Smith Machhar / ଭାରତୀୟ ପାଇଲଟଙ୍କ ପାଇଁ ଭଣ୍ଡୁର ହୋଇଗଲା ୯/୧୧ ଭଳି ବଡ଼ଧରଣର ଆତଙ୍କୀ ଆକ୍ରମଣ ଷଡ଼ଯନ୍ତ୍ର

୩୦ ହଜାର ଫୁଟ ଉଚ୍ଚତାରେ ଉଡୁଥିଲା ବିମାନ। ଆଉ ବିମାନ କକ୍‌ପିଟ୍ ଭିତରେ ଚାଲିଥିଲା ମୃତ୍ୟୁର ଭୟାନକ ଷଡ଼ଯନ୍ତ୍ର । ଫ୍ଲାଇ ଦୁବାଇ ବିମାନ FZ- 1073 ରେ ଯାତ୍ରା କରୁଥିଲେ ୧୭୪ ଜଣ ଯାତ୍ରୀ । ହଠାତ୍ କୋ-ପାଇଲଟ୍ ସାଜିଲା ସୈତାନ୍ । ଧାରୁଆ ଅସ୍ତ୍ରରେ ଆକ୍ରମଣ କରି ବିମାନକୁ କ୍ରାସ୍ କରାଇବାକୁ ଆରମ୍ଭ କଲା ହୀନ ପ୍ରୟାସ । ହେଲେ ଦେବଦୂତ ସାଜି ସାମ୍ନାକୁ ଆସିଲେ ଭାରତୀୟ ପାଇଲଟ୍- କ୍ୟାପଟେନ୍ ସ୍ମିତ୍ ମଚ୍ଛାର । ଗୁରୁତର ଆହତ ହୋଇ ବି ଅସାଧାରଣ ଧୈର୍ଯ୍ୟ, ସାହସ ଓ ଉପସ୍ଥିତ ବୁଦ୍ଧି ଖଟାଇ ବିମାନକୁ ଏକ ମହାବିପତ୍ତିରୁ ବଞ୍ଚାଇ ଦେଇଛନ୍ତି । ଯେଉଁଥିପାଇଁ ଏବେ ସେ ସାରା ବିଶ୍ବରେ ହିରୋ । ଚାରିଆଡୁ ତାଙ୍କୁ ଶୁଭେଚ୍ଛାର ଶୁଅ ଛୁଟୁଛି । ଆଉ ଭାରତର ଏହି ବୀର ପୁଅଙ୍କ ପାଇଁ ଦେଶର ମୁଣ୍ଡ ଗର୍ବରେ ଉଚ୍ଚା ହୋଇଯାଇଛି ।

୯/୧୧ ଭଳି ଆଉ ଏକ ଆକ୍ରମଣରୁ ବଞ୍ଚାଇ ଦେଲେ ପାଇଲଟ । ଏଭଳି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଫ୍ଲାଏ ଦୁବାଇ ଫ୍ଲାଇଟର କ୍ୟାପ୍ଟେନ୍ ସ୍ମିତ ମଚ୍ଛାର ଅସାଧାରଣ ଧୈର୍ଯ୍ୟ, ଉପସ୍ଥିତ ବୁଦ୍ଧି ଓ ସାହସ ପ୍ରଦର୍ଶନ କରିଛନ୍ତି । ବାସ୍ତବରେ ଇସ୍ରାଏଲର ପ୍ରଧାନମନ୍ତ୍ରୀ ଯେପରି କହିଛନ୍ତି, ଜଣେ ଭାରତୀୟ 9/11 ଶୈଳୀର ଏକ ବଡ଼ଧରଣର ଦୁର୍ଘଟଣାକୁ ପ୍ରତିହତ କରିପାରିଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି- "କ୍ୟାପଟେନ୍ ସ୍ମିତ୍‌ଙ୍କ ଅସାଧାରଣ ଧୈର୍ଯ୍ୟ ଓ ଉପସ୍ଥିତ ବୁଦ୍ଧି ପାଇଁ ଆଜି ସାରା ଭାରତ ଗର୍ବିତ।"

