Government Jobs / କିଏ ଦିବ୍ୟା ମିତ୍ତଲ ? ୧୩ ବର୍ଷ ପରେ IAS ଛାଡ଼ିଲେ ଦିବ୍ୟା ମିତ୍ତଲ କାହିଁକି ନେଲେ ଏତେ ବଡ଼ ନିଷ୍ପତ୍ତି

୧୩ ବର୍ଷ ଧରି ପ୍ରଶାସନିକ ସେବାରେ ରହିବା ପରେ ଉତ୍ତରପ୍ରଦେଶ କ୍ୟାଡରର IAS ଅଧିକାରୀ ଦିବ୍ୟା ମିତ୍ତଲ ନିଜ ପଦରୁ ସ୍ୱେଚ୍ଛାକୃତ ଭାବେ ଇସ୍ତଫା ଦେଇଛନ୍ତି । ବର୍ତ୍ତମାନ ସେ ଉତ୍ତରପ୍ରଦେଶରେ ବିଶେଷ ସଚିବ ଭାବେ କାର୍ଯ୍ୟରତ ଥିଲେ । ଇସ୍ତଫା ପରେ ସୋସିଆଲ ମିଡିଆରେ ସେ ନିଜର ୧୩ ବର୍ଷର ପ୍ରଶାସନିକ ଯାତ୍ରା ଓ ଦେଶସେବାର ଅନୁଭବ ବାଣ୍ଟିଛନ୍ତି ।

ଦିବ୍ୟା ମିତ୍ତଲଙ୍କ ଫେସବୁକ୍ ଓ X ପୋଷ୍ଟ ଏବେ ସୋସିଆଲ ମିଡିଆରେ ଚର୍ଚ୍ଚାରେ ରହିଛି । ତାଙ୍କ ଲେଖାରେ ସେବାକାଳୀନ ଅନୁଭବ, ଲୋକଙ୍କ ପ୍ରତି ତାଙ୍କ ଭଲପାଇବା ଏବଂ ପ୍ରଶାସନିକ ପଦଠାରୁ ବଡ଼ ତାଙ୍କ ସ୍ୱପ୍ନର କଥା ଉଲ୍ଲେଖ କରିଛନ୍ତି ।

आज मैंने 13 वर्षों की अविस्मरणीय यात्रा को अपनी इच्छा से विराम देते हुए IAS से त्यागपत्र दे दिया है।

साधारण परिवेश में पलते हुए मैंने एक अच्छे, सफल जीवन का सपना देखा था। दिन-रात एक कर IIT दिल्ली और IIM बैंगलोर से पढ़ने के बाद, लंदन में नौकरी लग गयी। पर 'सब कुछ' पा लेने पर भी कुछ… pic.twitter.com/4VRXpK8nu8

— Divya Mittal (@divyamittal_IAS) August 30, 2026

IIT-IIM ପରେ ଲଣ୍ଡନର ଚାକିରି, ତା’ପରେ IAS
ଦିବ୍ୟା ମିତ୍ତଲଙ୍କ ଶିକ୍ଷାଗତ ଯାତ୍ରା ମଧ୍ୟ ବେଶ ପ୍ରେରଣାଦାୟକ । ସେ IIT ଦିଲ୍ଲୀରୁ B.Tech ଡିଗ୍ରୀ ହାସଲ କରିବା ପରେ IIM ବେଙ୍ଗାଲୁରୁରୁ MBA କରିଥିଲେ । ଏହାପରେ ଲଣ୍ଡନର ଅନ୍ତର୍ଜାତୀୟ ଆର୍ଥିକ ସଂସ୍ଥା JP Morganରେ ଟ୍ରେଡର ଭାବେ କାମ କରିଥିଲେ । ଭଲ ଦରମା ଓ ବିଦେଶର ସଫଳ କ୍ୟାରିୟର ସତ୍ତ୍ୱେ ତାଙ୍କ ମନରେ ଏକ ଅଧୂରାପଣ ରହିଥିଲା । ନିଜ ଦେଶଠାରୁ ଦୂରରେ ରହିବା ତାଙ୍କୁ ବାରମ୍ବାର ବିଚଳିତ କରୁଥିଲା । ଶେଷରେ ସେ ଲଣ୍ଡନର ଚାକିରି ଛାଡ଼ି ଭାରତ ଫେରି UPSC ପାଇଁ ପ୍ରସ୍ତୁତି ଆରମ୍ଭ କରିଥିଲେ । ୨୦୧୨ ମସିହାରେ ସେ UPSC ପରୀକ୍ଷାରେ ସଫଳ ହୋଇ ଅଲ୍ ଇଣ୍ଡିଆ ରାଙ୍କ ୬୮ ହାସଲ କରି IAS ଅଧିକାରୀ ହୋଇଥିଲେ । ତାଙ୍କ ସ୍ୱାମୀ ଗଗନଦୀପ ସିଂହ ମଧ୍ୟ ଜଣେ IAS ଅଧିକାରୀ ।

