ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତର ପ୍ରଥମ ପ୍ରଧାନମନ୍ତ୍ରୀ , ଯିଏ ଗୋଟିଏ ଗସ୍ତରେ ଏକାସହ ୩ଟି ଦେଶର ଜାତୀୟ ସଂସଦକୁ ସମ୍ବୋଧିତ କରିବେ । ଦୀର୍ଘ ୩୦ ବର୍ଷ ପରେ ଭାରତର ପ୍ରଧାନମନ୍ତ୍ରୀ ଘାନା ଆର୍ଜେଣ୍ଟିନା ଭଳି ଦେଶକୁ ଗସ୍ତ କରୁଛନ୍ତି । ଆଜିଠୁ ୯ ଜୁଲାଇ ଯାଏଁ ମୋଦିଙ୍କର ଗସ୍ତ ଲଗାତାର ରହିଛି । ତେବେ କେଉଁ ଦେଶକୁ କାହିଁକି ମୋଦିଙ୍କର ଗସ୍ତ ରହିଛି, ଗସ୍ତର ଉଦ୍ଦେଶ୍ୟ କଣ ରହିଛି, ସେ ସମ୍ପର୍କରେ ସମ୍ପୁର୍ଣ୍ଣ ଭାବେ ଆଲୋଚନା କରିବା ।

ପ୍ରଥମେ ମୋଦି ପହଞ୍ଚିବେ ଆଫ୍ରିକାର ଘାନା, ଏହା ପରେ ପହଞ୍ଚିବେ ଟ୍ରିନେଡାଟ ଏବଂ ଟୋବାଗୋ । ଏହାପରେ ପହଞ୍ଚିବେ ଆର୍ଜେଣ୍ଟିନା । ପରେ ପହଞ୍ଚିବେ ବ୍ରାଜିଲ । ସେଠାରୁ ପୁଣି ଆଫ୍ରିକାର ନାମ୍ବିଆ ପହଞ୍ଚିବେ , ସେଠାରୁ ପୁଣି ୯ ଜୁଲାଇରେ ପହଞ୍ଚିବେ ଭାରତ । ତେବେ ଗସ୍ତ ପଛରେ ମୋଦିଙ୍କର ଉଦ୍ଦେଶ୍ୟ ହେଉଛି, ବୈଶ୍ଵିକ ସ୍ତରରେ ଦକ୍ଷିଣ ଦେଶଗୁଡିକର ଉନ୍ନତୀକରଣର କରିବାରେ ସହଯୋଗ କରିବା । କାରଣ ବିଶ୍ଵରେ ଉତ୍ତର ଥିବା ଦେଶ ଯେପରିକି ୟୁରୋପିଆନ ଦେଶ, ଅଷ୍ଟ୍ରେଲିଆ , ଉତ୍ତର ଆମେରିକା ଆଦି ଦେଶଗୁଡିକ ନିଜର ଦବଦ୍‌ବା ବଜାୟ ରଖିଛନ୍ତି । ଯେହେତୁ ଭାରତକୁ ବିଶ୍ଵଗୁରୁ ଭାବେ ଦାୟିତ୍ଵ ନେବାର ଆବଶ୍ୟକତା ରହିଛି, ସେଥିପାଇଁ ଭାରତ ସମେତ ଅନ୍ୟ ଦକ୍ଷିଣ ଦେଶଗୁଡିକୁ ମଧ୍ୟ ଉନ୍ନତୀକରଣ ପଥରେ ଅଗ୍ରସର ହେବାକୁ ପଡିବ ।

