Marriage Case / ପତ୍ନୀଙ୍କ ପରକିୟା ପ୍ରତିର ପ୍ରମାଣ ଯୋଗାଡ଼ କରି ସ୍ୱାମୀ ଜିତିଲେ କେସ୍‌, କିନ୍ତୁ ନିଜେ ଗଲେ ଜେଲ୍‌

ପତ୍ନୀଙ୍କ ପରକୀୟା ସମ୍ପର୍କର ପ୍ରମାଣ ଯୋଗାଡ଼ କରିବାକୁ ସ୍ୱାମୀ ଏମିତି ଏକ ପଦକ୍ଷେପ ନେଲେ, ଯାହା ତାଙ୍କୁ ପ୍ରଥମେ କୋର୍ଟରେ ବିଜୟୀ କଲା, କିନ୍ତୁ ପରେ ନିଜକୁ ଅଭିଯୁକ୍ତ କରିଦେଲା । ରୋବୋଟ୍‌ ଭ୍ୟାକ୍ୟୁମ୍‌ କ୍ଲିନର୍‌ ମାଧ୍ୟମରେ ପତ୍ନୀଙ୍କ ଗୁପ୍ତ ଭିଡିଓ ରେକର୍ଡ କରି ସେ ବେଇମାନିର ପ୍ରମାଣ କୋର୍ଟରେ ଦେଖାଇଥିଲେ । ଫଳରେ ପତ୍ନୀ ଓ ତାଙ୍କ କଥିତ ପ୍ରେମିକଙ୍କୁ କ୍ଷତିପୂରଣ ଦେବାକୁ ପଡ଼ିଥିଲା । କିନ୍ତୁ ଅନୁମତି ବିନା ବ୍ୟକ୍ତିଗତ ମୁହୂର୍ତ୍ତର ରେକର୍ଡିଂ କରିଥିବାରୁ ଶେଷରେ ସେହି ସ୍ୱାମୀଙ୍କୁ ନିଜେ ୫ ମାସ ଜେଲ୍‌ ଦଣ୍ଡ ଭୋଗିବାକୁ ପଡ଼ିଲା । ତାଇୱାନ୍‌ର ଏହି ଅଜବ ମାମଲା ଏବେ ପ୍ରାଇଭେସି ଅଧିକାର ଓ ବେଇମାନିର ପ୍ରମାଣ ମଧ୍ୟରେ ଆଇନର ସୀମାକୁ ନେଇ ଚର୍ଚ୍ଚା ସୃଷ୍ଟି କରିଛି ।

ତାଇୱାନ୍‌ରେ ଘଟିଥିବା ଏକ ଅଜବ ମାମଲା ଏବେ ଚର୍ଚ୍ଚାରେ । ପତ୍ନୀଙ୍କର ପରକୀୟା ସମ୍ପର୍କ ଥିବା ସନ୍ଦେହରେ ଜଣେ ସ୍ୱାମୀ ଗୁପ୍ତ ଭାବେ ପ୍ରମାଣ ସଂଗ୍ରହ କରିଥିଲେ । ସେହି ପ୍ରମାଣକୁ ନେଇ କୋର୍ଟରେ ମାମଲା କରି ସେ ସଫଳ ମଧ୍ୟ ହେଲେ । କିନ୍ତୁ ଗୁପ୍ତ ରେକର୍ଡିଂ କରିଥିବାରୁ ଶେଷରେ ତାଙ୍କୁ ନିଜେ ଜେଲ୍‌ ଯିବାକୁ ପଡ଼ିଲା ।

ପତ୍ନୀଙ୍କ ଉପରେ ହୋଇଥିଲା ସନ୍ଦେହ
ତାଇୱାନ୍‌ର ଏହି ବ୍ୟକ୍ତି ୨୦୨୧ ମସିହାରେ ବିବାହ କରିଥିଲେ । ସେ ନିଜ ପିତାମାତାଙ୍କ ସହ ରହୁଥିଲେ । ଛୁଟି କାଟିବା ପାଇଁ କିଣାଯାଇଥିବା ଏକ ଘରକୁ ସେ ଓ ତାଙ୍କ ପତ୍ନୀ ମଝିମଝିରେ ଯାଉଥିଲେ ।

