ଯୁଦ୍ଧ ଘନଘଟା ମଧ୍ୟରେ ହେଲ୍ପଲାଇନ୍ ନମ୍ବର ଜାରି କଲା ଭାରତ
Key Points
ଇସ୍ରାଏଲର ପଦକ୍ଷେପକୁ SCO ବିବୃତିରେ ନିନ୍ଦା କରାଯାଇଛି।
ଯୁଦ୍ଧ ସ୍ଥିତିକୁ ନେଇ ଭାରତ SCO ବିତର୍କରେ ଭାଗ ନେବ ନାହିଁ ବୋଲି ସ୍ପଷ୍ଟ କରିଛି ।
ଇରାନରେ ରହୁଥିବା ଭାରତୀୟଙ୍କ ପାଇଁ ହେଲପଲାଇନ୍ ନମ୍ବର ଜାରି କରାଯାଇଛି ।
ଇସ୍ରାଏଲ-ଇରାନ ଯୁଦ୍ଧ ଉତ୍ତେଜନାକୁ ନେଇ ବିବୃତି ଜାରି କରିଛି SCO ବା ସାଂଘାଇ ସହଯୋଗ ସଂଗଠନ । ଏସସିଓ ବିବୃତି ଉପରେ ଆଲୋଚନାରୁ ନିଜକୁ ଦୂରେଇ ରଖିଲା ଭାରତ । ଯୁଦ୍ଧ ସ୍ଥିତିକୁ ନେଇ ଭାରତ SCO ବିତର୍କରେ ଭାଗ ନେବ ନାହିଁ ବୋଲି ସ୍ପଷ୍ଟ କରିଛନ୍ତି ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ।
ଇସ୍ରାଏଲର ପଦକ୍ଷେପକୁ SCO ବିବୃତିରେ ନିନ୍ଦା କରାଯାଇଛି। ଏହା ଅନ୍ତର୍ଜାତୀୟ ଆଇନ ଏବଂ ଜାତିସଂଘ ଚାର୍ଟରକୁ ଉଲ୍ଲଂଘନ କରୁଛି ବୋଲି କହିଛି ସାଂଘାଇ ସହଯୋଗ ସଂଗଠନ । ସ୍ଥିତି ନେଇ ଇରାନ ବୈଦେଶିକ ମନ୍ତ୍ରୀଙ୍କ ସହ ବୈଦେଶିକ ମନ୍ତ୍ରୀ ଏସ ଜୟଶଙ୍କର ଆଲୋଚନା କରିଛନ୍ତି । ଏହାପୂର୍ବରୁ ଗତକାଲି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ପ୍ରଧାନମନ୍ତ୍ରୀ ମୋଦିଙ୍କ ସହ ଟେଲିଫୋନରେ କଥା ହୋଇଥିଲେ । ମଧ୍ୟପ୍ରାଚ୍ୟରେ ଉତ୍ତେଜନା ମଧ୍ୟରେ ପ୍ରଧାନମନ୍ତ୍ରୀ ମୋଦି, ଫ୍ରାନ୍ସ ରାଷ୍ଟ୍ରପତି ମାକ୍ରନ ଓ ଜର୍ମାନ ଚାନସେଲରଙ୍କ ସହ କଥା ହୋଇଥିଲେ ଇସ୍ରାଏଲ ପିଏମ ।
ଅନ୍ୟପଟେ ଇରାନରେ ରହୁଥିବା ଭାରତୀୟଙ୍କ ପାଇଁ ହେଲପଲାଇନ୍ ନମ୍ବର ଜାରି କରାଯାଇଛି । ଭାରତୀୟ ଦୂତାବାସ ପକ୍ଷରୁ ଦୁଇଟି ହେଲପଲାଇନ ନମ୍ବର ଜାରି କରାଯାଇଛି । ଇରାନ - ଇସ୍ରାଏଲ ଯୁଦ୍ଧ ସ୍ଥିତି ସମୟରେ ସତର୍କ ରହିବାକୁ ଭାରତୀୟ ନାଗରିକଙ୍କୁ ପରାମର୍ଶ ଦିଆଯାଇଛି । ଇରାନରେ ଥିବା ଭାରତୀୟ ଦୂତାବାସ ଏକ୍ସ ପୋଷ୍ଟରେ ହେଲପଲାଇନ ନମ୍ବର ଜାରି କରିଛି । ନମ୍ବର ଦୁଇଟି ହେଉଛି- ୯୧୨୮୧୦୯୧୧୫ ଓ ୯୧୨୮୧୦୯୧୦୯ । ଜରୁରୀକାଳୀନ ପରିସ୍ଥିତିରେ ଯୋଗାଯୋଗ କରିପାରିବେ । ଭାରତୀୟମାନଙ୍କୁ ଦୂତାବାସର ସ୍ଥାନୀୟ କର୍ତ୍ତୃପକ୍ଷଙ୍କ ସହିତ ଯୋଗାଯୋଗରେ ରହିବାକୁ ମଧ୍ୟ କୁହାଯାଇଛି ।