ଏଥିସହ ବ୍ରାଜିଲରେ ହେଉଥିବା ବ୍ରିକ୍ସ ଶିଖର ସମ୍ମିଳନୀରେ ଯୋଗଦେବେ ପ୍ରଧାନମନ୍ତ୍ରୀ । ଏଥିରେ ମୁଖ୍ୟ ଏଜେଣ୍ଡା ରହିବ ଭାରତର ପହଲଗାମରେ ହୋଇଥିବା ଆତଙ୍କୀ ଆକ୍ରମଣ ସମ୍ପର୍କରେ ଆଲୋଚନା । ପାକିସ୍ତାନ କରିଥିବା ଏହି ଆକ୍ରମଣରେ ଅନ୍ୟ ଦେଶମାନଙ୍କର ପ୍ରତିକ୍ରିୟା କଣ ରହିଛି, ସେହି ସମ୍ପର୍କରେ ଆଲୋଚନା କରାଯିବ । ଏଥିସହ ଭାରତ ନୂତନ ଜ୍ଞାନକୌଶଳ ଯେମିତିକି ୟୁପିଆଇ , ଇନଭେଷ୍ଟମେଣ୍ଟ , ଟ୍ରେଡ୍ ଆଦି ସମ୍ପର୍କରେ ଆଲୋଚନା କରାଯିବ । ଏଥିସହ ଆଫ୍ରିକାରେ ଭ୍ୟାକସିନ ହବ ତିଆରି ହେବା ନେଇ ମଧ୍ୟ ଆଲୋଚନା କରାଯିବ ।

ତେବେ ପ୍ରଥମେ ପ୍ରଧାନମନ୍ତ୍ରୀ ଗସ୍ତ କରିବେ ଘାନା । ଦୀର୍ଘ ୩୦ ବର୍ଷ ପରେ ଘାନା ଗସ୍ତ କରୁଛନ୍ତି ଭାରତର ପ୍ରଧାନମନ୍ତ୍ରୀ । ସେଠାରେ ସେ ଘାନିଆନ ପାର୍ଲାମେଣ୍ଟକୁ ସମ୍ବୋଧନ କରିବେ । ଏହିଠାରେ ହିଁ ଭ୍ୟାକସିନ ହବ୍‌ର ପ୍ରତିଷ୍ଠା ପାଇଁ ସେ ପ୍ରସ୍ତାବ ଦେବେ । କାରଣ କୋଭିଡ ୧୯ ସମୟରେ ଭାରତ ଭ୍ୟାକିସନ ଯୋଗୁ ଭାରତ ଏକ ମୁଖ୍ୟ ଭୂମିକା ଗ୍ରହଣ କରିଥିଲା ।ଏହାକୁ ଆଗକୁ ଆହୁରି ଅଧିକ ବଢାଇବା ପାଇଁ ଭାରତ ଏପରି ପଦକ୍ଷେପ ନେବାକୁ ଚାହୁଁଛି । ଏଥିସହ ଘାନାର ରାଷ୍ଟ୍ରପତିଙ୍କ ସହ କଥା ହେବେ ମୋଦି ।
ଜୁଲାଇ ୩ରୁ ୪ ମୋଦି ରହିବେ ତ୍ରିନିଦାଦ ଏବଂ ତୋବାଗୋରେ । ଦୀର୍ଘ ୨୫ ବର୍ଷ ପରେ ଏହି ଦେଶ ଗସ୍ତରେ ଯାଉଛନ୍ତି ପ୍ରଧାନମନ୍ତ୍ରୀ । ଏହି ଦେଶରେ ପ୍ରାୟ ୪୦ ପ୍ରତିଶତ ଭାରତୀୟ ବଂଶୋଦ୍ଭବ ରୁହିଛନ୍ତି । ଏଠାରେ ଥିବା କାରିବିଆନ କମ୍ୟୁନିଟି ସହ ସମ୍ପର୍କ ସୁଦୃଢ କରିବା ପାଇଁ ଗସ୍ତ କରୁଛନ୍ତି ମୋଦି ।