୨୦୨୩ ସେପ୍ଟେମ୍ବରରେ ସେହି ଘରେ ଏକ ବ୍ୟବହୃତ ଟୁଥବ୍ରଶ୍‌ ମିଳିବା ପରେ ସ୍ୱାମୀଙ୍କ ସନ୍ଦେହ ଆହୁରି ବଢ଼ିଥିଲା । ପରେ ସେ ପାର୍କିଂ ଲଟ୍‌ର ସିସିଟିଭି ଫୁଟେଜ୍‌ ଯାଞ୍ଚ କରିଥିଲେ । ସେଠାରେ ଜଣେ ଅଜଣା ପୁରୁଷ ତାଙ୍କ ପତ୍ନୀଙ୍କୁ ଘରେ ଛାଡ଼ି ଯାଉଥିବା ଦେଖିଥିଲେ ।

ରୋବୋଟ୍‌ ଭ୍ୟାକ୍ୟୁମ୍‌ରେ ଗୁପ୍ତ ରେକର୍ଡିଂ
ଏହାର ପ୍ରାୟ ତିନି ମାସ ପରେ ସ୍ୱାମୀ ଏକ ସ୍ମାର୍ଟଫୋନ୍‌ ଆପ୍‌ ମାଧ୍ୟମରେ ଘରେ ଥିବା ରୋବୋଟ୍‌ ଭ୍ୟାକ୍ୟୁମ୍‌ କ୍ଲିନର୍‌କୁ ଦୂରରୁ ଚଳାଇଥିଲେ । ଏହି ଡିଭାଇସ୍‌ରେ ଅଡିଓ ଫଙ୍କସନ୍‌ ମଧ୍ୟ ଥିଲା ।

ପ୍ରଥମେ ସେ ପତ୍ନୀଙ୍କ ସହ କଥା ହେବା ପାଇଁ ଏହି ଫଙ୍କସନ୍‌ ବ୍ୟବହାର କରିବାକୁ ଚାହୁଁଥିଲେ । କିନ୍ତୁ ଲାଇଭ୍‌ ଫିଡ୍‌ରେ ସେ ପତ୍ନୀଙ୍କୁ ଜଣେ ଅନ୍ୟ ପୁରୁଷଙ୍କ ସହ ଆପତ୍ତିଜନକ ଅବସ୍ଥାରେ ଦେଖିଥିଲେ । ସେ ଏହାର ଫୁଟେଜ୍‌ ରେକର୍ଡ କରି ରଖିଥିଲେ ।

କୋର୍ଟରେ ସ୍ୱାମୀଙ୍କ ବିଜୟ
ଏହି ଫୁଟେଜ୍‌କୁ ଆଧାର କରି ସ୍ୱାମୀ ତାଙ୍କ ପତ୍ନୀ ଏବଂ ତାଙ୍କ କଥିତ ପ୍ରେମିକଙ୍କ ବିରୋଧରେ ସିଭିଲ୍‌ ମାମଲା କରିଥିଲେ । ସେ ୨ ମିଲିୟନ୍‌ ନ୍ୟୁ ତାଇୱାନ୍‌ ଡଲାର୍‌ କ୍ଷତିପୂରଣ ଦାବି କରିଥିଲେ । କୋର୍ଟ ମାମଲାରେ ନିଷ୍ପତ୍ତି ଦେଇ କହିଥିଲେ ଯେ ଉଭୟଙ୍କ ସମ୍ପର୍କ ସାଧାରଣ ବନ୍ଧୁତାଠାରୁ ଆଗକୁ ବଢ଼ିଥିଲା । ଏହା ପାଇଁ ପତ୍ନୀ ଏବଂ ସେହି ପୁରୁଷଙ୍କୁ ମିଶି ୫ ଲକ୍ଷ ନ୍ୟୁ ତାଇୱାନ୍‌ ଡଲାର୍‌ କ୍ଷତିପୂରଣ ଦେବାକୁ ଆଦେଶ ଦିଆଯାଇଥିଲା ।

