Divorce Case / ବିବାହର ୩୫ ବର୍ଷ ପରେ ଛାଡ଼ପତ୍ର ଆବେଦନକୁ ଖାରଜ ହାଇକୋର୍ଟ କହିଲା...

ବିବାହର ପ୍ରାୟ ୩୫ ବର୍ଷ ପରେ ଛାଡ଼ପତ୍ର ଦାବି କରିଥିବା ଜମଶେଦପୁରର ଜଣେ ୫୮ ବର୍ଷୀୟ ବ୍ୟକ୍ତିଙ୍କ ଆବେଦନକୁ ଝାରଖଣ୍ଡ ହାଇକୋର୍ଟ ଖାରଜ କରିଦେଇଛନ୍ତି । ପତି ନିଜ ପତ୍ନୀଙ୍କ ବିରୋଧରେ ଘରୁ ବାହାର କରିଦେବା, ଟଏଲେଟ୍‌ରେ ବନ୍ଦ କରିଦେବା ଓ ପାଣି ଯୋଗାଣ ବନ୍ଦ କରିଦେବା ଭଳି ଗମ୍ଭୀର ମାନସିକ ଓ ଶାରୀରିକ ନିର୍ଯାତନାର ଅଭିଯୋଗ ଆଣିଥିଲେ ।

କିନ୍ତୁ ଅଦାଲତ କହିଛନ୍ତି ଯେ ଅଭିଯୋଗ ଯେତେ ଗମ୍ଭୀର ହେଉନା କାହିଁକି, ତାହା ପ୍ରମାଣ କରିବା ପାଇଁ ଠୋସ୍ ଓ ବିଶ୍ୱସନୀୟ ପ୍ରମାଣ ରହିବା ଆବଶ୍ୟକ । କେବଳ ନିଜର ବୟାନ ଆଧାରରେ ଦୀର୍ଘଦିନର ବୈବାହିକ ସମ୍ପର୍କକୁ ଶେଷ କରାଯାଇପାରିବ ନାହିଁ ।

୩୧ ବର୍ଷ ପର୍ଯ୍ୟନ୍ତ ଠିକ୍ ଥିଲା ବୈବାହିକ ଜୀବନ !
ପତିଙ୍କ ଦାବି ଅନୁସାରେ, ତାଙ୍କ ବିବାହ ୨୦ ମେ ୧୯୮୯ରେ ହୋଇଥିଲା । ଦମ୍ପତିଙ୍କର ତିନିଜଣ ପୁଅ ଅଛନ୍ତି । ତାଙ୍କ କହିବା ଅନୁସାରେ, ବିବାହ ପରେ ପ୍ରାୟ ୩୧ ବର୍ଷ ପର୍ଯ୍ୟନ୍ତ ଦାମ୍ପତ୍ୟ ଜୀବନ ସାଧାରଣ ଓ ଶାନ୍ତିପୂର୍ଣ୍ଣ ଥିଲା । କିନ୍ତୁ ୨୦୨୦ ମସିହା ଜୁନ୍ ପରେ ପତ୍ନୀଙ୍କ ବ୍ୟବହାରରେ ହଠାତ୍ ପରିବର୍ତ୍ତନ ଆସିଥିବା ସେ ଅଭିଯୋଗ କରିଥିଲେ । ଏହା ପରେ ଦୁହିଁଙ୍କ ସମ୍ପର୍କରେ ତିକ୍ତତା ବଢ଼ିଥିବା ତାଙ୍କ ଦାବି ଥିଲା ।

ଟଏଲେଟ୍‌ରେ ବନ୍ଦ କରିବାଠାରୁ ପାଣି ବନ୍ଦ କରିବା ପର୍ଯ୍ୟନ୍ତ ଅଭିଯୋଗ
ସ୍ଵାମୀ ଅଭିଯୋଗ କରିଥିଲେ ଯେ ପତ୍ନୀ ତାଙ୍କୁ ବିର୍ସାନଗରସ୍ଥିତ ଘରୁ ବାହାର କରିଦେଇଥିଲେ । ଏହା ସହିତ ଅନେକ ଥର ତାଙ୍କୁ ଟଏଲେଟ୍‌ରେ ବନ୍ଦ କରିଥିବା ଏବଂ ବାଥରୁମ୍‌ର ପାଣି ଯୋଗାଣ ବନ୍ଦ କରିଦେଇଥିବା ମଧ୍ୟ ସେ ଦାବି କରିଥିଲେ । ଏପରିକି ଘରେ ଗାଈ ରଖିବାକୁ ମଧ୍ୟ ତାଙ୍କୁ ଅନୁମତି ଦିଆଯାଇନଥିବା ସେ ଅଭିଯୋଗ କରିଥିଲେ । ଏହି ସମସ୍ତ ଅଭିଯୋଗକୁ ଆଧାର କରି ସେ ହିନ୍ଦୁ ବିବାହ ଆଇନ ଅନୁସାରେ ଏହାକୁ ଆଧାର କରି ଛାଡ଼ପତ୍ର ଦାବି କରିଥିଲେ ।