ମିର୍ଜାପୁରରେ ୭୫ ବର୍ଷର ପାଣି ସମସ୍ୟାର ସମାଧାନ
IAS ଅଧିକାରୀ ଭାବେ ଦିବ୍ୟା ମିତ୍ତଲ ଉତ୍ତରପ୍ରଦେଶର ବିଭିନ୍ନ ଜିଲ୍ଲାରେ କାମ କରିଛନ୍ତି । ସେ ମିର୍ଜାପୁର, ସନ୍ତକବୀରନଗର ଓ ଦେଓରିଆର ଜିଲ୍ଲାପାଳ (DM) ଭାବେ ଦାୟିତ୍ୱ ତୁଲାଇଥିଲେ । ଗୋଣ୍ଡାରେ ସେ CDO ଭାବେ ମଧ୍ୟ କାମ କରିଛନ୍ତି ।

ମିର୍ଜାପୁରର DM ଥିବା ସମୟରେ ହାଲିଆ ବ୍ଲକର ଦୁର୍ଗମ ପାହାଡ଼ିଆ ଗାଁ ଲହୁରିଆଦହର ଲୋକଙ୍କ ପାଇଁ ସେ କରିଥିବା କାମ ବିଶେଷ ଭାବେ ଚର୍ଚ୍ଚିତ ହୋଇଥିଲା । ପ୍ରାୟ ୭୫ ବର୍ଷ ଧରି ପାଣି ପାଇଁ ସଂଘର୍ଷ କରୁଥିବା ଲୋକଙ୍କ ଗାଁରେ ପାଇପ୍ ଯୋଗେ ପାଣି ପହଞ୍ଚାଇବାରେ ସେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ ।

ଇସ୍ତଫା ପରେ ଭାବପ୍ରବଣ ହେଲେ ଦିବ୍ୟା
ନିଜ ଫେସବୁକ୍ ପୋଷ୍ଟରେ ଦିବ୍ୟା ଲେଖିଛନ୍ତି ଯେ ୧୩ ବର୍ଷର ଅବିସ୍ମରଣୀୟ ଯାତ୍ରାକୁ ସେ ନିଜ ଇଚ୍ଛାରେ ବିରାମ ଦେଇଛନ୍ତି । ସାଧାରଣ ପରିବେଶରେ ବଢ଼ି ସେ ଏକ ସଫଳ ଜୀବନର ସ୍ୱପ୍ନ ଦେଖିଥିଲେ । IIT ଦିଲ୍ଲୀ ଓ IIM ବେଙ୍ଗାଲୁରୁରେ ପଢ଼ିବା ପରେ ଲଣ୍ଡନରେ ଚାକିରି ମିଳିଥିଲା । କିନ୍ତୁ ସବୁକିଛି ହାସଲ କରିବା ପରେ ମଧ୍ୟ ମନରେ କିଛି ଅଧୂରା ରହିଥିବା ଅନୁଭବ କରୁଥିଲେ । ଦେଶକୁ ଫେରିବା ନିଷ୍ପତ୍ତି ତାଙ୍କୁ ମାନସିକ ଶାନ୍ତି ଦେଇଥିଲା । IAS ହେବା ପରେ ଲୋକଙ୍କ ପାଇଁ କାମ କରିବାର ସୁଯୋଗକୁ ସେ ନିଜ ଜୀବନର ସବୁଠାରୁ ବଡ଼ ସଫଳତା ଭାବେ ଦେଖିଛନ୍ତି ।

