।