ବାହାରିନ୍ରେ ଫସିଥିଲେ, ଦୀର୍ଘ ୪୨ ବର୍ଷ ପରେ ଭାରତ ଫେରିଲେ ଗୋପାଳନ୍
ଦୀର୍ଘ ୪୨ ବର୍ଷ ବାହାରିନ୍ରେ ଫସି ରହିବା ପରେ ଭାରତ ଫେରିଲେ ୭୦ ବର୍ଷୀୟ ବୃଦ୍ଧ ଗୋପାଳନ୍ ଚନ୍ଦ୍ରନ୍ । ୪ ଦଶନ୍ଧି ଧରି ସେ ସେ ଫସି ରହିବା ପରେ ଭାରତ ଫେରି ନିଜ ପରିବାରକୁ ଭେଟିଛନ୍ତି ଗୋପାଳନ୍ । ଗୋପାଳନ୍ କେରଳର ବାସିନ୍ଦା ଅଟନ୍ତି । ଭାରତ ଫେରିବା ପରେ ସେ ନିଜର ସଂଘର୍ଷର କାହାଣୀ ସମ୍ପୁର୍ଣ୍ଣ ବର୍ଣ୍ଣନା କରିଛନ୍ତି । କେରଳର ତ୍ରିଭାନ୍ଦ୍ରମ୍ରେ ଥିବା ଏକ ଛୋଟ ଗାଁ ପୋଦିକୋନମ୍ରେ ନିଜର ପରିବାର ସହ ରୁହନ୍ତି ଗୋପାଳନ୍ । ହେଲେ ନିଜ ପରିବାରକୁ ପୋଷିବା ସହ କିଛି ଅଧିକା ଟଙ୍କା ରୋଜଗାର କରିବା ଆଶାରେ ସେ ୧୬ ଅଗଷ୍ଟ ୧୯୮୩ ମସିହାରେ ପରିବାର ଛାଡି ବାହାରିନ ଯାଇଥିଲେ । ଅନ୍ୟ ପ୍ରବାସୀ ଭାରତୀୟଙ୍କ ଭଳି ଅନେକ ଆଶା ଏବଂ ବିଶ୍ଵାସ ନେଇ ସେ ବାହାରିନ୍ ଯାତ୍ରା କରିଥିଲେ । କିନ୍ତୁ ତାଙ୍କ ଭାଗ୍ୟରେ ଲେଖାଥିଲା କିଛି ଅଲଗା ।
ବାହାରିନ୍ରେ ସେ ପହଞ୍ଚିବା ପରେ , ତାଙ୍କ ନିଯୁକ୍ତିଦାତାଙ୍କର ମୃତ୍ୟୁ ହୋଇ ଯାଇଥିଲା । ଏବଂ ଏହି ସମୟରେ ତାଙ୍କ ପାସପୋର୍ଟ ମଧ୍ୟ ହଜିଗଲା । ସେତେବେଳେ ଚନ୍ଦ୍ରନ୍ ନିଜର ସମସ୍ତ ପରିଚୟ ପତ୍ର ହଜାଇ ବର୍ଷ ପରେ ବର୍ଷ ସେଠାରେ ପଡି ରହିଥିଲେ । ଏହାପରେ ତାଙ୍କର ଭାରତ ଫେରିବାର ଆଶା ଅନିଶ୍ଚିତ କାଳ ପର୍ଯ୍ୟନ୍ତ ମଉଳି ଯାଇଥିଲା । ଦୀର୍ଘ ୪୨ ବର୍ଷ ପରେ ପ୍ରବାସୀ ଲିଗାଲ ସେଲ୍ ନାମକ ଏକ ଏଞ୍ଜିଓ ସଂସ୍ଥା ଦ୍ଵାରା ସେଠାରୁ ଉଦ୍ଧାର ହୋଇ ଆସିଥିଲେ । ଏହି ସଂସ୍ଥା ଯାହା ଭାରତ ଏବଂ ବିଦେଶରେ ଅନ୍ୟାୟର ସମ୍ମୁଖୀନ ହେଉଥିବା ଭାରତୀୟମାନଙ୍କ ପାଇଁ ଲଢ଼ୁଥିବା ଅବସରପ୍ରାପ୍ତ ବିଚାରପତି, ଓକିଲ ଏବଂ ସାମ୍ବାଦିକମାନଙ୍କୁ ନେଇ ଗଠିତ ହୋଇଥାଏ । ଏବେ ୪୨ ବର୍ଷ ପରେ ଫେରିବା ପରେ ନିଜ ୯୫ ବର୍ଷୀୟ ବୃଦ୍ଧା ମା'ଙ୍କୁ ଭେଟିଛନ୍ତି ଗୋପାଳନ୍ । ପରିବାର ଲୋକେ ଗୋପାଳନ୍ଙ୍କୁ ପାଇ ଖୁସିରେ ଭାବବିହ୍ଵଳ ହୋଇ ପଡିଛନ୍ତି ।