ଦିବ୍ୟାଙ୍କ ଅନୁସାରେ, ଦେଓରିଆ ତାଙ୍କୁ ଶିଖାଇଥିଲା ଯେ ସଠିକ୍ କଥା ସହିତ ଠିଆ ହେବା କୌଣସି ବିକଳ୍ପ ନୁହେଁ, ବରଂ କର୍ତ୍ତବ୍ୟ । ମିର୍ଜାପୁର ତାଙ୍କୁ ଶିଖାଇଥିଲା ଯେ ‘ଅସମ୍ଭବ’ କୌଣସି ତଥ୍ୟ ନୁହେଁ, ଏହା କେବଳ ଏକ ମତ । ସେ ଆହୁରି ଲେଖିଛନ୍ତି ଯେ ସରକାରୀ ଫାଇଲ୍ ପଛରେ ସବୁବେଳେ ଜଣେ ମଣିଷ ଥାଆନ୍ତି । ତାଙ୍କ ମର୍ଯ୍ୟାଦାକୁ ସୁରକ୍ଷିତ ରଖିବା ହିଁ ପ୍ରକୃତ ନ୍ୟାୟ ।

‘ମୁଁ ଦେବାକୁ ଆସିଥିଲି ବୋଲି ଭାବିବା ମୋର ଭୁଲ ଥିଲା’
ଦିବ୍ୟା ମିତ୍ତଲଙ୍କ ପୋଷ୍ଟର ସବୁଠାରୁ ଭାବପ୍ରବଣ ଅଂଶ ହେଉଛି - ସେ ଲୋକଙ୍କୁ ଦେବାକୁ ଆସିଥିଲେ ବୋଲି ଭାବିବା ତାଙ୍କର ଭୁଲ ଥିଲା । ବାସ୍ତବରେ ଲୋକଙ୍କଠାରୁ ସେ ନିଜେ ଅଧିକ କିଛି ପାଇଛନ୍ତି ବୋଲି କହିଛନ୍ତି ।

ଲୋକଙ୍କ ଭଲପାଇବା, ସମ୍ମାନ ଓ ବିଶ୍ୱାସ ତାଙ୍କୁ କଠିନ ସମୟରେ ମଧ୍ୟ ଆଗକୁ ବଢ଼ିବାର ଶକ୍ତି ଦେଇଥିଲା । ତାଙ୍କ କହିବା ଅନୁସାରେ, ଲୋକଙ୍କ ଖୁସିରେ ସେ ଯେଉଁ ଆନନ୍ଦ ଦେଖିଛନ୍ତି, ତାହା ତାଙ୍କ ଜୀବନର ଅମୂଲ୍ୟ ସମ୍ପଦ । ଇସ୍ତଫା ଦେବା ସମୟରେ ସେ ଲହୁରିଆଦହର ସେହି ବୃଦ୍ଧ ମହିଳାଙ୍କୁ ମଧ୍ୟ ମନେ ପକାଇଛନ୍ତି, ଯିଏ ନିଜ ଗାଁରେ ପ୍ରଥମଥର ପାଣି ପହଞ୍ଚିବା ଦେଖି ଦିବ୍ୟାଙ୍କ ମୁଣ୍ଡରେ ହାତ ରଖି ଆଶୀର୍ବାଦ କରିଥିଲେ ।

ଦିବ୍ୟା ଲେଖିଛନ୍ତି ଯେ ପଦ ଆଜି ଛାଡ଼ିଛନ୍ତି, କିନ୍ତୁ ସେହି ସ୍ପର୍ଶ ଜୀବନସାରା ତାଙ୍କ ସହ ରହିବ । ଦେଶର ମାଟି ତାଙ୍କୁ ଯେଉଁ ସ୍ୱପ୍ନ ଦେଇଥିଲା, ସେହି ସ୍ୱପ୍ନ ମଧ୍ୟ କେବେ ଛାଡ଼ିବେ ନାହିଁ ବୋଲି ତାଙ୍କ ଲେଖାରୁ ସ୍ପଷ୍ଟ ହୋଇଛି । ଦିବ୍ୟା ମିତ୍ତଲଙ୍କ ଏହି ବିଦାୟ ବାର୍ତ୍ତା ଏବେ ଅନେକଙ୍କ ପାଇଁ କେବଳ ଜଣେ IAS ଅଧିକାରୀଙ୍କ ଇସ୍ତଫା ନୁହେଁ, ବରଂ ଦେଶସେବା, ଲୋକଙ୍କ ବିଶ୍ୱାସ ଓ ମାନବିକତାର ଏକ ଭାବପ୍ରବଣ କାହାଣୀ ହୋଇଛି ।