୪ ଜୁଲାଇରୁ ୫ ଜୁଲାଇ ଆର୍ଜେଣ୍ଟିନା ଯିବେ ପ୍ରଧାନମନ୍ତ୍ରୀ । ଦୀର୍ଘ ୬୦ ବର୍ଷ ପରେ ଆର୍ଜେଣ୍ଟିନା ଯାଉଛନ୍ତି ଭାରତର ପ୍ରଧାନମନ୍ତ୍ରୀ । ତେବେ ଦୁଇ ଦେଶରେ ଅଧିକରୁ ଅଧିକ ବାଣିଜ୍ୟ ସହଭାଗିତା ତଥା ସାମରିକ କ୍ଷେତ୍ର ସୁଦୃଢ କରିବା ନେଇ ଆଲୋଚନା କରାଯିବ । ଲିଥିୟମ ପ୍ରସ୍ତୁତ କରିବାରେ ଆର୍ଜେଣ୍ଟିନା ସବୁଠୁ ଆଗରେ । ଆଉ ଇଲେକ୍‌ଟ୍ରିକ ଗାଡି ପାଇଁ ଲିଥିୟମର ଅଧିକରୁ ଅଧିକ ଆବଶ୍ୟକତା ରହିଛି । ସେଥିପାଇଁ ବାଣିଜ୍ୟ କ୍ଷେତ୍ରରେ ଆଲୋଚନା କରିବାକୁ ଆର୍ଜେଣ୍ଟିନା ଯିବାକୁ ସ୍ଥିର କରିଛନ୍ତି ମୋଦି । ଏଠାକାର ରାଷ୍ଟ୍ରପତି ଚାଇନାର ବିରୋଧୀ ରାଷ୍ଟ୍ର ହୋଇଥିବାରୁ ଭାରତ ପାଇଁ ଏହା ସୁବିଧାଜନକ ।

ଏହାପରେ ୫ ରୁ ୮ ବ୍ରାଜିଲରେ ରହିବେ ମୋଦି । ବ୍ରାଜିଲରେ ହିଁ ସବୁଠୁ ଅଧିକ ଦିନ ରହିବାର ମୋଦିଙ୍କର ବ୍ୟବସ୍ଥା ରହିଛି ।ବ୍ରାଜିଲରେ ହିଁ ବ୍ରିକ୍ସ ସମ୍ମିଳନୀରେ ଯୋଗ ଦେବେ ପ୍ରଧାନମନ୍ତ୍ରୀ । ଏଠାରେ ମଧ୍ୟ ଟ୍ରେଡ , ଆତଙ୍କୀ ଆକ୍ରମଣ ସମ୍ପର୍କୀୟ ଆଲୋଚନା କରାଯିବ । ତେବେ ଚଳିତ ଥର ବ୍ରିକ୍ସ ସମ୍ମିଳନୀରେ ୧୨ ବର୍ଷ ପରେ ଚୀନ ରାଷ୍ଟ୍ରପତି ଅନୁପସ୍ଥିତ ରହିଥିବା କୁହାଯାଉଛି ।

ଏହାପରେ ଜୁଲାଇ ୯ରେ ନାମ୍ବିଆ ଗସ୍ତ କରିବେ ମୋଦି । ଦୀର୍ଘ ୨୭ ବର୍ଷ ପରେ ନାମ୍ବିଆ ଗସ୍ତ କରୁଛନ୍ତି ପ୍ରଧାନମନ୍ତ୍ରୀ । ଏଠାରେ ମଧ୍ୟ ରାଷ୍ଟ୍ରପତିଙ୍କ ସହ ରହିଛି ଦ୍ବିପାକ୍ଷିକ ଆଲୋଚନା । ପରେ ନାମ୍ବିଆରେ ଲଞ୍ଚ କରାଯିବ ଭାରତର ୟୁପାଇ ବେସ୍ଡ ଡିଜିଟାଲ ପେମେଣ୍ଟ ସିଷ୍ଟମ ।
ବିଶେଷ ଭାରତର ଟେକ୍ନୋଲୋଜିକୁ ଆଗକୁ ନେବା ପାଇଁ , ସମଗ୍ର ବୈଶ୍ଵିକ ସ୍ତରରେ ଭାରତକୁ ବିଶ୍ଵଗୁରୁ ଭାବେ ତିଆରି କରିବା ଉଦ୍ଦେଶ୍ୟରେ ଏପରି ଗସ୍ତରେ ଅଛନ୍ତି ପ୍ରଧାନମନ୍ତ୍ରୀ ।

Argus News | argus news | -Argusnews Home: Odisha Latest News, Breaking News, Trending News, Live TV and more