ଦୁବାଇରୁ ଇସ୍ରାଏଲ୍ ଅଭିମୁଖେ ଉଡ଼ାଣ ଭରୁଥିଲା FZ 1073 ବିମାନ । ହଠାତ୍ ସମୁଦ୍ର ପତ୍ତନରୁ ୩୦ ହଜାର ଫୁଟ ଉଚ୍ଚତାରେ ବିମାନ ଭିତରେ ଆରମ୍ଭ ହୋଇଗଲା ଅସଲ କାହାଣୀ । ଓମାନ୍‌ର କୋ-ପାଇଲଟ୍ ହଠାତ୍ ଆକ୍ରମଣ ଆରମ୍ଭ କରିଦେଲେ । ବିମାନର ମୁଖ୍ୟ କ୍ୟାପଟେନ୍, ଭାରତୀୟ ନାଗରିକ ସ୍ମିତ୍ ମଚ୍ଛାରଙ୍କ ଉପରେ ଧାରୁଆ ଛୁରୀରେ ଆକ୍ରମଣ କରିବାକୁ ଲାଗିଲେ । ସ୍ମିତ୍‌ଙ୍କ ବେକ, ହାତ ଓ ମୁଣ୍ଡରୁ ପ୍ରଚୁର ରକ୍ତସ୍ରାବ ହେଉଥିଲା । ବିମାନଟି ମାତ୍ର ୨ ମିନିଟ୍ ଭିତରେ ୧୭ ହଜାର ଫୁଟ ତଳକୁ ଖସିଆସିଥିଲା । ହେଲେ ସ୍ମିତ୍ ହାର୍ ମାନିନଥିଲେ । ମୃତ୍ୟୁ ସହ ଲଢ଼ି, ରକ୍ତ ଜୁଡୁବୁଡୁ ଅବସ୍ଥାରେ ଶେଷ ଶକ୍ତି ଖଟାଇ କକ୍‌ପିଟ୍‌ର ଲକ୍ ଖୋଲି ଦେଇଥିଲେ । ଆଉ ସେହି ଗୋଟିଏ ନିଷ୍ପତ୍ତି, ୧୭୪ ଜଣ ଯାତ୍ରୀଙ୍କୁ ମୃତ୍ୟୁ ମୁଖରୁ ଫେରାଇ ଆଣିଥିଲା । ସାଉଦି ଆରବ ତବୁକ୍ ଏୟାରପୋର୍ଟରେ ବିମାନ ଅବତରଣ ପରେ ଆଶ୍ବସ୍ତ ହୋଇଥିଲେ ଯାତ୍ରୀ ।

ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ କହିଛନ୍ତି- "ଜଣେ ଭାରତୀୟ ପାଇଲଟ୍‌ଙ୍କ ସାହସ ଯୋଗୁଁ 9/11 ଶୈଳୀର ଏକ ବଡ଼ଧରଣର ବିମାନ ଆକ୍ରମଣ ଓ ମହାବିପତ୍ତି ଏଡ଼ାଯାଇ ପାରିଛି।"  ଆହତ କ୍ୟାପଟେନ୍ ସ୍ମିତ୍ ଶେଷ ମୁହୂର୍ତ୍ତରେ କକ୍‌ପିଟ୍ ଲକ୍ ଖୋଲିବା ଫଳରେ ଯାତ୍ରୀମାନେ ଭିତରକୁ ପଶିବାକୁ ସକ୍ଷମ ହୋଇଥିଲେ । ୪ ଜଣ ସାହସୀ ଯାତ୍ରୀ- ଜଣେ ପ୍ଲମ୍ବର, ଡାକ୍ତର, ବ୍ୟାଙ୍କର ଓ ବୀମା ଅଫିସର୍ ମିଶି ହେଡ୍‌ଫୋନ୍ ତାର ସାହାଯ୍ୟରେ କୋ-ପାଇଲଟ୍‌କୁ କାବୁ କରିଥିଲେ । ଏ ହେଉଛନ୍ତି ୟାନିଭ୍ ହାୟୁନ୍, ଯିଏ ବିମାନ ଦୁର୍ଘଟଣା ସଂପର୍କିତ 'ମେ-ଡେ' ଟିଭି ଶୋ’ ଦେଖିଥିବା ଜ୍ଞାନକୁ ବ୍ୟବହାର କରି ବିମାନର ତଳମୁହାଁ ଗତିକୁ ରୋକିଦେଇଥିଲେ । ସେହି ବିମାନରେ ଯାତ୍ରା କରୁଥିବା ଅନ୍ୟ ଦୁଇଜଣ ଅଫ-ଡ୍ୟୁଟି ପାଇଲଟ୍ ତୁରନ୍ତ କକ୍‌ପିଟ୍ ନିୟନ୍ତ୍ରଣକୁ ନେଇ ବିମାନର ସୁରକ୍ଷିତ ଏମର୍ଜେନ୍ସି ଲ୍ୟାଣ୍ଡିଂ କରାଇଥିଲେ । ବିମାନ ପଛ ରଡର୍ ଭାଙ୍ଗିଯାଇଥିଲେ ବି ସାଉଦି ଆରବର ତବୁକ୍ ଏୟାରପୋର୍ଟରେ ବିମାନଟି ଓହ୍ଲାଇଥିଲା । ଅନ୍ୟ ବିଶ୍ବ ନେତାଙ୍କ ସହ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ମଧ୍ୟ କହିଛନ୍ତି- "ଗୁରୁତର ଆହତ ହୋଇ ବି ଦ୍ୱାର ଖୋଲିବା ସ୍ମିତ୍‌ଙ୍କ ପ୍ରକୃତ ହିରୋପଣକୁ ଦର୍ଶାଉଛି ।"

ମାତ୍ର କେଇ ସେକେଣ୍ଡର ନିଷ୍ପତ୍ତି ଆଉ ଅସୀମ ସାହସ । ଗୋଟିଏ ପଟେ କୋ-ପାଇଲଟ୍‌ର ଭୟାନକ ଷଡ଼ଯନ୍ତ୍ର, ଅନ୍ୟପଟେ ଭାରତୀୟ କ୍ୟାପଟେନ୍ ସ୍ମିତ୍‌‌ଙ୍କ ଜୀବନ ବାଜି । ଆଜି ସ୍ମିତ୍‌ଙ୍କ କାରଣରୁ ୧୭୪ ପରିବାରରେ ଖୁସିର ଲହର ଖେଳିଯାଇଛି । କ୍ୟାପଟେନ୍ ସ୍ମିତ୍‌‌ଙ୍କ ଏହି ବୀରତ୍ୱ ବିଶ୍ୱ ଆକାଶମାର୍ଗ ଇତିହାସରେ ସଦା ସର୍ବଦା ସ୍ୱର୍ଣ୍ଣାକ୍ଷରରେ ଲିପିବଦ୍ଧ ହୋଇରହିବ । ତାଙ୍କୁ ଅଧିକ ଚିକିତ୍ସା ପାଇଁ ଆବୁଧାବି ଏୟାରଲିଫ୍ଟ କରାଯାଇଛି । ଅସୀମ ବୀରତ୍ବ ଓ ସାହସିକତା ପାଇଁ କ୍ୟାପଟେନ୍ ସ୍ମିତ ମଚ୍ଛାରଙ୍କୁ ବିଶିଷ୍ଟ ଗୁଜରାଟ ଗରିମା ଆୱାର୍ଡ ପ୍ରଦାନ ପାଇଁ ଘୋଷଣା କରାଯାଇଛି ।