ଭାରତ ଉପରେ ଆଜିଠାରୁ ଲାଗୁ ହେଲା ୨୫ ପ୍ରତିଶତ ଟାରିଫ, ୨୭ରୁ ଲାଗିବ ଆଉ ୨୫ ପ୍ରତିଶତ । ଟ୍ରମ୍ପଙ୍କୁ ମୋଦିଙ୍କ ମୁହଁତୋଡ ଜବାବ, 'ଚାଷୀଙ୍କ ସ୍ୱାର୍ଥ ସହିତ ସାଲିସ୍ କରିବ ନାହିଁ ଭାରତ' । ଟପ୍ ଆମେରିକାନ ଇକୋନୋମିଷ୍ଟଙ୍କ ଚେତାବନୀ, ଟ୍ରମ୍ପଙ୍କୁ ମହଙ୍ଗା ପଡ଼ିବ ଭାରତ ଉପରେ ଟାରିଫ ବୃଦ୍ଧି। ଆମେରିକା ଉପରେ ଜବାବୀ ଟାରିଫ ଲଗାଇବାକୁ ବିଭିନ୍ନ ମହଲରେ ଦାବି ।

ଟ୍ରମ୍ପଙ୍କୁ ମୋଦିଙ୍କ ସିଧା ସନ୍ଦେଶ । ୫୦ ପ୍ରତିଶତ ଟାରିଫ ଲାଗିଲେ ବି ନଇଁବ ନାହିଁ ଭାରତ । ରୁଷିଆ ସହ ବାଣିଜ୍ୟ ସମ୍ପର୍କକୁ ନେଇ ଭାରତ ଉପରେ ୫୦ ପ୍ରତିଶତ ଟାରିଫ ଘୋଷଣାକୁ ଅଯୌକ୍ତିକ କହିବା ସହ ଏଥିପାଇଁ ଭାରତକୁ ବହୁମୂଲ୍ୟ ଦେବାକୁ ପଡ଼ିବ ବୋଲି କହିଛନ୍ତି ପିଏମ ମୋଦି । ଟ୍ରମ୍ପଙ୍କ ପୂର୍ବ ନିର୍ଦ୍ଦେଶ ଅନୁସାରେରେ ଆଜିଠାରୁ ଭାରତ ଉପରେ ୨୫ ପ୍ରତିଶତ ଟାରିଫ ଲାଗୁ ହୋଇଥିବାବେଳେ ଆସନ୍ତା ୨୭ରୁ ଆଉ ୨୫ ପ୍ରତିଶତ ଅତିରିକ୍ତ ଟାରିଫ ଲାଗୁ ପାଇଁ ଘୋଷଣା କରିଛନ୍ତି ଟ୍ରମ୍ପ ।

ଭାରତ ଉପରେ ଟାରିଫ ବୃଦ୍ଧି ହେଲେ ବି ଦେଶର ଚାଷୀଙ୍କ ସ୍ୱାର୍ଥ ସହିତ ସାଲିସ୍ କରାଯିବ ନାହିଁ ବୋଲି ସିଧା ଉତ୍ତର ଦେଇଛନ୍ତି ମୋଦି । ନୂଆଦିଲ୍ଲୀରେ ବିଶିଷ୍ଟ କୃଷି ବୈଜ୍ଞାନିକ ଏମ.ଏସ. ସ୍ବାମୀନାଥନ ଆନ୍ତର୍ଜାତିକ ଶତାବ୍ଦୀ ସମାରୋହରେ ଯୋଗଦେଇ ଚାଷୀ, ପଶୁପାଳକ ଏବଂ ମତ୍ସ୍ୟଜୀବୀଙ୍କ ସ୍ୱାର୍ଥ ସହିତ ସାଲିସ୍ କରିବେ ନାହିଁ ବୋଲି କହିଛନ୍ତି । ଭାରତ ଉପରେ ୫୦ ପ୍ରତିଶତ ଟାରିଫ ଲଗାଇବାକୁ ଟ୍ରମ୍ପଙ୍କ ଧମକ ମହଙ୍ଗା ପଡ଼ିବ ବୋଲି ଚେତାଇ ଦେଇଛନ୍ତି ।

