ଚାକିରିରେ ଯୋଗ ଦେବାର ଦୁଇ ଦିନ ପରେ ଚାଲିଗଲା ଚାକିରି

ଚାକିରି ମିଳିବାର ଦୁଇ ଦିନ ପରେ ଚାଲିଗଲା ଯୁବକଙ୍କ ଚାକିରି । ହଠାତ୍ ଚାକିରି ମିଳିବାର ଖୁସି ଆଉ ହଠାତ୍ ଚାକିରି ଯିବାର ଦୁଃଖକୁ ନେଇ ସୋସିଆଲ ମିଡିଆରେ ପୋଷ୍ଟ କଲେ ଯୁବକ । ଯାହା ଏବେ ଖୁବ ଭାଇରାଲ୍ ହେଉଛି ।

ଯୁବକଙ୍କ ଦୁଃଖ ଭରା ପୋଷ୍ଟ "ମୁଁ ଦୁଇ ବର୍ଷ ପାଇଁ ଗୁରୁଗ୍ରାମର ଏକ ଛୋଟ କମ୍ପାନୀରେ ଫାଇନାନସିଆଲ୍ ଆନାଲିଷ୍ଟ୍ ଭାବରେ କାମ କରୁଥିଲି । ଜୁଲାଇରେ ଆଉ ଏକ ଜବ୍ ର ଅଫର୍ ଆସିଲା । ନୂଆ ଚାକିରିରେ ମୁଁ ଯୋଗ ଦେଲି । ହେଲେ ନୂଆ ଚାକିରିରେ ଯୋଗ ଦେବାର ଦୁଇ ଦିନ ପରେ ମୋ ଚାକିରି ଚାଲିଯାଇଛି ।

ଆଉ ମୋ ବସ୍ ମୋତେ କହିଛନ୍ତି ଯେ, ଏବେ ସେମାନେ ଅଧିକ ଦାତିୟ୍ୱ ତୁଲାଇପାରୁଥିବା ପ୍ରାର୍ଥୀ ଖୋଜୁଛନ୍ତି । ସେଥିପାଇଁ ମୋତେ ବାହାର କରିଦେଇଛନ୍ତି । ଯଦି ସମ୍ଭବ ହୁଏ କେହି ମୋତେ ନୂଆ ଚାକିରି ଖୋଜିବାରେ ସାହାଯ୍ୟ କରିବେ । କାରଣ ଏହା ମାନସିକ ସ୍ତରରେ ଖୁବ ଆଘାତ ପହଞ୍ଚାଇଛି । ମୁଁ ମୋର ପୂର୍ବ କାମକୁ ମଧ୍ୟ ଫେରି ପାରିବି ନାହିଁ । କାରଣ ମୋ ବଦଳରେ ସେମାନେ ଆଉ ଜଣଙ୍କୁ ରଖିସାରିଲେଣି ।

ତାଙ୍କର ଏହି ପୋଷ୍ଟ ଏବେ ଖୁବ ଭାଇରାଲ୍ ହେଉଛି । କେହି କେହି ତାଙ୍କୁ ଏମିତି ପରିସ୍ଥିତିରେ ମନୋବଳ ଦୃଢ କରିବାକୁ ପରାମର୍ଶ ଦେଇଛନ୍ତି । ପୁଣି କେହି ତାଙ୍କୁ ଆଉ ଚାକିରି ଖୋଜିବାକୁ ପରାମର୍ଶ ଦେଇଛନ୍ତି ।

ଠିକ୍ ସେହିପରି ଅନ୍ୟ ୟୁଜର କହିଛନ୍ତି କମ୍ପାନୀ ନାମରେ ମାମଲା ରୁଜୁ କରିବାକୁ । କାରଣ ବିନା କୌଣସି ନୋଟିସ୍ ବା ଆଗୁଆ ଦରମା ନଦେଇ ଚାକିରିରୁ ଏମିତି ବାହାର କରିଦେବା ଅନୁଚିତ୍ ।