ଭାରତ-ୟୁଏଇ ଶିକ୍ଷା କ୍ଷେତ୍ରରେ ଆଉ ଏକ ଗୁରୁତ୍ବପୂର୍ଣ୍ଣ ଭାଗିଦାରୀ । ପ୍ରଥମଥର ପାଇଁ ଦୁବାଇରେ ଆରମ୍ଭ ହୋଇଛି ଆଇଆଇଏମ୍ ଅହମ୍ମଦାବାଦର କ୍ୟାମ୍ପସ । କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହାର ଉଦଘାଟନ କରିଛନ୍ତି । ପ୍ରଧାନମନ୍ତ୍ରୀ ମୋଦିଙ୍କ ଦ୍ୱାରା ପରିକଳ୍ପିତ ଭାରତର ଶିକ୍ଷାର ଜଗତୀକରଣ ଏହା ଆଉ ଏକ ବଡ଼ ପଦକ୍ଷେପ । ଏହି ନୂଆ କ୍ୟାମ୍ପସ ବିଶ୍ୱକୁ ଭାରତର ନୂଆ ପରିଚୟ ପ୍ରଦାନ କରିବ । ଦୁବାଇରେ ନୂଆ ଆଇଆଇଏମ୍ କ୍ୟାମ୍ପସ୍ ଜାତୀୟ ଶିକ୍ଷା ନୀତିରେ କଳ୍ପନା କରାଯାଇଥିବା ‘ଆତ୍ମାରେ ଭାରତୀୟ, ଆଉଟଲୁକରେ ବିଶ୍ୱ’ ନୀତିକୁ ଏକ ସର୍ବୋତ୍ତମ ଲଞ୍ଚ ପ୍ୟାଡ୍ ପ୍ରଦାନ କରିଛି । ଶିକ୍ଷା କ୍ଷେତ୍ରରେ ବୈପ୍ଲବିକ ପରିବର୍ତ୍ତନ ପାଇଁ UAE-ଭାରତ କାମ କରିବ ବୋଲି କହିଛନ୍ତି ଧର୍ମେନ୍ଦ୍ର ପ୍ରଧାନ ।

ୟୁଏଇ ଉଚ୍ଚଶିକ୍ଷା ଏବଂ ବୈଜ୍ଞାନିକ ଗବେଷଣା ମନ୍ତ୍ରୀଙ୍କ ସହ ମଧ୍ୟ ସେ ଆଲୋଚନା କରିଥିଲେ । ୟୁଏଇରେ ଭାରତୀୟ ଉଚ୍ଚ ଶିକ୍ଷାନୁ ଗୁଡ଼ିକର ଏକ ଗୋଲଟେବୁଲ ସମ୍ମିଳନୀରେ ଯୋଗଦେଇଥିଲେ କେନ୍ଦ୍ର ଶିକ୍ଷାମନ୍ତ୍ରୀ । ସିବିଏସଇ ସ୍କୁଲର ପ୍ରିନ୍ସିପାଲଙ୍କ ସହିତ ଆଲୋଚନା କରିବା ସହ ୟୁଏଇରେ ଥିବା ଭାରତୀୟ ସ୍କୁଲ ଗୁଡ଼ିକରେ ଅଟଳ ଟିଙ୍କରିଂ ଲ୍ୟାବର ଶୁଭାରମ୍ଭ କରିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ । ପୂର୍ବରୁ ମନିପାଲ ବିଶ୍ବ ବିଦ୍ୟାଳୟ, ଆମିଟି ବିଶ୍ବ ବିଦ୍ୟାଳୟ, ବିଆଇଟିଏସ୍ ପିଲାନୀ, ଆଇଆଇଏଫଟି ଗାଜିଆବାଦ ଭଳି ଶିକ୍ଷାନୁଷ୍ଠାନ ଦୁବାଇରେ କ୍ୟାମ୍ପସ ଖୋଲିଥିବା ବେଳେ ଏଥିରେ ଯୋଡି ହେଉଛି ଆଇଆଇଏମ୍ ଅହମ୍ମଦାବାଦ କ୍ୟାମ୍ପସ । ଏଥିସହ ୧୦୯ଟି ସିବିଏସଇ ପରିଚାଳିତ ସ୍କୁଲ ସେଠାକାର ପ୍ରବାସୀ ଭାରତୀୟ ଓ ସ୍ଥାନୀୟ ଛାତ୍ରଛାତ୍ରୀଙ୍କ ପାଇଁ ଶିକ୍ଷାର ବଡ ମାଧ୍ୟମ ପାଲଟିଛି । ଦୁବାଇର ଭାରତୀୟ କନସୁଲେଟ୍‌ରେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଦେଇଥିଲେ ଧର୍ମେନ୍ଦ୍ର ପ୍ରଧାନ ।

