ନୂଆଦିଲ୍ଲୀ: ଇରାନ-ଇସ୍ରାଏଲ୍ ଯୁଦ୍ଧ ପାଇଁ ମଧ୍ୟପ୍ରାଚ୍ୟରେ ଉପୁଜିଥିବା ସ୍ଥିତି ଭିତରେ ଭାରତକୁ ବାଧାପ୍ରାପ୍ତ ହେଉଛି ତୈଳ ଓ ଗ୍ୟାସ୍ ଆମଦାନୀ । ଭାରତରେ ଗ୍ୟାସର ସଂକଟ ସୃଷ୍ଟି ହୋଇଛି । ଫଳରେ ସରକାର ଦେଶବ୍ୟାପୀ ଜରୁରୀକାଳୀନ ନିୟମ ଲାଗୁ କରିଛନ୍ତି ।

ଏବେ ଘରୋଇ ବ୍ୟବହୃତ ଗ୍ୟାସ୍ ମିଳୁଥିବା ବେଳେ ବାଣିଜ୍ୟିକ ବା କମର୍ସିଆଲ୍ ଗ୍ୟାସ୍‌ର ଅଭାବ ପରିଲକ୍ଷିତ ହେଉଛି । ଲୋକ ଯେଭଳି ଗ୍ୟାସ୍ ସିଲିଣ୍ଡର ଗଚ୍ଛିତ ନ ରଖିବେ ଏବଂ ଗ୍ୟାସ୍ ଆମଦାନୀ ପ୍ରଭାବିତ ନ ହେବ ସେଥିପାଇଁ କେନ୍ଦ୍ର ସରକାର ESMA ଲାଗୁ କରିଛନ୍ତି ।

ଏଥିସହ ପଢ଼ନ୍ତୁ: ଯୁଦ୍ଧ ସମୟରେ କମିତି ବୁକିଂ କରିବେ ଗ୍ୟାସ ଜାଣନ୍ତୁ...

ଖାଦ୍ୟ ପ୍ରସ୍ତୁତିରେ ଯେଭଳି କୌଣସି ବାଧା ନ ଉପୁଜିବ ତାହା ସୁନିଶ୍ଚିତ କରିବାକୁ ସରକାର ଅତ୍ୟାବଶ୍ୟକୀୟ ସେବା ରକ୍ଷଣାବେକ୍ଷଣ ଆଇନ୍ (ESMA) ଲାଗୁ କରିଛନ୍ତି । ଏବେ ସରକାର ରିଫାଇନାରି ଏବଂ ପେଟ୍ରୋଲିୟମ୍ ସଂସ୍ଥାକୁ ଏଲପିଜି ଉତ୍ପାଦନ ବଢ଼ାଇବା ଏବଂ ପ୍ରମୁଖ ହାଇଡ୍ରୋକାର୍ବନ ଉତ୍ସରୁ ଏଲପିଜି ପୁଲ୍‌ ବଦଳାଇବାକୁ ନିର୍ଦ୍ଦେଶ ଦେଇଛନ୍ତି ।

ESMA କ'ଣ ?

ଅତ୍ୟାବଶ୍ୟକୀୟ ସେବା ରକ୍ଷଣାବେକ୍ଷଣ ଆଇନ୍ ହେଉଛି- ESMA । ଯାହାଦ୍ଵାରା କିଛି ଅତ୍ୟାବଶ୍ୟକୀୟ ସେବାର ବିତରଣ ସୁନିଶ୍ଚିତ କରାଯାଏ । ଏହି ସେବା ଲୋକଙ୍କ ଦୈନନ୍ଦିନ ଜୀବନ ସହ ଜଡ଼ିତ ହୋଇଥାଏ । ଏହା ପ୍ରଭାବିତ ହେଲେ ତାର ପ୍ରଭାବ ସିଧା ଜନତାଙ୍କ ଉପରେ ପଡ଼ିଥାଏ । ଯେଉଁଥିରେ ସାର୍ବଜନୀନ ପରିବହନ (ବସ୍ ସେବା), ସ୍ଵାସ୍ଥ୍ୟ ସବା (ଡାକ୍ତର ଓ ହସ୍ପିଟାଲ୍) ଆଦି ସାମିଲ୍ ।

ସରକାର ତୈଳ ରିଫାଇନାରିଗୁଡ଼ିକୁ ଏଲପିଜି ଉତ୍ପାଦନ ବଢ଼ାଇବାକୁ ନିର୍ଦ୍ଦେଶନାମା ଦେଇଛନ୍ତି । ESMA ଆଇନ୍ ବଳରେ ଜରୁରୀକାଳୀନ ଶକ୍ତିର ବ୍ୟବହାର କରିଛନ୍ତି ସରକାର । ଏହାଦ୍ଵାରା ପଶ୍ଚିମ ଏସିଆରେ ବଢ଼ୁଥିବା ସଂଘର୍ଷ ପାଇଁ ପ୍ରଭାବିତ ରୋଷେଇ ଗ୍ୟାସ୍ ସଂକଟରୁ ମୁକୁଳି ହେବ ।

ଏଥିସହ ପଢ଼ନ୍ତୁ: ଯୁଦ୍ଧ ଯୋଗୁଁ ଏଲ୍‌ପିଜି ସିଲିଣ୍ଡରର ଅଭାବ: ବନ୍ଦ ହେବ ସବୁ ରେଷ୍ଟୁରାଣ୍ଟ

୨୦୨୪-୨୫ ଆର୍ଥିକ ବର୍ଷରେ ଭାରତରେ ୪.୧୩ କୋଟି ଟନ୍ ଏଲପିଜି ବ୍ୟବହାର ହୋଇଥିଲା । ଯେଉଁଥିରୁ କେବଳ ୧.୨୮ କୋଟି ଟନ୍ ଏଲପିଜି ଘରୋଇ ସ୍ତରରେ ଉତ୍ପାଦନ କରାଯାଇଥିବା ବେଳେ ଅବଶିଷ୍ଟ ଆମଦାନୀ ହୋଇଥିଲା ।

ଭାରତ ୮୫ରୁ ୯୦ ପ୍ରତିଶତ ଗ୍ୟାସ୍ ସାଉଦି ଆରବରୁ କରିଥାଏ । ଏଥିପାଇଁ ହର୍ମୁଜ ଷ୍ଟ୍ରେଟ ଉପରେ ନିର୍ଭର କରିବାକୁ ପଡ଼େ । କିନ୍ତୁ ୧୧ ଦିନ ହେଲା ଚାଲିଥିବା ଇସ୍ରାଏଲ୍‍, ଆମେରିକା ଓ ଇରାନ ଯୁଦ୍ଧ ଯୋଗୁଁ ସମୁଦ୍ର ମାର୍ଗରେ ଜାହାଜ ଯାତାୟାତ ଠପ୍ ହୋଇ ଯାଇଛି । ଭାରତରେ ପର୍ଯ୍ୟାପ୍ତ ତୈଳ ବିଶୋଧନ କ୍ଷମତା ଥିବାରୁ ସରକାର ଏଲପିଜି ଉତ୍ପାଦନ ବୃଦ୍ଧି କରିବାକୁ ନିର୍ଦ୍ଦେଶ ଦେଇଛନ୍ତି ।