ମିଳିତ ଜାତିସଂଘରେ ପାକିସ୍ତାନର ମୁଖା ଖୋଲିବ ଭାରତ । ଆସନ୍ତା ସପ୍ତାହରେ ହେବାକୁ ଯାଉଥିବା ଜାତିସଂଘ ସୁରକ୍ଷା ପରିଷଦ ବୈଠକରେ ପାକିସ୍ତାନର ଆତଙ୍କୀ ଲିଙ୍କର ପ୍ରମାଣ ଦାଖଲ କରିବ ଭାରତ । ଏଥିପାଇଁ ଜାତିସଂଘ ସୁରକ୍ଷା ପରିଷଦକୁ ସ୍ବତନ୍ତ୍ର ଟିମ ପଠାଯିବ । ପାକିସ୍ତାନ ଆତଙ୍କୀଙ୍କୁ ପ୍ରୋତ୍ସାହନ ଦେଉଥିବାର ସଦ୍ୟ ପ୍ରମାଣ ସହ ପାକିସ୍ତାନ ଆତଙ୍କବାଦର ପେଣ୍ଠସ୍ଥଳ ହୋଇଥିବାର ପ୍ରମାଣ ଦାଖଲ କରିବାକୁ ଭାରତ ପ୍ରସ୍ତୁତ ହୋଇଛି । ଏହାସହିତ ପାକିସ୍ତାନକୁ କଳାତାଲିକାଭୁକ୍ତ କରିବାକୁ ଭାରତ ଦାବି ଜୋରଦାର କରିବା ସମ୍ଭାବନା ରହିଛି ।

ଅନ୍ୟପଟେ ‘ଅପରେସନ ସିନ୍ଦୂର’ ନେଇ ପ୍ରେସମିଟ୍ କରି ସମସ୍ତ ସୂଚନା ଦିଆଯାଇଛି । DGMO, DGAO, DGNOଙ୍କ ପକ୍ଷରୁ ମିଳିତ ପ୍ରେସମିଟ୍‌ କରାଯାଇଛି । ବାୟୁସେନା କିପରି ଭାବେ ପାକିସ୍ତାନ ସାମରିକ ଘାଟି ଧ୍ବଂସ କଲା ସ୍ପଷ୍ଟ କରାଯାଇଛି । ଭିଡିଓ ଦେଖାଇ ଏହାର ପ୍ରମାଣ ରଖିଛି ସେନା । ପାକିସ୍ତାନ ପଟୁ ବହୁ ଡ୍ରୋନ୍ ଆକ୍ରମଣ ହୋଇଛି । ସମସ୍ତ ଆକ୍ରମଣକୁ ପଣ୍ଡ କରାଯାଇଛି । ସଫଳତାର ସହ ସବୁ ଡ୍ରୋନ୍ ଖସାଇ ଦେଇଛୁ, କିଛି କ୍ଷତି ହୋଇନି ବୋଲି କୁହାଯାଇଛି । କୌଣସି ସାମରିକ ଘାଟି କିମ୍ବା ସାଧାରଣ ଲୋକଙ୍କ କ୍ଷତି ହୋଇନି ।

୧୦୦ରୁ ଊର୍ଦ୍ଧ୍ବ ଆତଙ୍କୀ ନିପାତ ହୋଇଛନ୍ତି । କୁଖ୍ୟାତ ୟୁସୁଫ ଆଜହର, ଅବଦୁଲ ମଲିକ ରୌଫ୍ ଏବଂ ମୁଦାସିର ଅହମ୍ମଦ ଅପରେସନ ସିନ୍ଦୂରରେ ନିପାତ ହୋଇଥିବା ସୂଚନା ଦେଇଛନ୍ତି । କାନ୍ଦାହାର ବିମାନ ଅପହରଣ ଓ ପୁଲୱାମା ଆଟାକରେ ସଂପୃକ୍ତ ଥିଲେ । ସେହିପରି ୪୦ ପାକ୍ ସେନା ମରିଥିବା ନେଇ ସୂଚନା ଦେଇଛନ୍ତି । ୩୫ ରୁ ୪୦ ପାକ୍ ସେନା ମରିଛନ୍ତି କହିଲେ DGMO । ମେ ୭ରୁ ୧୦ ମଧ୍ୟରେ ଅପରେସନରେ ମରିଥିବା ନେଇ DGMO ପକ୍ଷରୁ ସୂଚନା ଦିଆଯାଇଛି ।

ପ୍ରଥମେ ପାକିସ୍ତାନୀ DGMO ଫୋନ୍ କରିଥିଲେ କହିଲେ ସ୍ଥଳସେନା DGMO । ୧୦ ତାରିଖ ୩ଟା ୩୫ରେ ମୋତେ ଫୋନ୍ କରିଥିଲେ । ଅସ୍ତ୍ରବିରତି ପାଇଁ ତାଙ୍କ ପକ୍ଷରୁ ପ୍ରସ୍ତାବ ଦେଇଥିଲେ । ଆଲୋଚନା ପରେ ସହମତି ହୋଇଥିଲା । ୧୨ ତାରିଖ ୧୨ଟାରେ ପୁଣି ଆଲୋଚନା ପାଇଁ ସ୍ଥିର ହୋଇଛି ବୋଲି କୁହାଯାଇଛି ।

ଯୁଦ୍ଧରେ କେଉଁ ଅସ୍ତ୍ର ବ୍ୟବହାର ହୋଇଛି ପଚାରିବାରୁ ସେନେଇ ସୂଚନା ଦିଆଯିବନି ବୋଲି DGMO କହିଛନ୍ତି । ଅପରେସନରେ କେଉଁ ଅସ୍ତ୍ର ବ୍ୟବହାର ହୋଇଛି କୁହାଯିବନି । କେବଳ ଟାର୍ଗେଟ ହିଟ୍ ଆମ ଲକ୍ଷ୍ୟ ଥିଲା । ଅପରେସନ ଦୃଷ୍ଟିରୁ ଏହାକୁ ଗୁପ୍ତରେ ରଖାଯାଇଛି ବୋଲି କହିଛନ୍ତି DGMO ।