'ଏକ ପେଡ୍ ମା’ କେ ନାମ' ଅଭିଯାନ ଅଧୀନରେ ଗଛ ଲଗାଇ ପରିବେଶ ସୁରକ୍ଷାର ବାର୍ତ୍ତା ଦେଇଥିଲେ । ଭାରତ ହେଉଛି ପ୍ରତିଭାବାନ ମାନବସମ୍ବଳ ଏବଂ ୟୁଏଇ ବିଶ୍ୱସ୍ତରୀୟ ଆର୍ଥିକ କ୍ଷେତ୍ରର ପେଣ୍ଠସ୍ଥଳୀ । ଭାରତ ଏବଂ ୟୁଏଇ ପୁରୁଣା ସମ୍ବନ୍ଧକୁ ବଜାୟ ରଖିବା ପାଇଁ ବଦ୍ଧପରିକର । ବିଶ୍ୱ ଶିକ୍ଷା, ନବସୃଜନ ଏବଂ ଉଦ୍ୟମିତା ମାନଚିତ୍ରରେ ‘ବ୍ରାଣ୍ଡ ଇଣ୍ଡିଆ’କୁ ସୁଦୃଢ଼ କରିବା ଲକ୍ଷ୍ୟ ।ୟୁଏଇ ଗସ୍ତର ପ୍ରଥମ ଦିନରେ ଆବୁଧାବିର ଶିକ୍ଷା ଏବଂ ଜ୍ଞାନ ବିଭାଗର ଅଧ୍ୟକ୍ଷା ସାରା ମୁସଲ୍ଲମଙ୍କ ସହ ଆଲୋଚନା କରିଛନ୍ତି ଧର୍ମେନ୍ଦ୍ର ପ୍ରଧାନ । ଭାରତର ବିଦ୍ୟାଳୟ ଗୁଡ଼ିକରେ କୌତୁହଳ ଏବଂ ସୃଜନ ଶୀଳତାକୁ ପ୍ରୋତ୍ସାହିତ କରିବାରେ ଅଟଳ ଟିଙ୍କରିଂ ଲ୍ୟାବ୍ସର ସଫଳତା ପରେ UAEରେ ଅଟଳ ଇନୋଭେସନ୍ ଲ୍ୟାବ୍ସ କାର୍ଯ୍ୟକାରୀ କରିବା ପାଇଁ ନିଆଯାଇଛି ପଦକ୍ଷେପ । ଗୁରୁ ଦିବସ ଅବସରରେ ଦୁବାଇରେ ଭାରତୀୟ କନସୁଲେଟ୍ ଦ୍ବାରା ଆୟୋଜିତ କାର୍ଯ୍ୟକ୍ରମରେ ଯୋଗ ଦେଇଥିଲେ କେନ୍ଦ୍ର ଶିକ୍ଷାମନ୍ତ୍ରୀ ।

ଆଇଆଇଟି ଦିଲ୍ଲୀ ଆବୁଧାବି କ୍ୟାମ୍ପସରେ ପହଞ୍ଚିବା ପରେ ଧର୍ମେନ୍ଦ୍ର ପ୍ରଧାନଙ୍କୁ ବିପୁଳ ସ୍ୱାଗତ ସମ୍ବର୍ଦ୍ଧନା ଦିଆଯାଇଥିଲା । ପ୍ରବାସୀ ଭାରତୀୟମାନେ ହେଉଛନ୍ତି ଆମର ଶକ୍ତି ଏବଂ ସେମାନଙ୍କ ସଫଳତାରେ ଆମେ ଗୌରବାନ୍ୱିତ । ୟୁଏଇରେ ବସବାସ କରୁଥିବା ଓଡ଼ିଆ ବନ୍ଧୁମାନଙ୍କୁ ସେ ଭେଟିଥିଲେ । କେନ୍ଦ୍ରମନ୍ତ୍ରୀଙ୍କ ଗସ୍ତର ଦ୍ବିତୀୟ ଦିନରେ ଦୁବାଇରେ ଓଡ଼ିଶାର ସଂସ୍କୃତିର ଝଲକ ଦେଖିବାକୁ ମିଳିଥିଲା । ୟୁଏଇରେ ସିବିଏସଇ ସ୍କୁଲ୍ ଦ୍ବାରା ଅନୁବନ୍ଧିତ ବିଦ୍ୟାଳୟର ଛାତ୍ରଛାତ୍ରୀମାନେ ପାରମ୍ପରିକ ନୃତ୍ୟ ଓ ସଗୀତରେ କେନ୍ଦ୍ରମନ୍ତ୍ରୀଙ୍କୁ ସ୍ବାଗତ କରିଥିଲେ ।