ପ୍ରମାଣ ସତ ହେଲେ ବି ରେକର୍ଡିଂ ଥିଲା ବେଆଇନ
ଏହି ମାମଲା ପରେ ସ୍ୱାମୀଙ୍କ ପାଇଁ ସମସ୍ୟା ବଢ଼ିଥିଲା । ଗୁପ୍ତ ରେକର୍ଡିଂକୁ ନେଇ ତାଙ୍କ ପତ୍ନୀ ଅଲଗା ଆଇନଗତ ପଦକ୍ଷେପ ନେଇଥିଲେ । ସ୍ୱାମୀ ଯୁକ୍ତି ଦେଇଥିଲେ ଯେ ଫୁଟେଜ୍‌କୁ କୋର୍ଟ ସିଭିଲ୍‌ ମାମଲାରେ ପ୍ରମାଣ ଭାବେ ଗ୍ରହଣ କରିଛନ୍ତି । ତେଣୁ ତାଙ୍କ ରେକର୍ଡିଂ ଆଇନସମ୍ମତ ବୋଲି ସେ ଦାବି କରିଥିଲେ ।
କିନ୍ତୁ କୋର୍ଟ ଏହି ଯୁକ୍ତିକୁ ଖାରଜ କରିଥିଲେ । କୋର୍ଟ ସ୍ପଷ୍ଟ କରିଥିଲେ ଯେ ବିବାହିତ ସମ୍ପର୍କରେ ଥିବା କୌଣସି ବ୍ୟକ୍ତିଙ୍କର ବ୍ୟକ୍ତିଗତ ଗୋପନୀୟତାର ଅଧିକାର ଶେଷ ହୋଇଯାଏ ନାହିଁ ।

୫ ମାସ ଜେଲ୍‌ ଓ ଜରିମାନା
କୋର୍ଟଙ୍କ ଅନୁସାରେ, ତାଙ୍କ ପତ୍ନୀଙ୍କୁ ଗୁପ୍ତ ଭାବେ ରେକର୍ଡ କରାଯାଉଥିବା ବିଷୟରେ ଜଣାଥିଲା ବୋଲି ପ୍ରମାଣ ମିଳିନଥିଲା । ରୋବୋଟ୍‌ ଭ୍ୟାକ୍ୟୁମ୍‌ରୁ ଶବ୍ଦ କିମ୍ବା ଆଲୋକ ବାହାରୁଥିଲେ ମଧ୍ୟ ତାହା ରେକର୍ଡିଂ ବିଷୟରେ ତାଙ୍କୁ ଜଣାଇଥିବାର ପ୍ରମାଣ ନଥିଲା । ଫଳରେ ବ୍ୟକ୍ତିଗତ ମୁହୂର୍ତ୍ତକୁ ବେଆଇନ ଭାବେ ରେକର୍ଡ କରିଥିବା ଅଭିଯୋଗରେ ସ୍ୱାମୀଙ୍କୁ ୫ ମାସ ଜେଲ୍‌ ଦଣ୍ଡ ସହ ୧.୫ ଲକ୍ଷ ନ୍ୟୁ ତାଇୱାନ୍‌ ଡଲାର୍‌ ଜରିମାନା କରାଯାଇଥିଲା ।

ତାଇୱାନ୍‌ରେ ପ୍ରାଇଭେସି ଆଇନ କ’ଣ କହେ ?
ତାଇୱାନ୍‌ର ଆଇନ ଅନୁସାରେ, କୌଣସି ବ୍ୟକ୍ତିଙ୍କର ବ୍ୟକ୍ତିଗତ ମୁହୂର୍ତ୍ତକୁ ତାଙ୍କ ଅନୁମତି ବିନା ରେକର୍ଡ କରିବା କିମ୍ବା ପ୍ରକାଶ କରିବା ଅପରାଧ ହୋଇପାରେ । ଏଥିପାଇଁ ୩ ବର୍ଷ ପର୍ଯ୍ୟନ୍ତ ଜେଲ୍‌ ଏବଂ ୩ ଲକ୍ଷ ନ୍ୟୁ ତାଇୱାନ୍‌ ଡଲାର୍‌ ପର୍ଯ୍ୟନ୍ତ ଜରିମାନା ହୋଇପାରେ ।

ଏହି ଘଟଣା ଏବେ ଏକ ବଡ଼ ପ୍ରଶ୍ନ ଉଠାଇଛି ବିବାହିତ ସମ୍ପର୍କରେ ବେଇମାନିର ପ୍ରମାଣ ଯୋଗାଡ଼ କରିବା ସମୟରେ ଜଣେ ବ୍ୟକ୍ତି କେତେ ଦୂର ପର୍ଯ୍ୟନ୍ତ ଆଇନର ସୀମା ମଧ୍ୟରେ ରହିପାରିବେ ? ଏହି ମାମଲାରେ ସ୍ୱାମୀ ପତ୍ନୀଙ୍କ ବେଇମାନି ପ୍ରମାଣ କରି କ୍ଷତିପୂରଣ ଜିତିଥିଲେ, କିନ୍ତୁ ସେହି ପ୍ରମାଣ ସଂଗ୍ରହ କରିବାର ପଦ୍ଧତି ପାଇଁ ନିଜେ ଦଣ୍ଡିତ ହେଲେ ।