ଅଦାଲତରେ ଦେଇପାରିଲେ ନାହିଁ ଠୋସ୍ ପ୍ରମାଣ
ମାମଲାର ଶୁଣାଣି ସମୟରେ ହାଇକୋର୍ଟ ଦେଖିଥିଲେ ଯେ ପତି ନିଜ ଅଭିଯୋଗଗୁଡ଼ିକୁ ସମର୍ଥନ କରିବା ପାଇଁ ସ୍ୱାଧୀନ ସାକ୍ଷୀ କିମ୍ବା ଠୋସ୍ ଦସ୍ତାବିଜ ଦାଖଲ କରିନଥିଲେ । ଏହି ଘଟଣାଗୁଡ଼ିକ ସମ୍ପର୍କରେ ସେ ପୂର୍ବରୁ ପୋଲିସରେ କୌଣସି ଅଭିଯୋଗ ମଧ୍ୟ କରିନଥିବା କଥା ଅଦାଲତଙ୍କ ଦୃଷ୍ଟିକୁ ଆସିଥିଲା । ଅଦାଲତଙ୍କ ମତ ଥିଲା ଯେ ଏତେ ଦିନ ବୈବାହିକ ସମ୍ପର୍କକୁ ଶେଷ କରିବା ଭଳି ଗୁରୁତର ପଦକ୍ଷେପ ପାଇଁ କେବଳ ଆବେଦନକାରୀଙ୍କ ନିଜସ୍ୱ ବୟାନ ପର୍ଯ୍ୟାପ୍ତ ନୁହେଁ ।

ପତ୍ନୀ ଅଦାଲତରେ ହାଜର ହୋଇନଥିଲେ ମଧ୍ୟ ଛାଡ଼ପତ୍ର ମିଳିଲା ନାହିଁ
ଏହି ମାମଲାରେ ପତ୍ନୀ ପୂର୍ବରୁ ଘରୋଇ ହିଂସା ଓ ଭରଣପୋଷଣ ସମ୍ପର୍କିତ ଆଇନଗତ ପଦକ୍ଷେପ ନେଇଥିବା କୁହାଯାଇଛି । ଏହା ପରେ ପତି ତଲାକ ମାମଲା ଦାୟର କରିଥିଲେ । ପତ୍ନୀଙ୍କୁ ନୋଟିସ୍ ଦିଆଯାଇଥିଲେ ମଧ୍ୟ ସେ ଫ୍ୟାମିଲି କୋର୍ଟରେ ହାଜର ହୋଇନଥିଲେ । ଫଳରେ ମାମଲାଟି ଏକତରଫା ଭାବେ ଚାଲିଥିଲା । ତଥାପି ଫ୍ୟାମିଲି କୋର୍ଟ ପ୍ରମାଣର ଅଭାବ ଦର୍ଶାଇ ଛାଡ଼ପତ୍ର ଦେବାକୁ ମନା କରିଥିଲେ । ଏହା ବିରୋଧରେ ସ୍ଵାମୀ ଝାରଖଣ୍ଡ ହାଇକୋର୍ଟରେ ଆବେଦନ କରିଥିଲେ ।

ଫ୍ୟାମିଲି କୋର୍ଟର ରାୟକୁ ବଜାୟ ରଖିଲେ ହାଇକୋର୍ଟ
ନ୍ୟାୟମୂର୍ତ୍ତି ସୁଜିତ ନାରାୟଣ ପ୍ରସାଦ ଓ ନ୍ୟାୟମୂର୍ତ୍ତି ସଞ୍ଜୟ ପ୍ରସାଦଙ୍କ ଖଣ୍ଡପୀଠ ମାମଲାର ଶୁଣାଣି କରି ଫ୍ୟାମିଲି କୋର୍ଟର ନିଷ୍ପତ୍ତିକୁ ବଜାୟ ରଖିଛନ୍ତି । ଅଦାଲତ ସ୍ପଷ୍ଟ କରିଛନ୍ତି ଯେ ବୈବାହିକ କ୍ରୁରତା ଭଳି ଗୁରୁତର ଅଭିଯୋଗ ପ୍ରମାଣ ପାଇଁ ଠୋସ୍ ଓ ବିଶ୍ୱସନୀୟ ସାକ୍ଷ୍ୟ ଆବଶ୍ୟକ । କେବଳ ଅଭିଯୋଗ କିମ୍ବା ଏକତରଫା ବୟାନ ଆଧାରରେ ଦାମ୍ପତ୍ୟ ସମ୍ପର୍କ ବିଚ୍ଛିନ୍ନ କରାଯାଇପାରିବ ନାହିଁ । ଏହି କାରଣରୁ ୩୫ ବର୍ଷର ବିବାହ ପରେ ଦାଖଲ ହୋଇଥିବା ପତିଙ୍କ ଛାଡ଼ପତ୍ର ଆବେଦନକୁ ହାଇକୋର୍ଟ ଖାରଜ କରିଛନ୍ତି ।