Assam Rifles / ଆସାମ ରାଇଫଲ୍ସ ଗାଡ଼ିକୁ ଅଜଣା ଦୁର୍ବୃତ୍ତଙ୍କ ଗୁଳିମାଡ଼, ଜଣେ ଯବାନ ସହିଦ

ଇମ୍ଫାଲ୍: ଯବାନଙ୍କୁ ନେଇ ଯାଉଥିବା ଗାଡ଼ିକୁ ଗୁଳିମାଡ଼ । ମଣିପୁରର ନାମ୍ବୋଲ ୱାଲ ଲେଇକାଇରେ ଆସାମ ରାଇଫଲ୍ସର ଯବାନଙ୍କ ଗାଡ଼ି ଉପରକୁ ଗୁଳିମାଡ଼ କରିଛନ୍ତି କିଛି ଅଜଣା ବନ୍ଧୁକଧାରୀ ଦୁର୍ବୃତ୍ତ । ଗୁଳିମାଡ଼ରେ ଜଣ ଯବାନ ସହିଦ ହୋଇଛନ୍ତି ।

ପ୍ରାଥମିକ ସୂଚନା ଅନୁସାରେ, ଆସାମ ରାଇଫଲ୍ସ ଯବାନଙ୍କ ଗାଡ଼ି ଉପରକୁ ଅଜଣା ଦୁର୍ବୃତ୍ତଙ୍କ ଗୁଳିମାଡ଼ରେ ଜଣେ ଯବାନ ଆଖି ବୁଜିଛନ୍ତି । ଆକ୍ରମଣରେ ଆଉ ୩ ଜଣ ଆହତ ହୋଇଥିବା ସୂଚନା ମିଳିଛି । ଏକ ୪୦୭ ଗାଡ଼ିରେ ଆସାମ ରାଇଫଲ୍ସର ଯବାନ ଇମ୍ଫାଲ ନାମ୍ବୋଲ ପୋଲିସ ଷ୍ଟେସନ ଆଡ଼କୁ ଯାଉଥିବା ବେଳେ ସନ୍ଧ୍ୟା ୬ଟାର ଏହି ଆକ୍ରମଣ ହୋଇଛି ।

ଏହି ଘଟଣା ଇମ୍ଫାଲ୍ ବିମାନବନ୍ଦର ଠାରୁ ୮ କିଲୋମିଟରର ଦୂରରେ ଘଟିଛି । ପିଟିଆଇ ରିପୋର୍ଟରେ କୁହାଯାଇଛି, 'ଅଜଣା ବନ୍ଧୁକଧାରୀଙ୍କ ଏକ ଗୋଷ୍ଠୀ ବିଷ୍ଣୁପୁର ଜିଲ୍ଲା ଆଡ଼କୁ ଆସାମ ରାଇଫଲ୍ସର ଗାଡ଼ି ଯାଉତିବା ବେଳେ ଗୁଳିମାଡ଼ କରିଛନ୍ତି ।'

ସ୍ଥାନୀୟ ଲୋକ ଓ ପୋଲିସ ସହାୟତାରେ ଆହତଙ୍କୁ ଚିକିତ୍ସା ଲାଗି ନିକଟସ୍ଥ ହସ୍ପିଟାଲ୍‌ରେ ଭର୍ତ୍ତି କରାଯାଇଛି । ଗୁଳିମାଡ଼ରେ ଅଧିକ ସୁରକ୍ଷାକର୍ମୀଙ୍କୁ ଘଟଣାସ୍ଥଳକୁ ପଠା ଯାଇଛି । ଯବାନ ଉକ୍ତ ଅଞ୍ଚଳକୁ କର୍ଡନ କରି ନେବା ସହ ସର୍ଚ୍ଚ ଅପରେସନ୍ ଆରମ୍ଭ କରିଛନ୍ତି ।

୧୯୪୯ ସେପ୍ଟେମ୍ବର ୨୧ ମଣିପୁର ମିଶ୍ରଣ ଚୁକ୍ତିକୁ ବିରୋଧ କରି ଘାଟିର ଉଗ୍ରବାଦୀ ଗୋଷ୍ଠୀ ମଣିପୁର ବନ୍ଦ ଡାକରାର ଠିକ୍ ଦୁଇ ଦିନ ପୂର୍ବରୁ ଏହି ଆକ୍ରମଣ ହୋଇଛି ।