ଅର୍ଗସ ବ୍ୟୁରୋ: ଦେଶର ବିଭିନ୍ନ ରାଜ୍ୟରେ ଛଟ୍ ପୂଜାର ଧୁମ୍ । ଉତ୍ତର ପ୍ରଦେଶ, ଦିଲ୍ଲୀ, ବିହାର, ଝାଡ଼ଖଣ୍ଡରେ ମହାପର୍ବ ଭାବେ ପାଳିତ ହେଉଥିବା ବେଳେ ଓଡ଼ିଶାର ବିଭିନ୍ନ ସ୍ଥାନରେ ମଧ୍ୟ ପାଳିତ ହେଉଛି ଛଟ୍ ପୂଜା । 4 ଦିନିଆ ଛଟ୍ ପୂଜାର ଆଜି ତୃତୀୟ ଦିନ । ପରମ୍ପରା ଅନୁସାରେ ତୃତୀୟ ଦିବସରେ ନିଷ୍ଠାର ସହ ବ୍ରତ ପାଳନ କରନ୍ତି ଭକ୍ତ । ବିହାରରେ ଧୁମଧାମରେ ପାଳିତ ହେଉଛି ଛଟ ପୂଜା । ରାଜ୍ୟରେ 6ରୁ 9ତାରିଖ ଯାଏ ସ୍କୁଲ, କଲେଜ ଛୁଟି ଘୋଷଣା ହୋଇଛି । 

ଉତ୍ତର ପ୍ରଦେଶ ଓ ଦିଲ୍ଲୀରେ ଛଟ ପୂଜା ପାଇଁ ମଧ୍ୟ ଆଜି ସ୍କୁଲ, କଲେଜ ବନ୍ଦ ରହିଛି । ଆମ ରାଜ୍ୟରେ କଟକ, ଝାରସୁଗୁଡ଼ା ସହ ଅନ୍ୟ ସ୍ଥାନରେ ମଧ୍ୟ ଛଟ୍ ପୂଜା ପାଳନ ହେଉଛି । ଘରେ ଘରେ ପିଠାପଣା ହେବା ସହ ପୂଜା ସାମଗ୍ରୀ ଓ ଫଳ କିଣିବାକୁ ବଜାରରେ ମଧ୍ୟ ଭିଡ଼ ଦେଖିବାକୁ ମିଳୁଛି।  ବ୍ରତଧାରୀ  ଛଠୀ ମୈୟା ଓ ସୂର୍ଯ୍ୟ ଦେବଙ୍କୁ ଉପାସନା କରୁଛନ୍ତି । ପରମ୍ପରା ଅନୁସାରେ ଛଟ୍ ପୂଜାର ପ୍ରଥମ ଦିନରେ ନହାୟ ଖାୟ, ଦ୍ବିତୀୟ ଦିନ ଖରନା ପରେ ଗୁରୁତ୍ବପୂର୍ଣ୍ଣ ତୃତୀୟ ଦିନରେ ଅସ୍ତଗାମୀ ସୂର୍ଯ୍ୟଙ୍କୁ ଅର୍ଘ୍ୟ ଦିଆଯାଏ । ଶେଷ ଦିନ ପ୍ରଭାତରୁ ସୂର୍ଯ୍ୟ ପୂଜା କରି ପର୍ବର ସମାପନ କରିଥାନ୍ତି ବ୍ରତଧାରୀ ।