ଆମେରିକୀୟ ଅର୍ଥନୀତିଜ୍ଞ ପେଟର ସ୍କିଫ୍ । ଟାରିଫ ବୃଦ୍ଧି ବୈଦେଶିକ ବାଣିଜ୍ୟକୁ ଗଭୀର ଭାବେ ପ୍ରଭାବିତ କରିବା ସହ ଆମେରିକୀୟ ଗ୍ରାହକ କେବଳ କାଗଜ ବାଘ ହୋଇ ରହିଯିବେ ବୋଲି କହିଛନ୍ତି ଗ୍ଲୋବାଲ ଷ୍ଟ୍ରାଟେଜିଷ୍ଟ ପେଟର ସ୍କିଫ୍ ।

ରୁଷିଆରୁ ତୈଳ ଆମଦାନୀକୁ ନେଇ ଭାରତକୁ ବାରମ୍ବାର ଧମକ ଦେଉଥିଲେ ବି ଖୋଦ ଆମେରିକା ମଧ୍ୟ ରୁଷିଆରୁ ତୈଳ ଆମଦାନୀ କରୁଛି । ଚୀନ ସମେତ ଅନ୍ୟ ୟୁରୋପୀୟ ରାଷ୍ଟ୍ର ମଧ୍ୟ ରୁଷିଆରୁ ତୈଳ ଆମଦାନୀ ଜାରି ରଖିଛନ୍ତି । ଏପରି ସ୍ଥିତିରେ ଭାରତ-ରୁଷିଆ ବାଣିଜ୍ୟ ସମ୍ପର୍କକୁ ନେଇ ଟ୍ରମ୍ପଙ୍କ ନିଷ୍ପତ୍ତି ଉପରେ ବଡ଼ ପ୍ରଶ୍ନ ଉଠାଇଛି । ଦୁଇ ଦେଶ ମଧ୍ୟରେ ରାଜନୈତିକ, ସାମାଜିକ ସମ୍ପର୍କ ମଧ୍ୟ ତିକ୍ତ ହେବ ବୋଲି କହିଛନ୍ତି ବିଶେଷଜ୍ଞ । ଆମେରିକା ଉପରେ ଜବାବୀ ଟାରିଫ ଲଗାଇବାକୁ ଦାବି କରିଛନ୍ତି କଂଗ୍ରେସ ସାଂସଦ ଶଶି ଥରୁର ।

ବ୍ରାଜିଲ, ଭାରତ ଉପରେ ସର୍ବାଧିକ ୫୦ ପ୍ରତିଶତ ଟାରିଫ ଲଗାଇବାକୁ ଧମକ ଦେଇଥିବାବେଳେ ପାକିସ୍ତାନ, ବାଂଲାଦେଶ, ଇରାନ ଉପରେ ଟ୍ରମ୍ପ ଅପେକ୍ଷାକୃତ କମ ଟାରିଫ ଲଗାଇଛନ୍ତି । ଟାରିଫ ବୃଦ୍ଧି ଫଳରେ ଭାରତରୁ ଆମେରିକାକୁ ଯାଉଥିବା ସାମଗ୍ରୀ ଉପରେ ୫୦ ପ୍ରତିଶତ ଆମଦାନୀ ଶୁଳ୍କ ଲାଗୁ ହେବ। ଏନେଇ ଭାରତୀୟ ବୈଦେଶିକ ମନ୍ତ୍ରାଳୟ ପକ୍ଷରୁ ଏହାକୁ ଅନାବଶ୍ୟକ, ଆକାରଣ ଓ ଅନ୍ୟାୟ ବୋଲି ଦର୍ଶାଯାଇଛି।